Cement man chungchanga buaina

MSU-in Aizawla cement hralhna chu a to uchuak tiin a phurluttute hralh theihna zat a bituk a, mahse, a phurluttute chuan tun aia hniamin an zuar thei ngang lo an ti thung. Sichar rate leh Aizawl rate inthlau deuh mahsela, an hlep tur te, chhiah hrang hrang te leh phurh man te chhutin Aizawl rate hi a awm viau niin an sawi a. Thu an inrem hleithei hrih lo.

 

Mizo Students’ Union (MSU) in cement company-te’n Mizo mipuite an bum nasat thu leh state danga an sum hloh hmuh kir nana Mizoram an hmang anga an sawi chuan tunlai titi a luah hneh hle a, cement man tur zat an bituk avangin Mizoram pumah cement a harsat phah bakah in sa lai a nghawng nasa hle.

MSU President RB Lalmalsawma chuan June 19 khan an pisa ah thuthar la khawmtute an kawm a, hemi tum hian Mizoramah cement company pariat an rawn luh thu a sawi bakah heng company te hian an cement te Mizorama phur lut turin “carry & forward” (C&F) an neih thu te, cement rate an zirchianna leh state dangte nena kan inthlauhna te, non-trade hoin an lei theihna zatte an khaikhin vek hnuah, Mizorama cement man a sang uchuak hle tih an hriat thu a sawi a, “Cement company-te hian chhun zan zawmin min bum reng a, state danga eng emaw chhiatna vanga an sum hlohte hmuh let nan min hmang nasa tih hi kan hmuh dan a ni,” a ti.

 

C&F chu engnge?

Carry & Forward hi Mizoram sorkar in kum 2004-a a siam niin cement company in an aiawha Mizorama an cement te phur lut tura an tih an ni a, heng mite hian cement that leh that loh ah te, a buk tlin leh tlin loh ah te mawh an phur a ni.

“Kan sorkar lai khan Mizoramah cement rate a mumal lo hle mai a, chu bakah pawlh dal a tam hle nia sawi a ni bawk a, sorkar chuan ngun taka kan ngaihtuah hnu ah Mizorama cement rawn lut company-te’n rate mumal tak an neih theih nan te, cement tha tak an rawn phurh luh theih nan C&F hi kan siam ta a, anni hian cement that leh that loh ah te, a buk tlin leh tlin loha ah te mawh an phur a, cement rate pawh mumnal takin an siam,” tiin khatih laia Supply Minister K Sangthuama chuan The Frontier Despatch (TFD) a hrilh a ni.

 

MSU thusawi cement leh rod zuarte’n chhang

Mizoram Cement and Iron Rod Zuar Association (MCIRZA) chuan thu chhuah siamin MSU-te’n an thuchhuaha cement lakna rate an ziah lan chu dealer-te’n commission and forwarding agent (C&F) hnuaia an lakna nen a inan loh thu an sawi a, MSU-in cement rate an tarlan chu C&F hnuai-a an lakna rate nen a insan hleih hle nia sawiin MCIRZA chuan, “Taxation department leh dealer hrang hrangte hnenah tax invoice en theih reng a ni,” a ti a; MSU leh cement company-te inkarah inremna a awm theih loh vanga mipuite’n harsatna an tawk chu pawi an tih thu an sawi.

MCIRZA chuan, MSU-in Taj Cement bag khat Rs. 360-a hralh chhuah theih turin an tarlang nia sawiin, “Hei hi thu belhchian dâwl lo a ni. MSU-in company dang zawng zawng a dan hnuah Taj Cement hi Rs. 400 chung lama zawrh vek a ni,” an ti.

Cement zuarte’n a tlawm thei ang bera hralh chu an duh ber a nih thu sawiin MCIRZA chuan, “Mizoramin kan cement mamawh ang hi company pakhat chauh chuan mi phuhrûk zo lo,” an ti a; sorkar chu a rang thei ang bera cement zuara eizawngte harsatna chinfelsak turin an ngen a ni.

 

Inbe hlawhchham

MSU in Mizorama cement man to uchuak an tih tihniam tura hma an lakna kal zelah June 23 chhun khan an pisa ah cement company aiawhte nen cement rate chungchang an sawiho a, hetah hian thutlukna mumal an neih theih loh avangin June 27-a inbe leh turin an inrem a.

June 27 khan inbe leh mahse, cement company lamin rate mumal an siam thei lo niin MSU thu chhuah chuan a sawi a, chuvang chuan rate mumal a awm theih loh avangin Mizorama cement rawn phurh luh an remti lo tih an sawi.

 

Cement bag khat Rs. 360?

MCIRZA in Taj cement bag khat Rs. 360 in MSU-in rate an siam nia an tarlan chungchangah MSU President RB Lalmalsawma chuan thu inhriat fuh tawk loh vang niin TFD a hrilh a.

“Cement bag khat Rs. 360 aia to lo kan tih chu C&F hovin bag khat Rs. 360 aia to lo in dealer te pe se kan tih chu an hre sual a, a zuartute rate kan siam sak lo a. C&F te’n bag khat Rs. 360 aia to loa dealer te an pek theih chuan dealer te lo hlep ve tur nen cement bag khat chu Rs. 400 aiin a to dawn lo tihna a ni a, hei hian nasa takin company-te’n mipui sum an eina a chhawk dawn,” a ti a, “Mipuite’n kan hriat miah loh awm thin bawk chu thawmhnaw company-te’n an thil siam hralhna man an titlawm (discount) thin ang hian cement company te pawhin an cement man an titlawm ve thin a, mahse, hei hi mipuite’n kan hre miah lo a, a zuartute’n an ei vek tih kan hre ru,” a ti bawk.

 

Bag khat Rs. 360 in pek theih loh: C&F

MSU in C&F te chu dealer te hnena cement bag khat Rs. 360 aia to loa pe tura a tih chu cement company hrang hrang C&F te chuan a theih loh tih TFD an hrilh a. Tunah hian Mizoramah cement company pariat – Star Cement, Max Cement, Valley Strong Cement, Amrit Cement, Dalmia Cement, TopCem, Taj Cement, Best Cement – an awm a, heng company C&F te chuan chhiah zawng zawng nen chuan Rs. 400 dawnin Aizawl an thlen niin an sawi.

 

Aizawl leh Silchar rate!

MSU sawi danin tunah hian Aizawla cement man chu Star Cement leh Dalmia Cement chu Rs. 460 vel, Valley Strong Cement, Max Cement, Amrit Cement, TopCem leh Best Cement te chu Rs. 440 vel, Taj Cement chu Rs. 390 vel niin an sawi a.

Silchar Mizoram House Dy. Resident Commissioner T Vanlalmalsawma’n TFD a hrilh dan chuan Star Cement chu Silchar ah Rs. 390 a ni a, Dalmia chu Rs. 385, Amrit Rs. 375, Valley Strong, Max cement te Rs. 370 leh Taj Cement Rs. 340 niin a sawi.

Aizawl leh Silchar-a cement man khaikhin chungchangah hian C&F te chuan khawpui pahniha rate te hi Rs. 50 chuangin a into hleih a, a phurh man te, chhiah nen phei chuan Aizawl chu a tlawm hle niin an sawi thung.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s