Lui dungah Tlawmngaihna Nopui

YMA Day pualin he pawl leh Mizo khawtlang ngaihsan Tlawmngaihna lanchhuah nasatna ber pawl, tuitla chhanchhuah leh ruang zawn kawnga hmingthang Sairang khawtlang chanchin tlem a zawng chhiartute kan hlui e. He thu hi TFD Volume 1, Issue 16 (June 10, 2016) a sap tawnga chhuah tawh lehlin a ni  – Ed


 

Mizo te’n kan ngaihsan leh chawimawina nopui kan dawm tir thin chu mi tlawmngai leh mi dang te tana inpe te hi an ni a, chu tlawmngaihna chu tunlaia a lansarhna berna te zing ami chu Tlawng lui kama cheng Sairang, Sairang Dinthar leh Sihhmui mipuite ah hian a ni awm e.

 

Sawmpakhat!

Sairang pa pakhat in tum khata tui tla a chhanchhuah hnem bera sawi chu mi sawmpakhat a ni a.

Kum 1990 chho vel kha a ni a, Sairang pa Lalziakliana chuan lui ah balu a lak laiin a piah lawka thalai intihlim mi sawmpakhat inkai a tui dai te chu an dai na hmun a lo thuk thut avangin tui ah chuan an tla ta phiar mai a.

Mi pakhat tana mi sawmpakhat tui tla chhanchhuah vek chu a ngaihna a awm loh avangin Lalziakliana chuan a bul hnaia mau tlawn la in an tlakna laiah chuan a tlan phei pui a, tuiah chuan chung tui tla te’n an lo vawn theih ta hlauhin tiin a hawlh phei a. Vanneihthlak takin an zinga pakhat chuan mau chu a lo man fuh a, tuiin a len mek te chu an lo la inkaih vek avangin Lalziakliana chuan an vai chuan tui atang chuan a pawt chhuak ta vek a ni.

Heng mi tlawmngai leh mi dangte tana inpe te tan hian chawimawina nopui dawm tur awm tawh lo mahsela, chung nopui leh lawmman te erawh chu Aizawl atanga khaw thlang lam km 20-a hla khaw pathum mipuite chuan an beisei chuang lo.

 

“Mitinin tui tla an chhan vek tawh ang a ni”

“Tum khat chu ka fapa leh a thian te chuan tui an cheng a, ka fapa hi tui a la chen thiam vak loh avangin a thian te rualin a cheng ve mai a. Chutia hlim taka an chen lai chuan lui kama nu pakhat kal chuan ka fapa tui cheng a hmuh chuan, ‘A tla a nih kha’ tih leh tuia zuan luh rualin a chhip samah thamin a hnuk chhuak a. Ka fapa tui tla tur chu a chhan chhuak a ni ta der a, a chhanchhuaktu pawh hian a nitin eizawnna hna chu a chhunzawm leh nghal mawlh mawlh mai,” tiin Lalhnehzuala, tuna Sairang YMA hnuaia Disaster Sub-Committee hruaitu leh tui tla an awm thulha Sairang mipui zinga tui thiam berte zinga an sawi chuan a hun kal tawh te a sawi ve bawk a.

 

Ruang zawn lama mi tlawmngaite

Tui tla an chhan piah lamah tui tla ruang an zawn dan te, ruang an tuam hlawm dan te hi heng khaw pathum mipuite ropuina pakhat a ni a, engmah phut let nei loa an hmelhriat pawh ni lo ruang an zawn dan mawlh hi tlawmngaihna hrilhfiahna langsar ber pakhat a ni.

Tui tla an awm phawt chuan zanlai pawh ni se, ruah eng anga tam pawh ni se, an ruang hmuh ngei tumin an thawk chhuak nghal thin a, an mi zawn te chu an hmuh hma loh (ni sarih chhung) zawn chu an tihturah an ngai hmiah mai a ni.

“Tui tla an awm chuan a ruang zawn hmuh chu kan tih turah kan ngai,” tiin C Sangrotluanga, Sairang Branch YMA President chuan a sawi a, “Tui tla ruang zawn hi mi nawlpui tihchi a ni lo a, hetiang a thlen tum hi chuan mi tlawmngaite’n an motor thawhin an tlakna hmun chu kan pan nghal vang vang thin a ni,” a ti.

 

Tih than dan: thir ban khawn rik

“Hman deuh kha chuan tui tla an awm hian a hre hmasa berin rang takin a bul hnaia electric thir ban chu a khawng ri nghal a, a hria apiangin an bul hnaia electric thir ban chu an khawng ri chhawng zel thin,” tiin Sairang YMA hruaitute chuan tun hma lama tui tla an awm tih an inhrilh dan chu an sawi a.

“A hnu deuhah chuan thir ban kan khawn thin kha titawh lovin motor ke (wheelrim), YMA office bula kan khai chu kan khawng leh ta zawk a, tunah chuan information mike te a that tawh bakah social media te a tha tawh bawk a, tunlai changkanna hi kan hmang tangkai ta a ni,” an ti bawk.

Thirban leh motor ke inkoh khawm nana an hman lai kha chuan a hre hmasa apiangte lui kama tlan khawmin lawnglengin tui tla awmna lai chu an pan nghal thin a. A hmun an thlen chuan tuiin ruang a len sawn hman loh turin an zawng nghal thin a. Tunah chuan ram a changkan ang zelin tui tla awmna hmun te chu lirthei neiin an lirthei thawh hmangin tlawmngaia thawk chhuak te chu an kal a, a tlakna zawna buk sual remna laiah buk sualin ruang an zawng thin a ni.

Tumahin an tha hah man emaw, an lirthei thawh chhuahpui man emaw an phut ngai lo a, tlawmngaia thawk chhuakin ruang zawn hmuh tumin chhunzan zawmin theihtawp an chhuah mai thin.

Tin, tlawmngaia ruang zawnga thawkchhuak te ei turin nula te chu in tinah lutin vehbur an khawn thin a, chung vehbur an khawnte chu tui tla zawngte riahbukah kengin anni’n ruang zawngte ei tur an lo siam sak thin a. Ni sarih chhung ruang zawn a ngaih chang pawhin tumah haw tum lovin an awm tum tla thak thin a, chung hunah te chuan thawkchhuak te chu chhungkhata eizawngtu ber an nih chang a tam nachungin phut let nei lovin an che chhuak thin a.

“Ruang zawnga thawkchhuak avanga chhuanchham an awm kan hre ngai lo a, mahse, thenkhatte hi chu chhungkaw eizawngtu tak tak an ni a, ni sarih chhung ruang zawnna hmunah awmin an nupui fanaute tan hun an hmang hman lo a, heng mite hi a tlawmngai hlei hlei te niin tanpui kan tum pawhin an duh ngai lo a ni,” tiin YMA hruaitute chuan an sawi.

 

Ni sarih chhung ruang an zawn dan

Mi tui a tlakin a tlakna hmuna pil nghal a, chumi hmuna a ruang hmuh nghal mai an awm laiin tui zangkhauhin thui tak a lak te pawh an awm a. Tui tla an awmin tui len dan a zirin tui thiam tlawmngai te chuan a zawnna tur an hre mai thin a.

Ni khatna leh ni hnihna ah te chuan tui thiamte’n an awmna tur nia an rin te chu an dap nasa hle a, li mawngah te hleuh lutin an kutin an dap mai thin a.

Tui tla te hi ni khatna leh ni nihnihna ah te hmuh an nih loh chuan a ni thumna ah te chuan an ruang chu lo puamin li mawngah an tang a nih loh chuan an rawn lang tura ngaih a ni a.

Ni thumna atang hi chuan ruang zawngtute hian ruang rawn lan changin lui kam atangin emaw, lawngleng atangin emaw in an zawng tawh a, ni rukna thlenga hetiang ruang rawn lang an hmuh loh chuan ni sarihna ah chuan theihtawp chhuahin li mawng te dap tha lehin an zawng thin a ni.

“Tui tla ruang kan zawn reng reng hian tuiin thui tak a lenbo ka rin thin avangin buk kan sual hlat theihna ber panin ka tlan ve tawp mai zel a, mahse, ka zawn ve lohna lamah hian an lo hmu ziah thung,” tiin Val Upa J Vanlalruata, kum 75 mi chuan nui chungin a chan loh khana an hmuh ziah thu a sawi a.

“Tum engzat hi nge ka hre tawh lo, Bairabi ka thleng thla ve ziah a, mahse, ruang te chu Bairabi rawn thleng thla lovin an lo hmu ziah a, chutia an hmuh thu kan hriat chuan kan haw veleh mai thin,” tiin a sawi bawk.

 

Tui tla zawn dan hrang hrang

Tlawng luia tui tla an awm apiangin Sairang – Sairang, Sairang Dinthar, Sihhmui – mipuite chuan an zawn turah an ngai nghal a. Val Upa kaihhruaiin tui thiamte tuiah an inliluh chhawk thin a, a changin tui thiam te chu inkhawih pha veka intlarin tuiah an lut thin.

Chi dang leh chu ‘Ngar Hem’ an ti a, lui kam atangin a kam lehlamah tui si rengin hrui an thlung a, tuiin hnawl leh thil dang a len te chuan hrui a fuh thin avangin chungah chuan tui thiam te chu inring rengin an awm a, ruangin hrui a fuh chuan lawnglengin rang taka umin ruang chu an chhar thin.

 

“Tlawmngaih viau pawhin hlauh chang a awm ve tho”

Sairang khawtlang hruaitute hian an thian pakhat hlau lutuk chanchin nui chungin an sawi a.

Tui chhungah balu la turin suahdur nen tuiah a zuang lut a, tui atanga a rawn chhuah rual chiah chuan ruang pakhat, tui chhunga rei tak awm tawh a rawn lang ve nawlh mai a, an thianpa chuan ruang chu a seh lo chauh a ni si a, a hlau lutuk chu ruang chhar lam ngaihtuah hman lovin tui atangin rang lutukin a tlan chhuak niin an sawi.

(He ruang hi Sairang mite pawhin an hriat loh – tui tla tih an hriat loh – a ni a, mahse,  a hnu ah tu nge a ni tih an hre leh).

 

Ruang chhar chu silfai ngei ngei tur

Sairang mite hian ruang an zawn an hmuh reng rengin a tlakna eng anga rei tawh pawh ni se, silfai lovin mipui hmuh theih turin an la chhuak ngai lo a, mipui nawlpuiin an chim hma in an sil fai vek a, puan in tha taka an khuh hnu ah vau kam lamah an la chhuak chauh thin.

 

Lui dunga ruang zawng ve te ruang hmuh hrilh dan

Tui tla an awmin lui dungah hmun tam takah buk sa in an zawng thin a, hetiangah hian km tam tak lui dungah an inkulh thin. Tui tla ruang a tlakna atanga hnai taka an hmuh in lui mawng lama awmte hrilh hriat vat a harsa thin a (tunlaiin mobile phone awm tawh mahse, signal a that tawk thin loh avangin inhrilh a harsa).

Chung hunah chuan changel an sat a, hmawlhte in kraws lem siamin changel ah chuan an vit bur thin a, chu chu tui an len thlak tir thin a, lui dunga ruang zawng te chuan chung chu an hmuhin lui hnar lama mite’n ruang an hmu tawh tih hria in an buk chhuahsanin an khaw lam an pan mai thin a ni.

 

Tui tla tlem ve hret hret

Aizawl chhehvelah picnic spot nuam leh tha tak tak a tam hnu hian Tlawng luiah hian tla an tlem ve tial tial niin Sairang khawtlang hruaitute chuan an sawi a, hei bakah hian kum telin lui dung leh li te a danglam ve zel a, tun hma lama tlak hlum tamna li thuk tak tak te kha Aizawl leh a chheh vel bawlhhlawhin a hnawh khat ve nasa tawh niin an sawi.

 

Khaw dangah tui tla zawngin feh chhuahna

Sairang khawtlang chuan Tlawnga tla te chu an chhar/zawn turah an ngai sa hrim hrim a, Tlawnga tla bakah hian khaw hrang hrang luia tla zawn hmuh mai loha te pawh an tui thiam te chu an rawn pun ve thin niin an sawi a, Phulpui, Saitual leh Khawlailungah te tui tla zawngin an thawkchhuak ve tawh nia sawiin hengah te hian Central YMA leh MLA kal tlanga sawmna an dawn an tihlawhtling thin niin an sawi.

Chung huna an thawh chhuah ve thinah te chuan an va kalna khaw mite tlawmngaihna leh inpekna thukzia an hm thin niin an sawi a.

 

Keini aia huaisen kan hmu tawh!

“Tuirinia tla kan zawn tumin min rawn pun ve a, kan va thleng chu tui thiam an tam lo hle a, mahse, an zawn dan erawh a puiin an huaisenzia leh an inpek nasatzia kan va hmuhin kan tluk lo hle a ni. An liluh ve thiam loh avangin lung tum chawiin tuiah an zuangthla a, lungtum rihna hmangin li mawng an thleng a, chutah chuan an lung ken chu thlahin an zawng chhunzawm mai a, a mak kan tiin an huaisenin kan tluk lo hle tih kan hmu a ni,” tiin Laldinpuia, Sairanga cheng tui thiam tak, Tlawnga ruang zawn ngaih tuma an tui thiam berte zinga an ngaih chuan a sawi.

Sairang tui thiam pakhat Lalhnehzuala chuan, “Keini tui cheng thiamte chu tuiah lutin kan zawng mai a, mahse, tui thiam ve lo, min uap tura kan bula awm ve reng, thosi leh vaihmite seh pawh pawisa loa awm te hi ani ka ngaihsan leh tlawmngai ka tih chu. Ka tluk lo hle,” tiin an ruang zawnnaa a tawn thu a sawi.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s