Gas duh em? Book mai rawh

Ramdangah kum thum chuang gas an home deliver tawh laiin Mizoramah chuan a la theih ve chuang lova, mahse, Supply Dept ruahmanna tharah chuan kar khatah vawi hnih tal distributor te’n semna point pakhatah an sem a ngai tawh anga, tin, phone, SMS leh internet hmangin a book theih tawh ang

20160922_092426

Thla hmasa tawp lam khan Mizorama eirawngbawlna gas sem thin Indane gas neitu company pui Indian Oil Corporation (IOC) chuan Aizawl khawpui chhunga distributor te chu mipuiin phone hmanga gas an lak (refill) theihna tur company-in a duan sa hmang vek turin a hriattir a, an hman loha distributor te laka complaint a luh chuan na taka hrem an nih tur thu IOC hian a sawi nghe nghe a.

Tun thla tir khan Supply Department chuan thu chhuah siam ve lehin Aizawl khawpui, District Headquarters tinah leh LPG distributor awmna khua ah te chuan phone emaw, SMS emaw, internet emaw hmangin gas refill chu a lak theih tawh ang tiin a sawi ve leh a.

Amaherawhchu, Supply Department chuan IOC-in ram danga a kalpui dan, consumer te inah ngei gas chu distributor ten an dah (home deliver) tur a ni tih chu kalpui nghal mai theih a nih loh thu sawiin tuna kalpui dan pangngi, hmun khatah a huhova sem chu kalpui rih a la ngaih thu a sawi thung a, “Online Booking la thiam lo leg engemaw harsatna avanga la ti ve theilo te tan tuna kan kalphung pangai hi hun engemaw ti chhung chu la hman rih a ni ang,” tiin.

 

Engvangin nge Mizoramah gas an la home deliver theih loh?

Home Delivery la kalpui nghal mai theih a nih loh chungchangah hian Supply Director Abhijit Vijay Chaudhari chuan hei hi distributor-te’n Aizawl khawpui anga chhuk chho tamna leh mipui te chu chenna in inhnaih leh bichilh tak taka an khawsak avangin home delivery harsa an la tih vang niin The Frontier Despatch (TFD) a hrilh a, chutih rual chuan distributor te chu tuna gas sem a nihna hmunah theuh te chawlhkar khatah vawi hnih tal kal kuala gas sem turin an tih thu a sawi thung a. Tin, hetianga zing zawka distributor-te’n gas semna hmun tin an tlawh pah hian refill book tu te chu an pe zat zat tur a ni ang a ti bawk.

“Khawpui chhungah chuan hmun kilkhawr tak tak te leh chhuk chho kalpawh harsa deuh a tam avangin distributor te hian home delivery harsa an ti a. Chutih rual chuan distributor te, NGO te leh consumer union mi leh sa te nena kan thut khawmnaah chuan IOC-in ramdanga a kalpui danah refill book tu te chu ni li chhungin refill pek tur an ni tih a ni a, tuna gas semna hmunah te hian distributor te’n chawlhkar khatah vawi hnih an sem zat zat a nih chuan hetianga ni li chhunga deliver zel tur tih kalpuina awmsa hi a phuhruk thei dawn a ni,” tiin Chaudhari chuan a sawi a, tunlaia thla khata vawi hnih emaw chauh gas sem a nih thin chu hei hian a tihziaawm viau a beiseiawm hrim hrim thu a sawi bawk.

 

Booking chu engvangin nge a pawimawh em em?

IOC leh eirawngbawlna gas enkawltu company dang te chuan kum engemawzat kalta atang khan ramchhung hmun hrang hrangah refill booking hi an lo kalpui tawh a. Hetianga an tih nachhan chu, mipuiin gas an mamawh zat chiang zawka an hriat theih vang a ni a.

Consumer-te’n an mamawh huna gas an book zat zat chuan an mamawh ngei a ni tih a hriat a, mamawhna ang  zelin company chuan gas cylinder chu a pechhuak thei ta a. Mamawh ang zat zel chauha gas cylinder pek chhuah a nih vang chuan nasa takin distributor leh a phurtute’n gas cylinder an lo tihchingpen thin chu a tihniam niin a hriat a, company te pawhin mamawh aia tam an pekchhuah loh avangin hralh ruk (black market) pawh a tlem phah nia sawi a ni bawk.

Hetianga changtlung zawka gas sem a nih theihna tura hmalatute zinga mi officer pakhat, a hming leh nihna puanzar loh ni se tia ngen tu chuan TFD hnenah hetiang hian a sawi: Consumer te’n an mamawh hunah emaw, an gas cylinder a zawh dawn hnaih ah emaw an book zat zat chuan dan phut anga consumer ni lo te hnena distributor-te’n black-a an hralh thin nia rin theih chu a titlem anga. Tin, tuna gas semna hmunah te kar khatah vawi hnih an sem ziah chuan gas a vang lo tura ngaih a ni a, tunah hi chuan sem hun bituk pawh a awm lem lo a, gas ah mipui an hnianghnar zawk hrim hrim bawk ang, a ti.

 

Mipui kan pawimawh ta ber mai!

Hetiang tho hian Mizoramah pawh mipuiin gas refill an mamawh huna an book zat zat chuan gas tihchingpen leh tualchhunga black market awm chu tihbo theih a rinawm thu Supply Director chuan a sawi a, “A pawimawh ber chu mipuiin phone emaw, SMS emaw, online-in emaw  booking an tih a ngai,” a ti.

“Mipui nawlpui tih thin dan a nih loh avangin thenkhat chuan booking tih hi harsa an ti deuh maithei a, mahse, thil harsa a ni lova, vawi hnih khat an tih tawh chuan an thiam ngei ang a. Tin, mi pakhatin a book thiam tawh chuan a chhungte leh a thenawm te a zirtir ve thei ang a, an mamawh hunah gas chu an book thei ang a, rang takin refill an hmu thei tura ngaih a ni. Gas book dan zirtira video te pawh kan siam a, social media hmanga thehdarh turin ruahmanna kan siam bawk,” tiin Supply Director chuan a sawi.

 

Book ta ila, distributor te’n refill min pe si lo se?

Chaudhari sawi dan chuan, mipuiin gas refill an book tawh phawt chuan an book tawh tih record a awm dawn a, distributor te’n refill an pe zui lo a nih pawhin record awm tawh chu department-in District Civil Supplies Officer (DCSO) te kaltlangin a hmang tangkai thei ang a.  DCSO te chuan distributor-ah emaw, IOC-ah emaw refill book tu te’n refill a hmuh tak loh thu an thlen thei ang a, refill an pek loh chhan te an zawh bakah pe ngei turin thu an pe thei ang a. Tin, refill pek theih loh chhan tha tak a awm a nih chuan chu buaina chu chinfel vat a nih theih tur thu a sawi.

 

Eirawngbawlna gas-a inbumna lian tak

Eirawngbawlna gas chungchang hi TFD chuan September 30, 2016 khan a lo ziak tawh a, Mizorama Gas Distributor 50 te chuan IOC hnenah chhungkaw tinte chu an kawngkhar ah eirawngbawlna gas an pe vek (home deliver) niin an insawi bakah gas te chu SMS leh internet kal tlangin mipuite’n an chah a, hei hi ni hnih chhungin an pe deuh vek niin an insawi a, IOC pawhin Mizorama eirawngbawlna gas distributor te chu an ti tha tiin 5-star rating a pe vek a,  ramchhungah Mizorama gas distributor te chu titha ber nihna an chang phah hial a ni.

Gas Distributor-te’n chhungkaw tin te an kawngkhar thlenga gas an pêk thu IOC hnena an report chungchang hi thu dik lo a nih avangin Silchar-a IOC hotute hnenah hekna vawi engemaw zat a awm tawh nghe nghe a, hei vang hian Silchar-a IOC hotute chuan Distributor pahnihte chu showcause notice a pe nghe nghe.

Gas semtute’n veng tina gas an sem thinah hian chhungkaw tin lak zat an chhinchhiah a, hei hi IOC hnenah an report a, he an report hi TFD chuan a chhui chiang tawh bawk a, chhungkaw tam tak chu gas an lak zat aia tam la anga chhinchhiah an ni a, hei hian eirawngbawlna gas chu dan loa hralh a tam phah a ti rinhlelhawm hle bawk.

Veng hrang hranga chhungkaw hrang hrang in an gas lak dan an consumer card-a distributor te chhinchhiah dan leh IOC-a an report dan TFD in a enfiahna ah chuan chhungkaw tam takte chu a taka gas an lak zat aia tam la anga chhinchhiah an ni a, bur 8 la te chu bur 10 la anga chhinchhiah an ni.

 

SMS hmanga gas book dan:

Step 1 – Registration: 9089024365 ah hian hetiang hian SMS thawn tur a ni: IOC Space

STD Code+Distributor Telephone Number*> Space <Consumer number>. Entirnan, I distributor chu Kapliana Indane Agency (2325744) a nih a, I consumer number QX12345 lo ni ta se la, heti hian SMS thawn tur a ni IOC 03892325744 QX12345

Step 2 – Booking: No. 9089024365 ah tho hian SMS <IOC> tih hi thawn mai tur a ni.

 

Telephone hmanga gas book dan:

(1) Landline/mobile phone atangin ph. no: 9089024365 dial la, Hindi i duh chuan 1(One) hmet la, English I duh chuan 2(Two) hmet rawh. In distributor landline number dial rawh. IVRS chuan i distributor agency hming a rawn sawi chu a dik tih confirm nan 1 (One) hmet leh ang che.

(2) I consumer number hmet la. Entirnan: I consumer number chu 12345 anih chuan 12345 hmet la, QX12345C anih chuan 12345 chauh hmet ang che. IVRS in I consumer number a rawn sawi nawn chu ngun takin lo ngaithla la, a dik chuan confirm nan 1(One) hmet leh ang che. I consumer number I confirm zawhah vawikhat tal gas I book ngei tur a ni. Gas chu i book rualin i number ah chuan reference number (gas lak theihna tur) a lo thleng ang.

Heng hunah te hian SMS I dawng thin ang:

(a) Gas I book apiangin; (b) Cash memo print a nihin; (c) I gas book chu a lo thlenin; (d) I gas book chu engvang pawha cancel a nih in.

 

Internet hmanga gas book dan:

Internet (online) hmanga gas Book tur chuan https://indane.co.in/consumerlogin.php ah luh mai tur a ni.

 

*Mizoram hmun hrang hrang a distributor te phone number chu hetah hian a hmuh theih e – http://mizorampds.nic.in/service-providers.htm


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s