Chhiah awl phalna: “Public interest” chu eng ber hi nge ni ta?

MVAT dan hnuaiah tum nga aia tlem lo chhiah awl phalna pek ani tawh a, a vaiin cheng vbc 12.56 chuang sorkarin a la lo ta. Mahse, “public interest” theuh theuh, chhiah awl chhan leh a dilpuitu te an inang lo nasa hle

 

Cover

Tunhnaiah Aizawl Football Club neitu North-East Consultancy Services (NECS) cheng vbc 1.26 hu Mizoram Value Added Tax (MVAT) awl tir a nih chungchangah titi a tam hle a. NECS hian MVAT awl hi vawi hnih a dil hnu in a tira Taxation Minister-in nakin ah mi dangin chhiah awl an dil ve zel a hlauh avangin a remti lo chung chu sorkarin a phalsak ta a ni.

Hetianga chhiah awl phalsak theihna hi MVAT Act 2005 ah a awm ve reng a, he dan section 47(1) chuan “public interest” (mipui thatpui tur leh ngaihven) thilah gazette notification chhuahin sorkar chuan chhiah awl a phalsak thei ang a ti a. Taxation Comissionerate-in an chhinchhiah dan chuan he dan hmang hian NECS tiamin tum nga chhiah awl an awm tawh a, a vaiin chhiah awl zat hi cheng vbc 12.56 a tling (a kimchangin phek 6-na ah).

NECS tiam lovin chhiah awl te hi district palia thingtlang khaw engemaw zata kawlphetha awm theih nana hmasawnna ruangam thawktu contractor te, khaw khat tui pekna lama hnathawk te bakah Champhai leh Hnahlana an grape tharchhuah hmanga wine siamtu inzawmkhawm Society te, mi harsa zawk te chenna in sakna tura tanpuina dawngtu te an ni hlawm a.

Tin, anni hi chhiah awl phalsak an nih hma in hetiang hmasawnna hnathawh endiktu leh viltu sorkar hotute’n committee kaltlangin chhiah awl an nih chhan tur leh awl an nih theih dan an rel hmasa tlangpui a, rel hmasak a nih lohna ah chuan Mizoram Advocate-General ngaihdan lak hmasak a ni bawk.

 

RGGVY contractor te MVAT cheng vbc 11 chuang awl an ni

Mizorama chhiah awl (exempt) zingah Rajiv Gandhi Grameen Vidyutikaran Yojana (RGGVY) hnathawktu contractor pahnih te hi awl tam ber an ni a, an pahnih hian Mizoram Value Added Tax (MVAT) cheng vbc 11.03 awl an ni.

RGGVY hi sorkar laipui hmalakna niin thingtlang khua mihring 100 aia tam chenna hmun apianga kawphetha pawh luh tumna a ni a, he hna thawh nan hian sorkar laipui chuan sum sen zawng zawng zaa sawmkua (90%) grant angin a tum a, a bak zawng zaa sawm (10%) chu loan angin state sorkar hnenah pek a ni thung.

MVAT awl tak RGGVY contractor firm pahnih te hian Mizoram chhunga district pali – Mamit, Kolasib, Aizawl, Champhai – ah kawphetha pawh luh hna hi an thawk a, an hnathawhnaa an mamawh bungrua an phurh luhna ah MVAT chawi tur an nih leh nih loh chungchangah hian an thuthlung ziahpui, Mizoram Power and Electricity Department (P&E) nen an thu a inhmu ta lova, chuvang chuan Advocate General Biswajit Deb-a ngaihdan lak a ni ta a ni. Deb-a chuan P&E leh contractor te thuthlung ziah a enchian hnu in P&E lam hian an tihtur an ti kim chiah lo nia a lan thu a sawi a, RGGVY project thawh man a tlawm zawk nan hian a tirah bungraw phurhluh ah te chhiah awl phalna lehkha chu P&E-in an pe lawk tur a ni a, he thil ah hian Joint Electricity Regulatory Commission (JERC) pakhat hnuaia awm kawp Manipur leh Mizoram tihdan a inang ta lo niin a sawi: Manipur chuan chhiah awl phalna lehkha, concessional C form hi RGGVY hnathawk te hnenah a pek laiin Mizoram chuan a pe ve lova, hei vang hian contractor te chuan an bungraw phurh luh ah te MVAT an chawi a ngaih phah ta a ni, tiin. Advocate General ngaihdanah chuan hetiang chhiah awl phalna lehkha hi RGGVY hna man man zawka thawh a nih theihna tura tih a ni a, chu chu sorkar leh mipui hlawkna tur a nih thu a sawi bawk.

Hetiang a nih tak avang hian Deb-a chuan RGGVY contractor te MVAT chawi tir chu a tul lo niin a sawi a, an lo chawi a nih pawhin an thuthlung ziah hnuaiah chuan state sorkarin an chhiah chawi hi a pek kir leh tho a ngai dawn a, chuvang chuan MVAT lak sak hian awmzia a nei thui dawn lo a ti bawk.

Mahse, Deb-a chuan heng contractor te hi MVAT awl an nih pawhin he thu kal lai ah bak hian a ngaihdan hi chhawm chi a nih loh thu leh chhiah awl tur leh tur loh dang ngaihtuahnaa hman chi a ni lo tih chiang takin a sawi thung.

 

Chhungkaw 800 vel eizawnna grape huan cheng nuai 14 thelh chhiah awl

Mizoram khawchhak lama khaw pahnih, Champhai leh Hnahlana cheng chhungkaw 800 bawr vel telna Grape Growers’ Society te hian kum 2012 khan an grape tharchhuah hmanga wine an siamchhuah te an hralh theih loh avangin man man zawka an zawrh theihna tura a man tihhniam dilna sorkar hotute hnenah an thlen a.

An sawi dan chuan “an wine siam sa um nuai chuang fe” an hralh thei lo a, an hralh theih loh chhan chu a hralhna man a san lutuk vang leh ruih theihna alcohol content a san vang te a nih bakah VAT leh Excise Duty an pek a tam vang niin an sawi a.

Hetianga hralh ban a awm teuh lai hian grape an thar leh dawn si a, an grape thar te dahkhawlna fermentation a la ruak bawk si lo niin an sawi bawk a.

An dilna ngaihtuah tur chuan khatih laia Excise leh Taxation changtu Minister JH Rothuama, Champhai South bialtu MLA chuan sorkar hotute May ni 2, 2012 khan a a ko khawm a, sorkar hotute thu khawm chuan a hma kum, kum 2011-a grape wine an siamchhuah ah te VAT an chawi tur chu awl mai ni sela, an Excise duty pek tur pawh a chanve in tih hniam sak ni se tiin an rel ta a ni.

Heng Grape Growers’ Society te chhiah awl an nih zat hi cheng nuai 13.75 a ni.

 

Khawzawl tui pekna sak nan chhiah awl

Mihring 12,750 bawr vel chawm tura ruahman Greater Khawzawl Water Supply Scheme (GKWSS)-a sak tur thenkhat hnathawk tur hian kum 2012 November thla khan tender an chhan dan azirin Public Health Engineering Department (PHED) chuan Gangwal Engineering and Construction Private Ltd chu a thlang ta a. GKWSS atan hian Ministry of Urban Development chuan cheng vbc 24.97 a tuk a, Gangwal company hnathawh tur bik hi cheng vbc 14.71 man hu lai a ni.

Mahse, Gangwal thawh tur china Detailed Project Report (DPR) siam a nih hnu leh thehluh a nih a pawm a nih hnu hian chhiah lak tur thar, Work Contract Tax te, Service Tax te leh Labour Cess te a piang neuh neuh a, PHED chhut dan chuan heng chhiah tharlam zawng zawng te chawi nan hian sorkar chuan cheng vbc 2.26 a sen belh a ngai dawn a.

Hei vang hian Mizoram Works Advisory Board chu khatih laia Chief Secretary L Tochhong hovin a thu khawm a, board chuan lungrual takin PHED-in chhiah thar avanga sum chawi belh tur chu Gangwal hnenah a pek mai loh chuan a dik thei dawn lo an ti a. Mahse, sorkarin sum chawi belh tur hi pe pawh ni sela, sorkarah vek chhiah angin a let dawn tho na in, chutianga han chawi belh mai chu sorkar sum dinhmun enin a harsat an ring tlang hle bawk a.

Board chuan kalpui dan tur chi hnih heti hian a duang ta a: Taxation Department-in a remtih chuan chhiah thar te hi awl mai ni sela, a nih loh vek chuan chhiah thar vanga sum chawi tur chu PHED-in sorkar laipui atanga a sum hmuh tur atangin lo dap sela, tiin.

MWAB rawtna hi Taxation chuan pawm in December 13, 2013 khan MVAT dan phal angin GKWSS chungchangah hian tum khat chhiah awl a phal ta a, GKWSS chhiah awl zat hi cheng nuai 4.53 a ni.

 

Mi harsate chenna in sa chhiah awl sak

Nikum khan Urban Development and Poverty Alleviation Department (UD&PA) chuan sorkar laipui hmalakna hnuaia mi harsa zawkte chenna in sakna tura ruahman Rajiv Awas Yojana chungchangah Taxation Department hnenah ngenna a thlen a. Khatih laia UD&PA Director Zorammuana chuan RAY pilot project hnuaiah mi harsa zawkte chu chenna in sakna tur pek an nih thu leh, an chenna in tur te chu anmahni ngeiin department endikna hnuaiah an sak dawn thu a sawi a.

RAY kalpui a nih dan endiktu committee chuan chenna in sakna tura tanpuina dawng turte chu mi harsa leh BPL chhungkua te an nih hlawm avangin Work Contract Tax awl mai ni se a tih thu thlenin, RAY pilot project hnuaia tanpuina dawng turte hming a thlen nghal bawk a.

He ngenna hi pawmin Taxation Department chuan he chhiah hi RAY pilot project scheme tanpuina dawngtute October 24, 2016 khan awl a phal ta a, Taxation chhinchhiah dan chuan hetianga chhiah awl hi cheng nuai 7.34 bawr vel a ni

 

Football vangin NECS chhiah awl a nih dan

NECS neitu leh Chief Managing Director Robert Romawia Royte chuan Decmber 28, 2016 khan Commissioner of Taxes hnenah lehkha ziakin kum 2015-16 season-a Aizawl FC enkawl nan cheng vbc 3.1 senso ah NECS chuan cheng vbc 2 a sen thu te leh TATA Trust puihna hmu turin cheng vbc 1.09 NECS-in a kum thum chhunga a thawh ve a ngaih thu te lehkha ah hian a ziak tel a.

NECS neitu hian I-League-a Aizawl FC a tel chhunzawm theihna turin cheng vbc 3 a thawh a ngaih thu sawiin, VAT chhiah awl a nih chuan NECS phurrit chu a zia phah viau dawn a ni a ti a.

Vanglaini chanchinbu in he lehkha chungchanga sorkar hotute ngaihdan ziahna notesheet a lo tarlan tawh angin, Finance leh Taxation Minister Lalsawta chuan “NECS-in an dilna hi phalsak ni ta se, hmun hrang hrang atanga contract hna thawktute’n chhiah awl an rawn dil ve theih avangin, lo zir chian ni se,” tiin a ziak a. Hemi hnu hian Finance Commissioner (Taxation) chuan “in further order in the proposal at pre page” tih a ziak ve leh a. Mahse, Aizawl FC President lo ni tawh thin, Parliamentary Secretary KS Thanga chuan “for approval pls” tih a lo ziak thung a. Hemi hnu hian Lalsawta chuan, “A pawi khawp mai, NECS hi chhiah awltir a nih chuan, contractor tam tak tan tuilian hawrh kuak ang maiin VAT awl tumna kawngka kan hawng thei dawn a ni,” tiin notesheet ah hian January 31 khan a ziak leh a ni.

Thla hnih chuang awrh a liam hnu ah Robert Romawia Royte chuan Commissioner of Taxes hnenah hian lehkha a thawn leh a, chutah chuan NECS-in football tihhmasawn nan cheng vbc 5 a seng tawh tiin, kum 2016-17 season-ah Aizawl FC enkawl nan cheng vbc 3 sen a ngaih thu leh, “NECS chauh chuan kan tlin lo tih kan hria a, mahse, Mizoram thalaite tuihalna leh rualawhna a san em si avangin sawrkar atanga VAT exemption beisei chungin kan kal chho ve zel a ni,” tiin a ziak a.

He lehkha a thehluh rual hian CYMA leh Mizoram Football Association-in VAT awl an dilpuina lehkha leh “VAT pek tura beisei zat list leh work order” a thil tel bawk a, “Taxation Department chuan kan dilna hmasa pawh tha takin min comment sak tawh a. Mahse, vawiin ni 8.3.2017-a Taxation Minister room-a sawihona bawhzui nan ziaka submit tha leh turin min tih avangin he dilna hi kan rawn ziak nawn leh a ni e,” tiin a ziak tel.

He lehkha thehluh leh bawhzuina notesheet ah chuan Finance Commissioner (Taxation)-in a hma Minister lo ziah tawh angin mi dangin awl an dil ve a hlauhawm thu leh vawi khat bak awl ni lo se a tih thu te a ziak a. Notesheet ah tho hian Parl Sec (Taxation) chuan March 15 khan “May be approved as proposed plz” tiin a ziak leh a, hemi ni vek hian Minister-in Chief Minister hnenah thawnin, CM chuan hemi ni tho hian “approved” tiin a lo pawmpui ta a ni.

NECS in chhiah awl a dilna ah te hian MFA leh CYMA dilpuina lehkha te thil tel a ni a. CYMA dilpuina lehkha bik avang hian YMA Central Executive Committee chhungah lungawi lohna a awm niin The Frontier Despatch chuan thu a dawng a. CEC member tam tak chuan a awm lo an tih thu te sawiin sawiho hmaa hetianga hmalakna a awm ta mai chu pawi an tih thu te an sawi bakah, hetiang thilah chuan CEC rawn hmasa lovin CYMA-in hma la tawh lo se tia rel a ni nghe nghe niin thu dawn a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s