Khawvel/ Cancer tihdam dan thar: Mihring thisen damdawi chak taka chantir

Ken Shefveland-a taksa chu cancer vangin a vung lek luk tawh a, doctor te’n tihdam an tum dan apiang chu a hlawhchham zel a ni ber. Mahse, tum khat chu tihdam dan tur dangdai tak an chhin ta: doctor te chuan a taksa a natna sual let tu (immune cells) an la chhuak then a, an siam danglam (engineer) ta a, an thisen zamah an chiu lut leh ta a.

Immune therapy tia an sawi chu cancer tihdamna kawngah tunlai hian thil langsar ber a ni a, damdawi nung an tih mai, mihring taksa chhunga nung a sipai rual ang maia cancer tumor that tu hi he tihdamna thara sulsutu a ni.  Darthlalanga a in en chuan Shefveland-a chuan a taksa a cancer te chu an tuiral ang maiin a hmu a, “Tunah chuan dam var chauh ka hmabak ta. Chu aia ropui chu enge ka beisei theih chuang ang?” tiin Shefveland chuan doctor te chu a kuah a.

Fred Hutchinson Cancer Research Center-a Doctor te’n hetianga hma an lak hnu thla khat lekah he Vancouver, Washington, US pa taksa ah hian a cancer vei Lymphoma hnuhma reng reng an hmu zo tawh lo.

He tihdamna kalphung thar hi cancer tihdamna lamah chuan thil thar hlak a ngaih a ni ngei ang, scientist te’n hlauhthawnawm thil engmah tel lova an tih fuh theih chuan.

Zirchianna hmasa te chuan hetianga immune cell siam danglam te hian nasa takin cancer chi hrang hrang, a bikin leukemia (thisen cancer) leh lymphoma (thling cancer) te chu a hneh tih an tarlang chiang tawh a.

Fred Hutchinson damdawiina doctor pakhat, Dr David Maloney chuan, “Mihring taksaa natna do tu immune system chak zia hi rin phak bak a ni,” tiin a sawi.

A thawhpui Dr Stanley Riddell chuan, “Beisei tur nei tawh lo kan damlote tumor leh thisen cancer te hi kar engemawzat chhung lekin a bo duak a ni ber,” a ti bawk.

“T cell” tia koh te hi taksa venhimna kawnga sipai huaisen an ni a. Mahse anni hian cancer hi an hmuh hmaih fo a, cancer hian an raldo kawngah brake an rap a ni ber a. Tunlaia tihdamna lama lar em em te chuan heng brake te hi an sut a, T cell te hian cancer hi an beihrawn thei ta thin a ni. Tihdamna thar lehzual ah chuan hetiang T cell te hi an tichak lehzual ta zawk bawk.

Thisen cancer engemawzat tana hman theih hetiang T-cell therapy te hi kumin kum tawp lam hian hmun hrang hrangah chhawpchhuah theih beisei a ni tawh a, USA sorkar hnuaia Food and Drug Administration (FDA) chuan tunah hian University of Pennsylvania-in a zirchian mek, damdawi siam company Novartis-in siamchhawng tura license a neih leh National Cancer Institute-in a zirchian mek, damdawi siam company dang Kite Pharma-in a siamchhawn tura license a neih te chu a en thlithlai mek a.

Tunah hian scientist te chuan hetiang tihdamna aia harsa hret an chhin leh mek a, chu chu T cell te hi cancer tualleng lehzual – chuap, hnute leh thluak cancer te – beihrawn tir a ni.

“Hei hi kan mamawh nasa tawh hle a ni,” tiin NCI immunotherapy sulsutu Dr. Steven Rosenberg chuan a sawi a, ama enkawl ngei damlote zingah pawh za chuang fe in he tihdam tum chhina test ah tel ve an duh thu an hrilh niin a sawi.

Mahse heti khawp hian damlote chu phur mahse, harsatna pal tlang tur tam tak a la awm.

Scientist te chuan envangin nge heng tihdamna te hi mi thenkhatah a thawh a, midangah a thawh ve loh tih an la zirchiang mek chauh.

Doctor te chuan taksa vengtute an chak tak lutuk vanga thihna thlen thei khawp side-effect awm thei te engtin nge an thunun theih ang tih an la ngaihtuah mek a, thluak vun nasat vanga thihna thleng a awm thin avangin damdawi siamtu company pakhat Juno Therapeutics chuan a zirna a titawp tawp tawh nghe nghe.

Heng zawng zawng bakah hian mihring pakhat taksa a thil awm sa siam danglam thei thiamna hi a to hle tura ngaih a ni a, hei hi mithiamte lu ti hai tu pakhat chu a ni.

“A nihna berah chuan, cell te hi an thil tih theih bak ti turin kan siam danglam tihna a ni,” tiin Fred Hutchinson-a immunology hotupa Dr. Philip Greenberg chuan a hrilhfiah.

Heng tihdamna te bultan dan hi thisen pek ang tluka awlsam a ni a. Thisen cancer-in a tlakbuak Claude Bannick-a’n hetiang tihdamna test naah kum 2014 khan a inpek tirh chuan nurse te’n khawl pakhat hmangin a white blood cells, T cell tiamin an lak chhuah sak a. Technician chuan a cell te hi factory ang tak, fai em em ah an kalpui a. Ni 14 chhung zet chu a cell te hi siam danglam an ni chhunzawm ta a.

Kum 67 mi Bannick-a sawi dan chuan hetih lai hian a thi lek lek hman tawh a, engpawh tihchhin a ngam niin a sawi.

Mahse heti khawp hian damlote’n bawh mahsela, tihdamna hian hun rei a daih angem tih chu zawhna lian tak a la ni cheu a. Tunhnai khan mithiamte chuan hetiang tihdamna dawngte zinga a zatve emaw chuan cancer an vei leh thei tho niin an sawi.

Mahse, rei tak dam ta te pawh an awm tho mai: kum 2010 khan Doug Olson chuan University of Pennsylvania siamchhuah, thisen cancer tihdamna CAR-T chu a dawng a. Doctor te chuan tlang takin sazu-ah thawk mahse mihringah a thawk ve kher angem tih an hriat loh thu an hrilh a, amah hi engtin nge a awm dawn pawh an hre chuang lo tih an hrilh a.

“Kum sarih a liam tawh a hei, a thawk ngei ani tih ka sawi ngam,” tiin Olson, tuna kum 70 mi chuan a sawi thung. Shefveland-a pawhin, “Side-effects a tam poh leh a thawk tih a chiang,” a ti.

Heng CAR-T cell te hian cancer an beih lai hian nasa takin immune system hi a thawk thei a, chu chuan khua te ti sik in blood pressure a ti hniam vak thei a, kawchhung te pawh a tichhe ve fo bawk. Damlo thenkhat chu an vai thin a, thil an hmu sual fo bawk. Engapawhchu nise, US FDA hian Novartis emaw Kite siamchhuah te hi phalna an pek chuan thisen cancer leh thling cancer vei te chu tihdam an ni ang a, an cell te chu factory ang takah siam danglam a ni anga, hun reilote ah chuan hospital tamtakin an hmang ve thei tura ngaih a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s