Asia/ Leiba uchuak vangin Yangon-a chhungkaw harsa tamtaka hmeichhia te nawhchizawrhna ah tlu lut nasa

Myanmar khawpui Yangon bula lui pahnih infinnaa thliarkar ah chuan Than Than Htwe te in, thinga dawm kan chu a ding a, he in tlawm tak chhungah hian mi pariat an cheng hova. An in hnuai chu lui tui a ni mai a, thosi a tam em em reng. An in kil khatah chuan TV a awm ve thin a, amaherawhchu, furpui lo thleng tawh mahse, an TV chu a huh a hlauhawm lo – an ni chhungkua hian an ba rulh nan an TV chu kumin kum tir lam khan an hralh daih tawh.

Nikum atangin a tu te an bula an lo khawsak ve hnu chuan Than Than Htwe chuan harsa takin an chhungkua chu chawm a tum thin a. A pasalin a hnathawhnaah hliampui a tawrh hnu atang phei chuan an chhungkaw chawm tur hian kyat 40,000 vel chu a laizawnnu hnen atangin a puk tawh a. Nitin mai pawisa a puk a, chu mi ni veka a rulh theih loh chuan a ba chu ni khatah kyat 2,000-in a pung thung a. A puk tirh atangin kum khat lai liam tawhin a puk zat aia tam fe chu rul tawh mahsela, ba a la nei tun tho mai.

“A sual reuh tak tak a ni. Ni khat lek pawh rul lo ila kan in kawtah a ding a, ‘A thlawnin pawisa ka puk tir lo che,’ tiin a au ziah,” tiin a laizawnnu chungchang chu a sawi.

Mahse, Than Than Htwe chauh hi leiba ngah a ni hran lo: tunhnai mai khan pawl pakhat, Save the Children chuan Yangon bulhnai khaw pathumah survey a nei a, chhungkua 85% lai chuan hetiang hian sum an puk thin tih a hmuchhuak. An pawisa puk te hian an mamawh zualpui lai chuan tanpui viau mahsela, an leiba hi a pung chak em em a, thla khatah 5% leh 30% inkarin a pung tlangpui.

Save the Children-a kum tam hnathawk tawh Mike Slingsby chuan heti hian a sawi, “Ka damchhung hian Asia ah ka la thawk char char a, mahse, hetiang em ema leiba nei tamna hmun hi ka la hre ngai lo. Hmun dang ai zawngin pawisa puk awm zat te, an puk zat te leh an leiba pun nasa tem em dan hi khawiah mah ka la hmu ngai lo,” a ti.

Myanmar khaw lian ber tih takah Yangon hian thingtlang mi, khawpuia hna zawng a hip nasa hle a. Mahse, hna nghelnghet tak hmuh a harsa a, pem chhungkaw tam zawk chuan an chhunkaw zinga rickshaw khalh te, kawngsira eichawp zuar te leh nitin inhlawhfa te thawh chhuah an ring tlangpui a, heng hna te lah hi furpui lai chuan thawh tlak an ni bawk si lo nen, kum chanve emaw lai chu eizawnna awm lovin an khawsak phah fo niin Al Jazeera chuan tunhnai khan a tarlang a, hetiang vang hian chhungkaw tam tak chuan pawisa an puk ta mai thin niin a sawi bawk.

“Zing ni chhuak leh tlai ni tla hi ka hlau ngawih ngawih a ni ber. Zing tin mai hian pawisa ka puk belh a ngaih ka hlau a. Tlai lamah chuan ka rulh dan tur ngaihtuahin ka lungngai a, zan ah chuan a tukah engtin nge ei ka hmuh ang tiin ka inngaihtuah hrehawm leh a. Ka leiba ngaihtuah reng reng hian ka awm a nuam lo a ni ber,” tiin Than Than Htwe chuan a sawi a, “Ka leiba pung rulhna tur ringawtin pawisa ka puk kual a, mi zawng zawng mai hian pawisa puk tur ka zawn kual avangin min hua,” a ti.

Tunhma deuh kha chuan hetianga pawisa puk a ngaih nachhan ber chu damloh thil thu ah a ni a. Tunhnaiah erawh chuan nitin mamawh a to deuh deuh vang a ni thung.

Save the Children-in a survey-na hmun ah te hian chhungkaw 50% te chuan nitin mamawh leina turin pawisa an puk thin a. He pawl hotu pakhat Katy Welby chuan, “He dinhmun hian mi tam tak harsatzia chu a tilang in ka hria. Pawisa puk tur an hmuh chuan an fate ei tur an hlui thei a. Mahse, an puk leh a pung chu an rul thei lo a nih vaih chuan an puk belh thei tawh lova, an puk theih loh miau chuan an tam a ni ber mai,” a ti.

Mihring khawsak dan zirmi (anthropologist) Maxime Bourtry chuan heti hian a sawi a sawi thung: “Hetiang em ema a pung a san vang hian chhungkaw khat chuan hun rei lo te chhungin kyat nuai li te, nuai nga te, nuai ruk thlengin leiba an nei mai thin a. Hetiang sum mamawh hmuh ran theih dan ber chu nawhchizawrhna a ni a. Chhungkaw tam tak tan chuan leiba neih loh dan awmchhun chu an fanute hralh a ni ber mai,” tiin.

Ma Ei Pyi te chhungkua chu in tereuh te pakhat, Hlaing Thayar khuaa kawr chunga dingah an khawsa ve tawk tawk a. A pasal chu sangha man tu niin, in lamah a ni hi a pa leh a fa te pahnih nen an khawsa a, an chhungkaw chawm nan chuan chawhmeh a zuar ve thin a. An chhungkaw ei khawp chiah chiah deuh thaw chu a thawk chhuak thin nang in, a pasal leh a pa chu an boral ta hlauh mai a.

Myanmar ah hian thih man a to em em a ni: damdawi in leh monastery (Buddhist Biak In) te chuan mitthi te vui tur leh death certificate pe chhuak turin kyat nuai khat aia tlem an phut ngai lova. Ma Ei Pyi hian a pasal boral vang hian chhawmdawlna dawng mahse, a pa vuina senso phuhruk turin kyat 50,000 lai a puk a ngai ta thova, a pawisa puk hi nitin 5%-in a pung ta a, hun rei lo te chhungin a leiba chu a let thum velin a pung ta thuai a ni.

“Chhungkaw khata hmeichhe awmchhun i nih a, lehkha thiam i nih loh chuan i hmabak chu nawhchizawrh a ni tawp mai a ni. Yangon-ah hian khawsak a harsa em em a, kan chhungkua dam khawchhuah nan chuan pawisa hi a zawna zawn a ngai tak meuh a. Nawhchizawrh vang hian sum engemawzat ka hlawh thei a, ka leiba te rul in ka fa te eitur ka hlui ve thei,” tih leh mittui hruk a rual a.

Ma Ei Pyi hian an thenawmnu pakhat thurawn avangin a taksa a zuar a, hetianga thutlukna a siam tak nachhan hi zep nei lem lovin a sawi hmiah hmiah lai chuan a fanu, kum 12 mi lek chuan uluk takin a lo ngaithla nghe nghe a. “He venga cheng ve te tam tak ai hian ka fate eitur ka hlui tha thei zawk,” a ti.

Kum 2015 khan pawl pakhat, Care International chuan Myanmar khawpui lia pahnih Mandalay leh Yangon-a nawhchizuar te dinhmun a zirchiang a, a tam zawk chu leiba avanga hetiang hna thawk ta mai hi an ni tih a hmuchhuak a, mahse, engzat pawh hlawh mahsela, an chhungte’n hnathawh tur an hmuh loh laiin pawisa an puk zel avangin an leiba chu a kiam hleithei lo tih an hmuchhuak bawk.

Hetiang deuh chiah hian Ma Ei Pyi dinhmun hi a in mung chho zel a. A fate pahnih bakah he hmeithai hian a nu, a unau te pathum, a nuta nupui leh a tupa, an in a lo cheng ve ta te chu a chawm vek a. Nawhchizuarin pawisa hlawh mahsela, nikum mai khan a nuta nupuiin nau a neih avangin kyat 50,000 lai a puk leh ta ringawt mai a ni.

Heti zat hi puk mahsela, Ma Ei Pyi hi engemaw zawng tak chuan a vannei angreng a, nawhchizuar a nih avangin a pawisa pukna te chuan a sum puk chu nitin pun tir lovin, thla khatah 10% in an pun tir zawk a. Amah ngeiin a sawi dan chuan hetiang pawisa puk tir tute hian nawhchizuar pawisa puk tir chu hlawk an ti a, nawhchizuar te chuan pawisa an thawh chhuah reng avangin an rul tha tlangpui niin an ngai thin.

Nawhchizawrh hi a hlawk angreng phian: Mai Ei Pyi hian vawikhat amah dawrtu a mutpuiin kyat 10,000 leh 15,000 inkar a hlawh ziah a, hei hi an khaw chhunga puan tahna hmun a hnathawk te hlawh let thum emaw lai a tling.

Mahse, nawhchizawrh hi Myanmar-ah phal loh a nih vangin eizawnna him a ni chiah lem lo.

“November atang tawh khan police-te’n min man thin vangin dawrtu ka hmu meuh lo. Police te hian tute nge kan nih an hria a, min dawrtute kan tawm puina hmun nen lam an hria a, chutah chuan min lo nghak a, pawisa kan pek loh chuan min man mai zel,” tiin a sawi a. Police te hian pawisa an phut chauh pawh a ni chuang lo niin a sawi. Ani leh a thiante engemawzat chuan tum khat chu police officer pakhat hotel ah an kal pui a, mana a vau avangin an mutpui hlawm niin a sawi. Police te erawh chuan hei hi an pha nasa hle.

Police-te’n an man loh nan tunlai hian Ma Ei Pyi chuan tiam rual pui a nei a, ani hian hlawh neiin dawrtu a thawn thin a. Hlawh an insem bakah hian Ma Ei Pyi hian a thurualpuipa tan hian nula thianghlim a zawn sak thin bawk a, ani chuan, “Tleirawl hmeltha min dil deuh reng a, ka hmuh sak apiangin kyat 50,000 vel ka hlawh ve thin a, mahse, hei hi nuam ka tih loh zawng tak a ni,” a ti thung.

Maxime Boutry chuan chhungkaw tam takin an leiba rulh nan an fanu te thianghlimna an hralh mai thin a, nula thianghlim hetianga zawrh hian kyat nuai nga lai an hlawh thei a, hetiang zat sum hi engti kawng dang mahin an hlawh chhuak thei lo niin a sawi bawk.

Tu tih chhuah nge chu hriat ni lo mahsela, mi tam tak chuan hetianga nula thianghlim an to em em nachhan hi dawt phuahchawp vang mai mai niin an ring a, an sawi dan chuan Chinese sumdawng thenkhatin nula thianghlim mutpui hian mipat hmeichhiatna avanga kaichhawn theih natna tam tak (HIV tiamin) a ti dam thei nia an ngaih vang niin an sawi.

Aye Winn Sann chuan a hotel te reuh te chu lungawi fahran lovin a nghak a, kawng kal eng emaw zat chu lo dak lut mahsela, ei turin tumah an lo lut lem lo. Aye Winn Sann-i hotel hi Yangon lui chhimlama ding a ni a, Yangon atangin lawnglengin minute 10 lek kal nimahsela, Yanfon khawpui chhunga hotel lian leh changkang tak tak leh ramdang sorkar hmunpui te nen chuan helai hmun hi in thlau veng veng tak a ni.

“Tunah chuan hotel neiha eizawn leh mi pawisa puk tir chu tehkhin chi ziazang a ni lo, pawisa puk tir hi a hlawk fe zawk,” a tih pahin a eitur siama tho fu tur chu a vai a. Ani chuan an leiba te rul tura nawhchizuar ta mai leh an fate sikul kal tir thulh tir tumah a hriat loh thu sawiin, pawisa puk tir chungchangah hian a puk tirtu mawlh chuan hlauh tur a ngah thu a sawi thung. Kumin kum tir khan Aye Winn Sann chuan kyat maktaduai hnih lai a ti bo niin a sawi a, a pawisa puk tir chhungkaw li lai chu zanthim hnuai ah an tlanbo daih vang niin a sawi. Thim hnu hi chuan a hriat ngai loh te pawisa a puktir tawh ngai loh thu leh a hmelhriat te chauh a puk tir thu te, chhungkaw khat kyat 30,000 aia tam a puk tir tawh ngai loh thu te leh a pung chu thla khatah 20% a nih thu te zep hauh lovin a sawi a. Ani ngaihdan chuan heng chhungkua te hian an mamawh hunah amah vangin pawisa an neih phah a, ani lah chuan hlep a lo nei ve a, a puktu leh a puk tir tu chu an hlawk mai a ni.

Myanmar dan hnuaiah chuan pawisa puk tir duh apiangin license an neih a ngai a, dan hian kum khata 18% aia tam a pung awm a phal lo hrim hrim bawk a. Mahse, mi tlemte chauhin he dan hi an zawm a, pawisa puk tirtu tam zawk chuan sumdawnna dang hmangin an thiltih an thup bawk.

Mike Slingsby-a sawi dan chuan heng mite hian dan pelin sum siam mahsela, an rilru chhungril ah chuan misual an ni lem lova, “A tlangpui thu in khawtlanga mi dang aia neinung deuh an ni a, an sum tihpun dan an hmu fuh hlauhah an inngai tlangpui. A then te chu phunglung viau mahsela, mi kutthlak an ching lem chuang lo. Mi tihzah hi an hmanrua ber chu a ni,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s