Dampa vengtu Dampa tichereutu

A bula mihring chengte’n an suat loh nan sorkar mi rawihin ramngaw an veng a ni ngai a, tunhnai ah erawh sorkar mi rawihin a suat loh nan ramngaw bula chengte’n an veng zawk em ni?

23ee45f4-43f6-492d-8180-3bc5fc4c9d70

Thla hmasa thla tawp lam khan Dampa Group YMA chuan hmanlai atang tawha thingtlu takngial pawh lak phal lohna hmun Dampa Tiger Reserve ah thingkit an awm ngei a ni tih report an dawng a.

Report bawhzui hian May 31 khan YMA hruaitute chuan reserve hmun thenkhat an en thlithlai ta a, West Phaileng khua atanga km 31 vela hla, Damparengpui piah, kawng atanga lang reng ah chuan thing zaina hnuhma an hmu ta a.

Chumi tum chuan chumi bak chu thingzaina hnuhma mita hmuh nei chiah lo mahse, an haw lamah YMA hruaitute chuan Forest Dept camp pakhat nghaktu chu an thu an zawt ta a. Reserve chhungril lam ah khawl ri hria an lo awm tawh avangin hre sa niawm takin camp nghaktu hnenah chuan an thingzai te chu khawiah nge an dah tih an zawt thut a, ani chuan, “Thla hmasa khan kan phur chhuak zo vek tawh,” tiin a chhang niin Dampa Group YMA President Lalramthanga chuan The Frontier Despatch (TFD) a hrilh a.

Hetianga thu an han hriat belh takah chuan YMA hruaitute chu Forest Dept-in an enkawl, Interpretation Bulding an tih ah chuan an kal nghal a, a chhungah chuan thingzai, Ngiaupui ft. 12-a sei (charchar) 112, cubic thing phek 30, thingzai (charchar) ft. 9-a sei 20 leh thingzai  (chartin) 15 vel an hmu a, hmun dangah ft. 12 leh ft. 8 vela sei inchi 5 bial thingzai panga, chartin leh charchar 10 vel an hmu ta a.

Group YMA chuan chiang zawka hriat tumin an bei chhunzawm zel a, Central YMA hruaitute chu a hmun tlawhpui ah sawm tum mahsela, Lunglei tlangval pahnih tualthih chungchangah Guwahati-a an zin lai a nih avangin Mamit Sub-Headquarters YMA hruaitute nen June 5 khan Reserve hmun dang tlawh turin an thawk chhuak leh ta a.

Dampa

Chumi tum chuan Phaileng atanga km 25 vela hla, Dampa camp, sanctuary chhung ril ami, kawng atanga kea darkar chanve vel kal chu an pan a. Ngaw chhungah chuan thingzaina hnuhma pakua emaw lai chu an hmuh belh ta a. Hemi tum hian YMA hruaitute chuan lungpui lakna hmun pawh chu tlawh nghalin gelatine fuse te leh suahdur te pawh an va hmuh belh ta zel a ni.

“Kan lo hre lo a, report kan dawn hnu hian chuan thal lai March leh April vel nge ni, khang lai pawh khan sanctuary ril lampang deuha khawl ri ruai ruai an hriat te kha an han sawi thar a. Chu chu tun hnu hian thingzai khawl hmanga an zai ri vel te kha a nia, thenkhat chuan sai nek aniang te an lo tia, sai sual an awm ve ziah bawk nen. Chung te an han sawi leh sanctuary chhunga IB piah lawka geleatine puak dup an hriat te, tin, anmahni motor ngeiin thingzai phura Teirei bul Interpretation building chhungah thing an dah tih te kan han hre chho ta zel chu a ni,” tiin Lalramthanga chuan hetiang thil a thlen dan hi a sawi a.

Dampa Gorup YMA President chuan, “Naupan lai atangin awareness kan dawn bera hi chu thing tlu a awm pawhin an tawih ang a, sava chaw ah emaw a chang ang tih a nih avang hian thing tlu te hi lak kan rilru ah a awm ngai lo hrim hrim a, han lak emaw zai emaw hi. Tin, thingro pahnih khat lek leh kawng laka mau pum hnih khat han sah leh ratuai han bal mai te pawh hi Range Officer te’n thikthu chhe takin an hmuh chuan an chhuhsak thin a. Chuti a nih laiin khawl hmang meuha thing an zai chu tia kan en a kan han hmuhchhuah khan anmahni department leh khami khawl neitu Phunchawng bawr vela mi khian Director-in a chah thlak dan leh an zai dan te kan hre ta zel si a. ‘Ekhai! A ni lo reng reng!’ kan ti a, vawi hnih kan thawk chhuak ta a ni,” tiin a sawi bawk.

Group YMA hian thil awmdan hi an tlangau pui ta a, hmalak a nih theih nan CYMA lamah thu an then zel bawk a. A hnu deuhah chuan Dampa Tiger Reserve Director V Lalfala’n intih hmingchhiat vangin thubuai siam a tum tih thu te a lo than tak zel avangin Dampa enkawltute zinga thu ber chu Dampa hmunah kal tawh lo turin an duh thu an puang chhunzawm ta a ni.

CYMA pawh hian hemi chungchang hi June 20 khan Chief Minister Lal Thanhawla hnenah an thlen a, Reserve-a thing leh lung lak chungchanga hrem ngai te chu hrem ni se tiin thu an thlen a.

ForestGuardPatrolling1

Dampa Group YMA lamin thu chhuah te an siam tirh phat khan Forest Dept chuan thil awmdan zirchiang turin Chief Wildlife Warden Liandawla chu Dampa-ah hian a lo tir tawh hrim hrim a. TFD thu dawn dan chuan Liandawla hian gelatine leh thingzai khawl te chu Reserve chhungah hman an nih ngei hmel thu te pawh a report a, engemaw thil dik lo chu a awm ngei niin a hriat thu te pawh sorkar ah a thlen a. Dan hnuaiah chuan Reserve, Sanctuary leh Protected Area chhung atang hian engmah, thing tlu them takngial pawh lak chhuah phal a nih loh avangin Dampa-a forest hnathawkte’n department hnuhma tih that nan leh chei nan an hmang a ni an tih pawh chu palzam chi a ni lo tiin sorkar pawhin chiang zawka chhui ngai thil a ni a ti a, June 20 tlai lam khan DP&AR chuan Dampa Tiger Reserve Field Director V Lalfala Dampa-a Range Officer PC Lalthantluanga pawh suspend a ni ve nghal bawk a, chhuichiang turin officer senior ruat a nih thuai a rinawm.

Hemi chungchangah hian TFD chuan V Lalfala chu sawi tur a neih leh neih loh a zawt a, mahse, ani chuan department-in thil an chhuichian vangin engmah sawi tur a neih loh thu a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s