Ruahsur nasa avangin hmun hrang hrangah chhiatna thleng nasa

Tunkar tira Mizoram hmun hrang hranga ruahsur nasa avang khan hmun hrang hrangah chhiatna a thleng a, leiminin in a hnawl avanga thi eng emaw zat an awm.

 

Lunglei District ah chhiatna nasa

The Frontier Despatch (TFD) thu dawn danin Lunglei District-a Phairuangkaiah chuan June 13 zing dar 7 vel khan mitthi awmna in chhak atanga leiminin mitthi ina awmte a hnawl a, hmeichhe naupang kum 8 mi, Selina ruang chu a hnawl tel bakah mi pathum he leimin hian a hnawl. Mitthi chhungte lenpuitu leiminin a hnawl avanga thi ta te hi Dormodon (65), Birobotro (43) leh Roymaneko (50) te an ni. Phairuangkaiah tho hian Taia in chu leiminin a hnawl a, a bula in dang pahnih pawh hlauhthawnawmin an awm.

Lunglei District veka Changpui khuaah pawh in pahnih chu leiminin a hnawl a, mi pahnih chin hriat lohin an bo nia thu dawn a ni a, heng mite hi leiminin a chhilh nia rin a ni.

Marpara South-ah pawh in pahnih chu leiminin a hnawl a, mi pathum an thi a, chenna in leiminin a hnawl avanga hliam panga te chu Marapara damdawi inah dah an ni bawk.

Tlabungah pawh Khawthlang Tuipui lianin mihring chenna in 74 bakah Missionary kai te, Licheng Field leh a bula Indoor Stadium te a chim a, chenna in a chima cheng te hi hmun himah sawn chhuah an ni. Tlabung YMA hruaitute chuan tui lian avang hian thi leh hliam an awm lo a, Tlabung Sub Division chhungah hian khaw dang tam tak leh inkalpawhna kawng te tui lianin a chim tawh a, khaw hrang hranga mihring chenna in a chim zawng zawng hi 350 a tling a, leiminin chenna in a hnawl avanga nunna chan pawh 10 an tling.

Lunglei District-ah vek hian Zawlpui khuaa chenna in tam tak chu tui lianin a chim bawk.

 

Tlawng lui lian nasa

Tlawng lui pawh kum 50 kalta chhunga a len ber tum a thleng niin sawi a ni a, Sairang leh Sairang Dinthar Venga chhungkaw 15 chenna in a chim a, In dang 50 chuanga chengte pawh hmun him lamah sawn chhuah an ni. Sairang YMA hruaitute hnen atanga thu dawn danin June 12 tlai pawh khan balu la thin te chuan Tlawngah hian balu an la la a, hemi zan zanlai atangin nasa takin a lian a, Tlawng kam hnaiha awmte in a chim tan a, tui hi a len chak em avangin chhungkaw pakhat chuan an TV chauh an la chhuak hman a, in dang tam tak pawhin an bungrua an la chhuak hman lo.

Tui lian hian Sairanga chenna in 15 chu a chim pil deuh thaw a, in dang 50 chuang chu a ban leh chhuat te a chim a, in dang a chim hlauhawm te chu khawtlangin YMA Hall leh hmun remchang dangah an thiar chhuah sak.

Sairang Dinthar Vengah pawh Salvation Army Biak In bul hnaia awm chhungkaw pariat te chu an in hi tuiin a chim pil deuh thaw a, heng mite hi an bungrua an thiarchhuah sak.

Tlawng lui lian avang hian mihring thi leh hliam awm lo mahse, eizawnna tam tak a tichhia a, lui kama thlai eng emaw zat leh lawngleng eng emaw zat tui hian chim chhia in a lenbo a ni.

Sairang tui lenna hmunah hian Bialtu MLA K Sangthuama chu June 13 khan a kal nghal a, tui in a chim te a enkual a, buhfai bag 15, silpaulin bundle thum leh Rs. 10,000 chu a tul apianga hman atan YMA hruaitute hnenah a hlan a, a fund atangin chhawmdawl ngaite chhawmdawl nan cheng nuai 5 pek a tiam bawk.

Tlawng lui lian hian Reiek kaia Aizawl khawpui chawmtu tui pump-na hmun a chim a, lei pawh a chim tep a ni.

Mission Vengthlang atanga Reiek panna kawng pawh leiminin Lawipu lam kalna kawngpeng bulah a hnawhping a, helaia leimin hi a nasa hle a, a mual tawlhin a tawlh niin mita hmutute chuan an sawi a, kawng chhuat pawh a bal thla vek niin an sawi.

 

Champhai kawng ping

Aizawl atanga Champhai panna kawng, National Highway 54 pawh June 13 zing dar 1:30 vel khan Tuirial bulah a tlahniam a, Zemabawk YMA hruaitute hnen atanga thu dawn danin he kawng chhuat tlakhniamna hi Tuirial Airfield peng pelh hnu, Tuirial lama tun hmaa kawng chhuat tlakhniamna lai a ni a, lirthei engmah kal theih lohin kawng chhuat hi a tla thla a, a siamthat leh pawh a awlsam an rin loh thu an sawi. He kawng ping avang hian lirthei engemawzat leh zin veivak mi thahnem tak an tangkhang.

 

Serchhip ah in pakhat thiat

Serchhip khawpui chhungah pawh leimin avangin June 13 khan Vengchungah in pakhat thiah a ni a, P&E Vengah pawh a dinna lei him tawk lova hriat vangin in pahnih thiah ngai a awm bawk.

 

Saron Vengah In chim vangin Tuithiang leh Bethlehem inkalpawhna kawng ping

Aizawl Saron Venga PC Sangthangi In Assam type chhawng sarih, chhungkaw ruk luah lai chu June 13 zing dar 7:30 vel khan a chim a, thi leh hliam an awm lo.

Saron Veng khawtlang hruaitute hnen atanga thu dawn danin he in innghahna lei hi a tawlh a, in hi zawi zawi in a chim zui a, in luahtute hian bungrua engtham mah an chhuahpui hman lo. He in chim leh lei tawlh hian Tuithiang leh Bethlehem inkalpawhna (Bawngkawn-College Veng road) chu mihring leh lirthei kal tlang theih lohin a hnawhping vek a, a bul hnaia in a nek avangin a thlanga Lalzidinga te chhung  chu luahzui ngam lovin an inthiar chhuak a ni.

He leitawlh leh in chim avang hian chhungkaw 20 vel an inthiar chhuak a, khawtlangin hnatlangin an pui. Chhiat tawhna hmun hi Bialtu MLA Lalsawta leh sorkar mi pawimawhte’n an tlawh.

 

Bawngkawn ah leiminin in hnawl

Aizawl Bawngkawn East-a Lalengmawia in Assam type chhawng hnih Rochhuma leh Rimawia te chhung luah lai chu June 13 khawvar hma khan a chak leiminin a hnawl a, thi leh hliam an awm lo.

Bawngkawn khawtlang hruaitute chuan helai leimin hi June 3 zan khan nasa vak lovin a min tawh niin an sawi a, tun hnaiah ruah a sur nasat avangin a luahtute hi hmun dangah an riak chhuak thin a, June 12 zan dar 9 velah lung tla in in a deng a, zing dar 1:30 velah lei chu minin in hi a hnawl ta a ni. In chim hian a kawmthlanga Lalbiakzuala veranda pawh a delh chhe nual.

 

Hunthar-ah B Sairengpuii in tla then

Hunthar Venga leimina a min bang B Sairangpuii in hmun thenkhat chu June 13 zan dar 8:25 vel khan a tla bal a, in hi min hmabaka a awm rei tawh avangin thi leh hliam an awm loh bakah in chhung bungrua te pawh senghawi deuh vek a ni tawh.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s