Chan loh khan ah buaina siam thubuai

Sorkar hnathawk pension tawh rawih nawn duhloh vangin PwD Commissioner hlui B Sairengpuii chu zirlai hruaitu te’n bang turin an phut a. Sorkarin a ban tak hnu ah chuan thalai lehkhathiam te hna tur luahtu pension rawihnawn 10 chuang an nawr bang zel dawn an tih chu an chhunzawm ta lem lo a. Mahse, bang tura an nawr chhuna tharum nena an chet danah chuan an hriat lohin thubuai an lo awrh reng a, a hnu kum 1, thla 4 leh ni 29 ah court kohna an dawng

IMG-20170619-WA0038

January 21, 2016 a ni. Aizawl khawpuiah zirlai sang hnih chuang leh mitdel eng emaw zat te chuan Zarkawt kawn atangin Chatlang lam an pan a, hemi ni hian heng zirlai leh rualbanlo te hian Persons with Disabilities (PwD) Commissioner B Sairengpuii chu a pension hnua chhawr nawn anih vangin a hna atangin a ban an phut a.

Zirlai leh rualbanlo kawngzawh te hi Chaltlanga PwD Commissioner pisa kawtah police-te’n an lo dang a, hetah hian zirlaite chuan Chief Minister Lal Thanhawla chu a lainate uchuak taka duhsakah puhin, bang turin an phut a. Home Minister R Lalzirliana pawh zirlaite vauah leh dawt sawiah puhin, bang turin an phut bawk a. Tin, Social Welfare Minister PC Lalthanliana chu a department enkawl zo loah ngaiin bang turin an phut bawk a ni.

Zirlai pungkhawmte hian pisa kai chhung ngeiin B Sairengpuii’n banna a thehluh emaw, sorkarin a ban emaw an phut a; chu an thil phut nghakin PwD Commissioner pisa bulah nilengin an awm khawm ta a.

Pisa kai hun tawpah pawh banna thu hriattur a la awm loh avangin zirlaite chu PwD Commissioner pisaah luh an tum ta a, anmahni dangtu police-te nen nasa takin an innawr a, police-te’n mittui tlakna hlo an hmang a, an innawrnaah hian police panga an hliam a, zirlai lamah pawh hliam an awm nual a; police panga leh zirlai pahnih chu damdawi inah kalpui an ni.

 

June 19, 2017

Zirlai leh police te PwD Commissioner pisa kawta an innawr atanga kum khat leh thla li leh ni 29 a ral hnu ah Mizo Students’ Union (MSU) hruaitu paruk leh Aizawl City College Joint Students’ Union (ACCJSU) hruaitu paruk te chuan Aizawl District Court-a Judicial Magistrate 1st Class hnen atangin kohna lehkha (summons) an dawng ta nawlh mai a, chu lehkha ah chuan Magistrate chuan chung mi 12 te lakah police-te’n IPC Section hrang hrang paruk hmanga thubuai an siamsak thu leh hemi chungchangah hian August 2, 2017-a a court-a inlan turin a hriattir a.

 

Zirlai hruaitute laka thubuai ziah luh dan

January 21, 2016-a zirlai sang chuangin PwD Commissioner B Sairengpuii pisa luh an tum tuma police te nen an invuak tlai khan police te chuan Bawngkawn Police Station ah suo-moto in thubuai an ziak lut a. Police te chuan ngun taka an chhui hnu ah May 25, 2017 khan Court ah chargesheet an thehlut ta a ni.

Police hotute chuan hetianga thubuai an siam nachhan chu kha punkhawmna leh innawrna avang khan thilchhia a awm nual vang te bakah sorkar pisa luhchilh tum zawnga zirlaite an chet vang niin an sawi.

 

Court lehkha in zirlai hruaitute barakhaih

Khatih laia MSU President PC Lalrinhlua chuan Court lehkha in a barakhaih takzet niin  TFD a hrilh a, “June 19 khan ina ka awm laiin police lo kalin court in thubuai kan neih thu leh inlan tura min kohna lehkha hi min rawn pe,” a ti a, “Lehkha ka en chu mak ka tiin kha thilah khan sorkar nen kan inrem vek tawh a, chuti chunga thubuai kan la nei chu a ngaihna pawh ka hre lo a, mahse, court in min koh chuan inlan turin ka kal ngei ang,” a ti a.

Khatih laia MSU General Secretary Lalremruata Chhangte pawhin Court lehkha in a barakhaih takzet niin TFD a hrilh bawk a, “Kan President PC Lalrinhlua leh Vice President R Lallawmsanga te’n min rawn bia a, Court atanga lehkha an dawn thu te an rawn sawi a, sorkar nen kan inrem niin kan hria a, hetianga thubuai kan nei leh ta mai hi mak kan ti a, amah [B Sairengpuii] hian kan lakah FIR a thehlut ami le ka ti hial a, mahse, police lamin thubuai an ziak lut a lo ni a. Mahse, Court in min koh ang hian inlan ngei chu ka tum,” a ti bawk.

 

MSU in B Sairengpuii bang tura an nawr dan

B Sairengpuii hi Mizoram sorkar atanga a pension hnu ah kum 2012-2015 chhung khan sorkar in PwD Commissioner ah a ruat a, a ruat hun chhung a zawh hnu ah kum 2015-2017 chhung a ruat nawn leh a ni.

Sorkar in B Sairengpuii tum hnih (kum 5 chhung) a rawih nawn chungchangah hian MSU chuan sorkar thil tih dan chu an duh loh thu thu chhuah hmang te, thuthar la khawmtute kawmin an lo puang tawh thin a, B Sairengpuii pawh a pisa ah kal chilhin bang turin an ngen a ni.

An ngenna a hlawhtlin tak loh avangin January 20 khan B Sairengpuii pisa kai tur chu an dang a, a tuk ni 21 ah kawngzawhin hemi tlai hian police te nen an innawr a.

Mahse, zirlaite hian an thil phut ber an hlawhtlin hma chu nawr an tum thu an sawi a, kawng an zawh tuk, January 22 zing dar 9 ah Vanapa Hall kawtah an pungkhawm leh a, dar 10 rik hma deuhin kawngpui an dang chat a. Dar 10:30 velah MSU leh ACCJSU hruaitute chu Social Welfare Minister PC Lalthanliana’n lengah sawmin an inbia a. Inbiakna ah hian sorkar hotute chuan B Sairengpuii chu PwD Commissioner atanga ban a nih thu an lo hrilh a, an banna lehkha pawh an lo pe a, hemi hnu hian zirlaite hian resolution pathum – PwD Commissioner atan rualbanlote dinhmun hria leh hna tlin tur rang taka ruat, police leh zirlaite innawrnaa hliam tuarte zangnadawmna pek, PwD Commissioner recruitment rules siam – an pass a ni.

 

MSU an intiam angin awm lo!!!

MSU-in B Sairengpuii rawih nawn an duh loh an aupui lai leh bang tura an nawr lai hian Mizoram sorkar ah pension tawh rawih nawn mi 10 chuang an awm a, hemi chungchangah hian MSU hruaitute chuan B Sairengpuii chu a langsar ber a nih avangin hma an la hmasa ber a, mi dangte pawh bang turin an nawr zel dawn niin an sawi a, an au hla ah chu pension tawh rawih nawn hian thalai lehkhathiam te hnathawh tur a dal thei tih a ni.

Mahse, kum khat leh thla nga a liam hnu ah pawh MSU te hian hma an lak thu hriat  ni lova, hemi chungchangah hian TFD zawhna chhangin MSU President RB Lalmalsawma chuan sorkar hnathawk pension tawh rawih nawn an duh loh chungchangah MSU chu a dinna ngaiah a la ding reng niin a sawi a, “Kan dinna ah kan la ding a, Fisheries Department Director SP Singh, kumin May 31-a pension-a chhuak tur pawh sorkar in November 30 thleng a pawhsei sak pawh zawm lo turin kan ngen a, mahse, Department lam atangin sorkar thu chhuak an dodal loh thu leh an thlawp zawk thu te, Director-a kaisang ngei tur leh a hnuai ami te pahwin an dodal loh zawk thu MSU pisa-a rawn lenga an rawn sawi avangin kan hmalakna chu kan tawpsan rih a, mahse, a hmaa kan sawi tawh angin MSU chuan pension tawh rawih nawn chu kan duh lo reng a, hma kan la zel dawn a ni,” a ti a.

 

MSU lungawi lo

Police-te’n zirlai hruaitu mi 12 thubuai an siamsak chu MSU General Secretary Lalthanzuala chuan tha lo an tih thu TFD a hrilh a, “B Sairengpuii a hna atanga chawl tura kan nawrna ah khan sorkar nen kan inrem a, chuti chunga police lamin kan hruaitu mi 12 te laka thubuai an lo siam hi tha lo kan ti hle a, tunah hian thut khawmna hun ka la nei lo a, hun remchang hmasa berah hemi chungchang ngaihtuah hian kan thu khawm ang,” a ti.

 

Thubuai  nei zirlai hruaitute

(MSU atangin): PC Lalrinhlua, R Lallawmsanga, Lalremruata Chhangte, Benjamin L Fanai, Lalengzuala Pautu, T Nengkhasut

(ACCJSU atangin): R Lalruatpuia, Samuel Laltlansangzuala, Malsawmsanga, Albert Vanlalchhanzuala, MS Dawngzeli, J Lalawmpuia

 

An thubuai awrh te

IPC 143 – Dan phal loha punkhawm

IPC 145 – Punkhawmnaa hmanraw ken

IPC 147 – Buaina siam

IPC 132 – Sorkar hnathawk tihbuai

IPC 353 – Tharum hmanga sorkar hnathawk ban luih tir

IPC 427 – Thil tih chhiat


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s