Thingzik bula zawng dan ang

Kum hmasa lama furpui sulhnu vangin Aizawl leh Mizoram khawpui chhim leh khawchhak lama khua te chu kawng chhia in thliarkar ang maia a chhuah lohna’n ruahmanna awm mahsela, furpui a lo thlen leh meuh chuan tum angin eng a thleng ta lova, khawpui luhchhuahna chu ping vek thei dinhmunah a ding leh ta

 

IMG_7810

Nikum furpui avanga hmun hrang hranga chhiatna a thlen hnu khan Mizoram Police hotute rilruah Aizawl khawpui leh Aizawl atanga National Highway-in a pawh, khawchhak leh chhim lama khaw awm te chu leimin, lei tlahniam leh kawng tla bal in a dang chat reng thei dawn a nih hi tih ngaihtuahna a piang a.

A bikin Aizawl tan tlangtu leh chak lakna kawng pawimawh ber National Highway 54 hrula Rangvamual huam chhungah leimin lian tham tak te, Hunthar Venga lei tlahniam kawngpui dinhmun tiderthawng rengtu leh Edenthar ah kawng tlabal a lo awm lehzel avangin NH-54 atanga Aizawl khawpui tlak lama kal theihna kawng awmsa, Ramrikawn – Lungverh inkar chu ngaih pawimawh a, tihzauh a, siamthat a pawimawh thu police hotute chuan sorkarah an thlen ta a. Tin, Rangvamual leh Sairang inkar ni lo ah pawh NH 54 hi leiminin a tih buai theih tho avangin hman lai atanga kawng hman rim ber, Durtlang leh Kawnpui inkar kawng te pawh thuam tha turin a kawng enkawltu Border Roads Organisation nawr ni se tih te pawh an sawi tel bawk.

Hetianga police lam atanga rawtna – Special Report – a luh takah chuan sorkar pawhin a ngai pawimawh a, nikum December thla khan Home Minister R Lalzirliana hovin Co-ordination Committee on Traffic Management chuan Police rawtna chu a thlir hova, committee chuan Ramrikawn-Lungverh kawng thawm that chu a remti ta a.

Hemi atan hian Public Works Department chuan tender te pawh chhuahin contractor rawih a ni a, he hmalakna kawnga PWD Chief Engineer Lalmuankima Henry sawi dan chuan hna thawhna tur hian cheng vbc 9 lai dah hran a ni nghe nghe.

Amaherawhchu, kar hmasa ruahsur avang khan NH 54 chu a ping titih a, Aizawl pana lirthei tlan engemawzat chuan Lungverh leh Ramrikawn inkar kawng an han zawh chho ta a. Mahse, tam tak chu kawng leh lirthei chhiat azarah an kal tlang thei leh ta si lova, NH 54 lamah bawk an kir leh a, a then chu zanrei deuh tak thleng an tangkhang nghe nghe.

Tunkar khan he kawng hrula awm Sakawrtuichhun YMA hruaitu T Lanunzira chuan ruah a sur loh chuan lohtheih lohna avangin lirthei an kal tlang theih hram hram thu leh ruah a sur erawh chuan kalna chi rual a nih loh thu a sawi a.

“Keini tak pawh hi kan tih than thil a nih vangin Ramrikawn lam chu kan kal thei hram hram. Lungverh lam pan phei chuan kan kal ngai lo, kawng a chhe lutuk,” tiin a sawi.

Furpui avanga hetianga Aizawl panna kawngpui pawimawh ber a tlang mumal loh tuma kawng dang a awm theih nan tak hian a ni a police hotute’n Ramrikawn-Lungverh kawng siam that an rawtna chhan chu.

PWD hotute sawi dan chuan helai kawng siam tur hian contractor rawih nimahsela, rokhawlhna lian tham tak a lo awm reng a.

Pakhatnaah chuan, Ramrikawn-Lungverh inkar kawng hi zau zawka duan thar chu ruahmanna hmasa a nih rualin, a kawng hrul ram te chu mimal ram vek a lo ni a, kawng zauh a nih dawn chuan zangnadawmna pek tur a san dawn em avangin hmanhmawh taka furpui lo thlen hmaa hnathawh theih a ni dawn lo tih hriatchhuah a ni a, chuvang chuan kawngpui zau zawka siam tura ruahmanna chu a tir te ah pamtul a ni ta a.

Kawngpui zau zawk, truck te pawh an len theihna tura siam ai chuan lirthei te chi awlsam zawka kal theihna tur talin siam ni se an ti leh ta a. Chutiang tur chuan work order te pawh chu an duang a, kawngpui chu blacktop that a, tuihawk luan kawr te pawh siamthat ni se tiin ruahmanna an nei ta zawk a. Mahse, contractor thlan a nih hnu ah rokhawlhna dang a awm leh ta: khawpui hmun danga an hnathawh ang bawkin SIPMIU chuan helai kawng hi lai in pipe lian an lo phum mek chu niin. Kawngpui hetianga khawih danglam a nih takah chuan tum angin blacktopping te pawh chu kalpui theih a ni ta lova.

Contractor-in hma a la chak em em lo chu thuhran, tum aiin kawng siam hna chu a hautak leh tak si avang te in furpui ruahsur chuan tha zawka siam tum mek kawng chu zawh hleihtheih lovin a chhuah ta a, tunhnai ruahsur avang khan pipe phumna tura kawng an laih, pipe an phum hnua vur leh te pawh chu hmun thenkhatah chuan tuiin a hawrh nasat em avangin pipe pawh a lang hial niin Sakawrtuichhun YMA hruaitu T Lalnunzira chuan a sawi nghe nghe.

Hetih lai hian, Mizoram bungraw mamawh chi hrang hrang phur luttu lirthei lian te chuan NH-54 zawh thei tho mahse, leimin leh lei tlahniam avangin a hma anga chakin Aizawl an thleng thei lova. Aizawl an luh hnua an kawng zawh tam ber, Ramhlun leh Chanmari inkar kawngah ruahsur avangin lei nghet lo a lo awm takah chuan Traffic Police-in mipui him tlan zawk nan lirthei lian kal a khap leh ta a.

Bungraw pawimawh zinga pawimawh lehzuala ngaih, buhfai phurtu truck te tan phei chuan Sairang chhak lawk Ramrikawna Food Corporation of India kudam thleng turin khawpui hel chhuah parh a ngai ta a. Sairang atangin Bawngkawnah lutin Falkland lam an pan a ngai a, heta tang hian World Bank Road tia hriat lar, Aizawl bypass zawhin khawpui chhim tawpa Zampuimanga hriatrengna lungphun an thlen hnu ah hmar lam hawiin kawng an zawh leh a, Temple Square atangin Vaivakawn lamah liam thla in Ramrikawna FCI kudam chu an pan a ngai ta a ni.

Bawngkawn atanga khawpui chhung kawng zawha Temple Square kual atanga Ramrikawn thleng hi km 14 vel a nih laiin, tun dinhmunah chuan heng lirthei buhfai phur te hian Aizawl khawpui chhuah lam hela Ramrikawn an thlen nan hian a let hnih aia thui km 32 chuang hret an tlan a ngai ta a ni.

Map

Hetianga duhthusama kawng a tlang loh avang hian tunkar tir lam khan FCI hotute pawh an mangang ru hle a. Bairabi rel chawlhhmunah Mizoram mamawh buhfai a lo thleng reng a, Bairabia kudam lian, 5,000 Metric Tons lenna ah chuan 200 MT chuang emaw vel zetin a leng ta lova.

Truck-te’n Bairabi kudam atang hian buhfai chu phur chhuak ve reng mahsela, June 25 emaw, 26-ah emaw relin buhfai 1,700 MT lai a lo phurh thlen leh dawn avangin a chuangliam a tam hle rin a ni nghe nghe a, hmun hrang hrangah kawngchhia in truck tlan a tih tangkhang chu thuhran, FCI kudam lian ber Ramrikawna truck lut leh chhuak te chu khawpui leh a chhehvel kawng dinhmun that loh vanga an tangkhang zel bawk avangin ruahmanna siam a tul ta bawk niin The Frontier Despatch (TFD) chuan thu a dawng a. Tunhnai phei kha chuan kawng chhia leh no entry avanga ngaih theihin ni khata he kudam-a truck 20 atanga 30 lut reng thin chu a tlahniam nasa hle a, nilengin truck pakhat chauh a lut nghe nghe a ni.

Heti a nih vang hian police hotute hlauh ang ngeiin NH 54-ah lirthei kal dan a lo buai ta reng a, kumin ngei pawh hian furpui a zual zel chuan Aizawl chu, police hotu pakhatin a sawi dan takah, “thingzik bula zawng dan ang mai” in kan awm palh a hlauhawm ta.


One thought on “Thingzik bula zawng dan ang

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s