Union Home Minister Mizoramah lo zin, ramri enkawl danah hmalakna thar

Sorkar laipuia Home Minister Rajnath Singh chu June 9-10 khan Mizoramah lo zinin a lo thlen ni hian Myanmar dep state Chief Minister te leh sorkar hotulu te nen an thu khawm a, an thurel thenkhat te chu…

Ramri hrul changtlun zawkna tur a sum mamawh, hman dan tur zirchiang turin committee sang din

Rajnath Singh-a chuan ramri hrul a mihring chengte mamawh te phuhruk sak zel a pawimawh thu sawiin, state sorkar te chu kawng sial, kawlphetha, inbiakpawhna, hriselna tih changtlun leh zirna tih hmasawn hna te ngai pawimawh bik turin a chah a. Home Minister chuan sorkar laipuia Border Management Department hotulu Secretary kaihhruaina  hnuaiah committee din ni se, he committee hian heng thil a mamawh bik te chu zirchiangin, kum thum, kum ruk leh kum 10 chhunga phuhruk theih dan tur ruahman se a ti a.

Tin, he committee hian sorkar peng hrang hrang sum bawm te a zirchiang bawk anga, sorkar laipui hnuaia Ministry hrang hrang bakah North Eastern Council te, Non-Lapsable Central Pool of Resources (NLCPR) te, BADP te leh state sorkar hrang hrang te sum chu hetianga ramri bulhnai tihchangtlunna’n hman anih theih dan a ruahman anga, committee hian kum kum tawpah report a thehlut ang.

 

Ramri hrula visa tel lova inkalpawh theihna ennawn turin committee sang din

Union Home Minister chuan India leh Myanmar ramri lehlam lehlama cheng te inlaichinna leh inpawh tawnna avangin visa free movement regime awmin, ramri hrul km 16 chhunga chengte chu visa tel lovin darkar 72 ram lehlamah zin/awm thei mahsela, misual leh hel pawl te’n hei hi an hmangsual nasa hle a ti a. Anni hian silai te, ruihhlo te leh dan phal loh bungrua te an tawlh nasa hle a. Tin, ramri venhimna a lo changtlun zel avangin hel pawl tam tak chu Myanmar chhungah an in suan lut a, free-movement regime hmang sualin India an lo lut zauh zauh a, pawi an khawih hnu ah Myanmar-ah an tlanchhe leh thin niin Rajnath Singh chuan a sawi bawk.

Home Minister hian hetiang anih avang hian free-movement regime zirchiang turin Home Ministry hnuaia Special Secretary (Internal Security) kaihhruaiin committee sang din ni se a ti a. Committee hian awlsam taka intlawh tawn phalna kalpui anih dan a zirchiang anga, tha zawka kalpui dan tur thla thum chhungin a ruahman anga, sorkar laipui hnenah report a thehlut ang.

 

Ramri venhimna’n police station tam zawk hawn belh, para-military te tanpui ngai ti

Ramri hrul km 10 huam chhungah mihring nuai 2.5 chuang khaw 240 velah an khawsa tih sawiin, Rajnath Singh chuan state hrang hrang CM te chu heng lai hmunah hian mipui thlamuan tur leh dan lova ramri kan a thilsual tih tum te ti thuanawp turin police station leh post te din belh turin a chah a. Assam Rifles-te’n tha taka hna an thawh theih nan CM te chu paramilitary te mamawh ngaihven sak turin a ngen nghal bawk.

 

Ramri hrul enkawlna sum bawm tihpun a ni

Kum 2016–17-a Border Area Development Programme (BADP) hnuaia ramri hrula awm state 17 hnena cheng vbc 990 dah hran thin chu kumin hian cheng vbc 1,100-ah tihpun a ni a. Kum thum kalta chhung khan he sum bawm atang hian Mizoram, Manipur, Nagaland leh Arunachal Pradesh hnenah cheng vbc 567.39 pek tawh an ni a. Kuminah leh tun hnu ah engzah nge Myanmar dep state te hian an chan dawn erawh sawi ani lem lo.

 

Zokawthar lei dawh that, Kaladan kawngpui sial mek chak zawk a kalpui theih dan tur

Mizoram CM Lal Thanhawla chuan insumdawn tawnna tha zawk dawl turin Zokhawthara lei chu Permanent Two Lane Bridge ah siam a tul thu a sawi a. Tin, Lawngtlai district-a Kaladan Multi-Modal Transit Tranport Project (KMMTTP) hna chak zawka a kal theih nan lei pariat dawh chu a bika ngaihpawimawh a tul thu te leh he hna hi chak zawka thawh anih theihnan Forest Ministry phalna pek vat a tul thu te meeting ah hian a sawi a.

TFD-in a lo tarlan tawh thin angin, contractor lian pahnihin an sial, Mizoram PWD-in a vil KMMTTP kawng sial anih danah hian Mizoram Assembly hnuaia MLA rual awmna Estimates Committee chuan duhkhawp lohna tur tamtak a awm thu a lo sawi fo tawh a. Hnathawh tan hma atangin lei (soil) zirchianna leh survey puitling tih a nih loh vangin re-estimate vawi hnih ngawt a ngai tawh a, kum li-a zawh tur chu kum riat thawh a ngaih phah thu te a lo sawi tawh thin.

 

Free Movement Regime chungchangah ruahmanna fel zawk, ramri veng turin Border Wing Home Guards din tul ti

CM chuan Free Movement Regime felfai zawka kalpui anih theih nan Mizoramin ruahmanna a siam mek thu meeting ah hian a sawi a. Hemi atan hian Mizoram hmun li ah dan in a phal crossing point siam a ni tawh tih sawiin, India leh Myanmar ramri hung chu tha a tih loh thu a sawi bawk. Tin, CM chuan ramri a venhimna hna tiphuisui turin Border Wing Home Guards din a rawt nghal.

Ram ralmuang anih avangin venhimna lama Mizoram sum sen tam ti, sumbawm hawn leh ngen

CM chuan BADP-in ramri a hmasawnna tha leh tluantling a thlen avangin ruahmanna tha tak a ni a ti a. Mizoram chu ram pahnih – Myanmar leh Bangladesh – karcheh anih vangin leh state ralmuang anih avangin thenawm state a hel pawl ten kawngka ah an hmang fo thin a, police ten heng hi dang turin theihtawp chhuahin hma la zel mahsela, remna leh muanna hian man a nei a, hei hi Central Sawrkarin a hriat a pawimawh a, chuvangin state ralmuang kan nih angin Security Related Expenditure Scheme hi chhunzawm a pawimawh a ni, a ti bawk.

 

Meeting a tel te

Union HM Rajnath Singh, Mizoram CM Lal Thanhawla, Manipur CM N Biren Singh, Arunachal CM Pema Khandu, Union MoS (Home) Kiren Rijiju, Mizoram Home Minister R Lalzirliana, Nagaland Home Minister Y Patton, Arunachal Dy CM Chowna Mein, state pali CS, DGP te, Sorkar laipui Ministry hrang hrang hotulu te leh Security agencies leh Assam Rifles hotulu te.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s