Ramchung/ Hnamhnufual sipai pawl hmalakna hmasa, zirna in din

Tunhnai ah hnamhnufual Dalit te’n an pawl din, India danpui duangtu Dr B R Ambedkar-a hming chawia Bhim Army an tih chu tharum thawh chungchangah hmingchhia in an hotulu lung in ah tang mahsela, he sipai pawl thiltih hmasak ber erawh chu an hnampui naupang te’n a thlawna lehkha an zirna tur zirna in din a ni 

 

June thla Pathianni tlai lam a ni tawha, chuti chung chuan Saharanpur atanga km 20 vela hla a awm khaw tereuhte Budhakera Pundir-ah chuan a la lum hle tho mai.

In tawngtawl tawh tak a chhung zau ang reng tak chhuatah chuan naupang 40 bawr vel hi an thu far a, ni a intan dawn chauh ni mai-ah an ngai a. Kum 5 atanga kum 15 inkar an ni hlawm a, an sikul chu bang eng a ni a, a sir velah rawng pawl an hnawih thung.

Chu’ng naupang 40-te chuan an ziaklohbu chu an en ngar hlawm mai a, an bul vela thil awm pawh hrelo ang hmiah an ni. An hma a thuziahna phek var (whiteboard) an en zauh tih loh chu an khaw hawi a zim khawp mai. A sir leh lamah chuan chhiarkawp a belhna ni awm tak a awm a, a lehlamah thung chuan saptawngin thil a inziak a. Chu board var chungah chuan an sikul hming chu Bhim Army Nishulk Paathshala (A thlawna zirna sikul) tih a inziak a ni.

He’ng sikulte hi The Hindu chanchinbu in a tarlan dan chuan coaching centre an ni ber a, Saharanpur biala zirna tih hmasawnna atana hmalakna a ni a, Bhim Army hmu chhuaktu Chandrashekhar Azad (tunah chuan tharum thawh tura mi a fuihpawrh nia puhna avangin jail bang a zut mek) leh a thianpa Vinay Ratan-a’n kum 2015 a an ngaihtuah chhuah a ni a.

Headmaster hlui fapa Chandrashekhar (amah hi chu ukil a ni) chuan hetiang zirna hmun a din chhan hi hnam hnufual Dalit naupangte’n zirna hun an neih pawimawh lai taka hnufual bika an awmlohna atana a bul tan a ni.

Ama’rawh chu, thla hlui khan Saharanpur-ah chuan Bhim Army hian hnam hnuaihnungte rahbehna leh an chunga hleilenna dodalna atan nawrh an huaihawt a, he nawrhna-ah hian tharum thawhna thlengin Police lirtheite hal a ni a, chu chuan an pawl hmel hi a tibal ta hle a, zirna in a din pawh chuan sawisep a hlawh phah ta a ni.

He khua ah pawh hian tharum thawhna hian mipui rilru a luah nasa hle. An zirna in sawprawp ve tak hi Ambedkar Bhavan chhungah a ni a, hetiang hi chu Dalit khua-ah chuan a awm deuh ngei ngei a. He hall hi tinreng atana hman a ni ber a, inneihna atana an hman bakah intihhlimna atan te an hmang a, sikulah an hmang bawk.

Board vara thuziaktu hi kum 16 leka upa Rachna a ni a, a zirlaite rual deuh thaw lek a ni. Rachna leh kum 20 chuang awrha upa Nisha te hi zirtirtu ni tur hian an inpe tawp a, Maths, English leh Science an zirtir. Zirlaite hi pawl hnihah then phawkin pawl 1 atanga pawl 4 leh pawl 5 atanga pawl 8-ah an then.

“Dalit naupang tam zawk hian zirna tha an dawng lova. An luhna sorkar sikulte lah chu a tha lo hlawm hle a. Mimal sikul-ah chuan Dalit naupangte hi an che hleithei silo. Zirtirtute’n ngahsak heklo,” tiin chakloh hmel tak, mahse a mita tumruhna hmuh theih Nisha chuan a sawi a.

Sharanpur-a MG College-a a kum hnihna zir mek Nisha hi mimal sikul a zirtirtu Kanvar Pal Singh-a fa pathum zinga naupang ber a ni.

Sikul ban hnu-a inzirtir zuina hmun hi chawhnu dar 4 atanga dar 5.30 thleng kalpui thin a ni a. A hmasa ber chu July 2015 khan Fatehpur Bhado khua-ah din a ni.

Nisha sawi dan chuan zirlai tan hian an zir tan atanga kum 10 chhung hi a bulthut pawimawh a ni a. Chandrashekhar pawh hian naupangte hian pawl 10 an zawh hma a Maths, Science leh English zirna tha an dawn loh chuan an hma a thim hle tih a hre chhuak a. Paathshala hmasa ber din a nih hnu hian Budhakhera khua a Dalit hote chuan an khua a din ve an duh thu an sawi a. Sikul bul tantu zing ami hmuihmul ki van mai Satish Gautam chuan, “Kanvar Pal Singh-a kawt zawlah zirlai 30 nen bul kan tan a,” tiin a sawi.

Hapta hnih a liam meuh chuan zirlai 100 an tling tawh a, chuvangin an sikul hi Ambedkar Bhavan-ah an suan ta a. He sikul ruangam din lama a mawhphurtu bera ngaih chu Gautam hi a ni.

Kum 2015 khan Nisha chuan pawl 10 a zir zova, a pa kawt zawla zirlaite zirtir tura inpe hmasa ber zing ami a ni a.

“Paathshala a lokal apiangte chu ziaklohbu, pencil leh zirlaibu bakah zirna atana an mamawh apiang kan pe a,” tiin a sawi a. An tum ber chu a senso chu engzat pawh nise mi zawng zawng lehkha thiam tir a ni tawp mai a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s