“Min pension tir hma-in thu min zawtfiah hmasa lo”

MCS officer te zinga officer senior ber ni thin, a pianni thlak dana thil felhlel awm avanga sorkarin a pension tir tak leh a pension hnu-a MCS officer engemawzatin promotion an hmuh phah chhan chuan Mizoram sorkar chu Gauhati High Court-ah a khing a, court chuan sorkar hian hma a lak dawnin insawifiahna hun a pek loh vangin a khinna chu chhang turin a ti

FB

Kum 2014 khan Mizoram sorkar chuan Mizoram Civil Service officer senior ber ni thin B Lalhmingthanga’n a dil angin official record-a a pianni thlak danglam a phalsak a, hetianga a pianni thlak a phalsak hnu hian B Lalhmingthanga service hun chhung pawh kum thumin a sei phah ta a.

Mahse, seniority-a a hnuai chiah ami MCS officer H Laizika’n pianni thlak chungchang hi nikum kum tawp lam khan a sawisel avangin sorkar chuan B Lalhmingthanga kum thlak danglam a lo phalsak tawh chu a sut leh a, a pianni hmasa zawk chu ring lehin a pianni hmasa zawk anga a pension hun tur pelh chhung, thla sarih emaw chhunga sorkar hna a thawh chu “deemed extension” angin a pawm sak bawk a, kumin February 6 khan chawpchilh takin a pension tir ta zawk a ni.

MCS officer senior ber a pension takah chuan a pianni thlak dan sawiseltu, MCS officer zinga senior ber dawttu ni thin chu a kaisang ve leh a, ni ruk chhung chu sorkarah Secretary a ni ve hman a, a pension ve leh ta bawk a.

Hun bichilh tak chhunga MCS officer pahnih an pension takah chuan MCS officer tam tak an kaisang chhunzawm ta zel a. Mahse, June 1 khan B Lalhmingthanga chuan a pianni thlak phalsak tawh sorkarin a phalsak leh tak loh avangin sorkar leh a pianni thlak dan sawiseltu H Laizika chu Gauhati High Court-ah a khing a, a hna a kir leh a dil bawk a, HC chuan July 7 hian B Lalhmingthanga khinna chhang turin sorkar a hriattir ta a ni.

Ukil pasarih a rawihte zinga an hruaitu ber S Borgohain-a’n High Court hma a sawi dan chuan B Lalhmingthanga hian sorkarin a pianni thlak a phalsak tawhna a sut leh chu a ngaithiam lo hle a, a pension hnu lawk khan Chief Secretary ah a zualko a. Mahse, DP&AR (General Service Wing) chuan a zualkona hi chhangin a pianni thlak dan chu Union of India vs Harnam Singh case-a Supreme Court thutlukna leh sorkar dan dinglai kalh a ni a, chuvang chuan pawm chi a ni lo a ti a.

Borgohain chuan B Lalhmingthanga pianni thlak hi sorkarin a lo phalsak tawh, seniority-a a aia hniam officer pakhatin a lakah complaint a thehluh vang chauha sorkarin a sut leh thu te a sawi hnu in, hetianga a pianni thlak phalsak anih tawh sut leh anih hma hian B Lalhmingthanga hi a ngaihdan zawtfiah hmasa lovin lovin pension tir a ni ta thut a, hei hian rorelna dik a kalh tlat a ni a ti a, Supreme Court meuh pawhin zawhfiahna siam hmasa lova hmalak mai hi a lo phalloh tawh thin thu leh India danpui Article 311(2)  kalh anih dan te a sawi a.

DP&AR-in B Lalhmingthanga a chhanna lehkha ah pawh hian Supreme Court thutlukna sawi tel ni mahsela, Supreme Court-in Union of India vs Harnam Singh case-ah thutlukna a siam pawh khan kum hmasa lamah Supreme Court tho in State Of Assam & Anr vs Daksha Prasad Deka & Ors case-a thutlukna a lo siam tawh chu a dah pawimawh thu Borgohain chuan a sawi bawk a ni.

Zawhfiahna awm hmasa lova B Lalhmingthanga a pension tir avang hian Borgohain chuan DP&AR hmalakna chu a dik lova, chuvang chuan DP&AR-in a pension tir na notification chu paihthlak a ni tur a ni tiin ngenna a siam a.

High Court-a he thu ngaihtuah tu Justice M R Pathak chuan Borgohain thusawi te hian awmzia a nei a, chuvang chuan sorkar hian chhanna thehlut ve rawh se a ti a. Nimahsela, B Lalhmingthanga’n interim order chhuah tura a ngenna erawh chu phal anih chuan amah hi sorkar hnathawk anga lakluh leh a ni ang tluk anih dawn avan  gin phal chi a ni lova, sorkar a khinnaah a chak anih te chuan la ngaihtuah that leh zawk tur a ni tiin June 2 thupek a siam.

 

B Lalhmingthanga’n a service kum a thlak dan

Kum 1986-a MCS officer ni tura inziak tling B Lalhmingthanga hi a tirah chuan June 6, 1956-a piang angin a inziak a, mahse, November 11, 2014 khan sorkar chuan B Lalhmingthanga pian kum chu amahin a dil angin June 6, 1956 ni lovin June 6, 1959 angin a lo pawm a.

The Frontier Despatch (TFD) chuan November 18, 2016 khan PWD CE pakhatin a service kum thlak danglam a tum dan leh Mizoram sorkar hnathawk meka service kum thlak danglam chungchang a ziak a, an zingah hian B Lalhmingthanga a tel ve thu te, sorkar hnathawkin an service kum thlak danglam an duh chuan service-a an luh atanga kum nga chhungin dilna thehluh theih a nih thu te, B Lalhmingthanga’n a service kum thlak a dil a hlawhtlin chu service-a a luh (1986) atanga kum 28 hnu a nih thu leh hei hi Supreme Court leh sorkar laipui dan kalh a nih thu ziah lan a ni.

Hemi chungchangah hian TFD zawhna chhangin B Lalhmingthanga chuan engkim dik taka a tih thu leh sorkar in service kum dik lo  thlak dil duh tan dilna hun a hawnah a dil ve a, a dil anga phalsak a nih thu a sawi.

1986 – MCS a luh kum

June 6, 1956 – MCS a luh tirha a pianni in ziah dan

June 6, 1959 – A pianni thlak dan

Kum 3 – A pianni thlak dilna phalsak anih vanga a service pawhsei anih dan

2014 – A pianni thlak dilna sorkarin a phalsak kum

28 – MCS a luh kum leh a pianni thlak phalsak anih inkara kum tla zat

 

Sorkar in a pension tir dan

TFD in November 18, 2016-a sorkar hnathawk pianni thlak an awm  chungchang a ziah ni hian MCS officer kaisan theihna sang ber dawttu, Supertime B officer-a senior ber H Laizika chuan DP&AR Secretary hnenah TFD chanchinbu behchhanin an pu service kum ennawn a dil ta a.

Sorkar chuan ngun taka a ngaihtuah hnu ah B Lalhmingthanga pianni chu June 6, 1956-ah pawm lehin February 6, 2017 khan pension in a chhuah tir ta thut a, July 1, 2016 leh February 6, 2017 inkar chu a service pawhsei sak (Deemed Extension) tiin a ngaihsak ta a ni.

 

Court-a zualko tum lo, zualko leh si

Sorkar in February 6, 2017-a pension-a a chhuah tir thut chungchangah hian February 10, 2017 khan TFD zawhna chhangin B Lalhmingthanga chuan February 6 khan sorkar-in a pension tirna lehkha hi a hmu tih sawiin, “Thuawih takin ka pension ta mai a ni” a ti a.

A service kum thlak phalsak vek tawh hnua phalsak leh loh chungchangah hian lungawi lohna a nei lo a, tun dinhmunah chuan Court-a kal tumna pawh a nei rih lo niin a sawi.

Mahse, a hnaa kir leh phuta Court-a a zualko chungchangah hian TFD in B Lalhmingthanga biak a tum chu telephone a chhang lo a ni.


One thought on ““Min pension tir hma-in thu min zawtfiah hmasa lo”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s