Ramchhung/ Narendra Modi: An sawi ang teh ual a ni lo reng em?

Khawvela magazine chhiarhlawh leh rinkai ber pawl The Economist chuan tunkar tira issue a tihchhuahah Prime Minister Narendra Modi chu phek hma thu ah hmangin, thuziah engemawzatin a chanchin hrang hrang a chinglet a. Sakhuana thila puhmawh anih dan te chuan hriat an hlawh tawh hle a, mahse, ram ei leh bar dinhmun (economy) a enkawl dan a chhuichhianna ah chuan he magazine hian Modi chu eng teh vak hlawhtlinpui lo anih bakah kalphung pawimawhte siamthat aia larna khel chauh ah a puh a ni

 

Kum 2014-a India Prime Minister nihna a chelh hlim khan Narendra Modi chungchangah hian ngaihdan a phir nasa hle a, ram ei leh bar dinhmun siamtha tur angin inlantir mahse, Hindu firfiak tak ni si, chinghne beram vun sin angah mi tam takin an ngaih laiin thenkhat chuan a letling thawkin an ngai a ni.

Ni e, Modi hian sakhaw thil pawh a zen thuk viau mai a, India rama mihring tamna ber state Uttar Pradesh Chief Minister atana a ruat chu Hindu puithiam ruh tak a ni.

Chutih lai chuan a hun chhung hian India ram ei leh bar (economy) thanna san ber hun a thleng a. Kum 2013 a ram ei leh bar dinhmun sanna kha 6.4% a nih laiin 2015-ah chuan 7.9% ah a zuang dawrh mai a, India chu khawvel ram zawng zawng zinga economy thang nasa ber a ni ta a. Kum tam tak chhunga economic reforms thanthu tlat chu a nawr tlang a, ram pum huapa chhiah lak dan thar leh ram pum huap GST a nawr tlang ta bawk a. Ramdangin India ramah investment an rawn ti nasa hle a, a invawrh chho dawrh a ni ber e.

 

India vanneihna: Tuialhthei man tlahniam

Amaherawhchu, hetiang hi a lan dan a nih laiin a tak takah chuan harsatna a tam mai a, thil tha a tih tawh nia langah te pawh hian a ruk tak chuan a vanneih vang te pawh a ni pakhat.

Vanneihna lian ber chu khawvel pum huapa tuialhthei man a tlahniam hi a ni a. A tlangpui thu in May 2014 atang khan tuialhthei man hi a tla ta char char a, tunah chuan barrel khatah US$50 emaw chauh a ni tawh. India hi ram lian zingah chuan tuialhthei lei nasa ber pawl a ni a, tuialhthei man tlahniam hian GDP pawh hi 1-2% velin a tisang ngawt mai a ni ber a. Modi hian hetianga tuialhthei man tlahniam hi a lo hmang thiam viau a, subsidy te a ti tlem a, India economy pawh 7% velin a thang zar zar a. Mahse, ama Minister te ber chuan India-a kumtin mihring maktaduai khat vel hnathawk thar tur lo hip zo zel tur chuan economy hi 8-9% in a than zat zat a ngai dawn an ti thung.

 

Rorelna muangchan vangin bank te’n sumdawngte sum puk tir ngam lo

Hmalakna thenkhat chuan awmzia a la neih chhoh zel hmel. Entirnan, sum leh pai tlakchhiatna vengtu tur dan thar chu awmze nei tura ngaih a ni a. Mahse, India ah hian judiciary hi a thawk chak lem lo a, tunah hian court hmaah thubuai maktaduai 24 zet a tang mek a, 10% emaw chu kum sawm aia tam ngaihtuah an ni tawh. Hetiang a nih vang hian rorelna a kal chak lo va, bank te pawhin company thenkhat, an sum puk rul thei lo te bungraw chhek khawl pawh an chhuhsak thei ta mang lo. Hei vang hian kum sarih emaw lek kaltaa bank te’n sumdawng te hnena sum an puktir chur chur thin kha tunah chuan a awm ta mang lova, kum 30 chhunga hetiang thil thlen hmasak ber tum a ni.

 

Goods and Services Tax: mipui mamawh aiin chhiah lak zat dah pawimawh zawk a nih phah ang em?

GST pawh hi July 1 atanga a taka hman a nih hunah engang taka tha nge a nih a hriat chauh dawn. Ram tam tak chuan sumdawng thenkhatin kum khat chhung lekin an sumdawn dan report chipchiar (returns) sang chuang thehluh ngai chu tha an ti kher lovang.

Mahse, India chuan tha a la tih a ngai maithei. GST hman tan a nih hunah chuan ramchhung leh tualchhung hmun tin maia maimawm ril anga chhiah lakna dan awm mek hi thlakthleng a nih dawn avangin sumdawng tam tak chuan kum khata filing 37 lai an neih phah tur chu pawi an tih loh phah maithei. GST hian state leh state inkara checkpost te a nuaibo tura ngaih a ni a, bungraw phur lirthei te pawhin awlsam zawkin an thlen tum ram an thleng zung zung thei tawh ang.

Amaherawhchu, he chhiah lakna dan thar hian ken tel a nei tho mai. Ram tam zawk chuan goods (bungrua) leh services (hnathawh) te atanga chhiah lakna tur hian rate khat an nei mai a, India thung chuan rate chi ruk neih a tum mauh mai a, heng rate te hi bial (zero) atangin 28% inkar an ni hlawm ang.

Sorkar hnathawk hotulu te chuan lu sukna shampoo te, bang tuam mawina wallpaper te leh thil dang dang te chu nitin mamawh piah lam, nuam tawlna nia ngaiin tax rate 28% chawi turin an ruahman a. Mit hnawih dumna eyeliner te, tui in tur te leh chawhmeh siamna curry paste te pawhin chhiah 18% an chawi ang a, chawlhna hotel te’n 5% atanga 18% an chawi bawk dawn a ni.

Modi-a’n thuneihna a chan atang khan mi tam tak chuan India economy ah chakna thar a lo piang leh turah an ngai a, mahse, GST hi hemi ni thei tura hmalakna kawngah chuan duhthusam awm loh ber zinga chhiartu an awm nawk ta. Economist tam tak chuan GST awlsam tak, sumdawng te pawh mipuiin an lei duh zawng siam tura nawr thei tu hi a that ber an ring thin a. Mahse, tuna GST duan hi chuan sumdawngte chu chhiah chawi tlemna thil siam turin a nawr zawk an ring a. GST awlsam tak chuan India GDP hi percentage point pahnih emaw in a tih san rin a nih laiin, tuna sorkarin GST a duan hi chuan chumi zatve a phak ring lo an tam ta mai a, a tam ber chuan GST hian sumdawngte a tihbuai viau an ring bawk.

 

Pawisa note lian tih thih

Modi hi a huaisen lo a ni hauh lo. Ram ei leh bar dinhmun siamthatna atan nia sawi a hmalakna pakhat pawisa tlang lian tih thih chu a huaisen thlak viau, mahse, hmalakna huaisen a nih vangin hmalakna tha leh awmze nei a ni kher lo. Rah tha aiin rah chhia a chhuah zawk a. Dik taka sumdawngte’n nasa taka an tawrh laiin dik lo taka sum la lutte erawh chuan an tuar nep hle thung. Hemi avang hian India ram economy dinhmun than a thu tan a. Kumin kum bul atanga thla thum chhunga a thanna chu 6.1 % chauh a ni a, Modi-a sorkar hmaa thanna aiin a hniam zawk a ni. Mak tak mai thung chu, sumdawng te reuh te te neitu te leh kuthnathawkte’n pawisa note lian tih thih vang hian an tuar nasa em em a, sum indaih lohna a nasa hle a. Mahse, inthlan a lo hun meuh chuan BJP an vote leh dual dual tho a, a chhan ber nia lang chu an ni aiin misual te’n an tuar nasa nia an ngaih vang a ni.

 

Huaisen ngaihna tak takah huaisen leh si lo

A buaithlak lai ber chu, Modi-a hi economy siamtha tura huaisen a ngaihna lai berah a huaisen leh ta tlat thin si lo hi a ni. Vote a zawn lai chuan ram mamawh siamchhuaktu company lian te chu mimal kutah a dah vek tur thu a sawi piap piap a. Mahse, sorkar company lian pui pui, condom atanga leh India sipai te takngial pawhin an lei duh loh jet fighter siamchhuaktu te chu a ngai ang pat in an la awm zel chu a nih hi.

Modi-a hi India sum leh pai kalhmang siamtha tur phei chuan a huaisen lo hle. Sorker thuneihna bank te chu India-a bank awm zawng zawng 70% lai an la ni a, an zavai deuh thaw hian buaina an tawk zui. A chhan chu, sumdawng lian pui pui, hlawkna tak tak awm si lo siamchhuaktute hnenah sum tam tak an lo puk tir tawh a. Loan 20% lai chu heng sumdawng te hian an rul thei lova, sumdawng te lah hian insiamthat an tum lem lo bawk. Sorkar hian hun rei tak he dinhmun hi an hre tawh a, mahse, eng teh ual a la ti chuang lo.

Hei vang hian a nia tunah hian sumdawngte hnenah bank te’n sum puk tir an hreh em em nachhan chu.

 

Sumdawnna tan theihna tura mamawhte phurhruk thei lo

Ram, hnathawk leh sum mamawh te phuhrukna tur hian hmalakna lian tham sawi tur a awm lova. Company te’n sumdawnna atan ram an mamawh a nih chuan state sorkar ram neitu an tlawn a ngai a, an tlawn fuh loh hlauh phei chuan court ah kum sawm chuang zet thubuai rem tumin an tang thei a. Tunah chuan state tina Chief Minister te hian hman lai ang thovin ram pekchhuah chungchangah thu an la nei em em a, hei hian CM te chu thamna phut thei dinhmunah a dah reng a. Modi-a hian a tir lam khan ram hralh danah hmalak tum mahsela, eng teh ual a ti ta lem lova, a tawpah chuan state kutah bawk a hlan leh a, an zingah hian tlemte chauhin hmalakna an nei tawh.

Hnathawkte chungchangah hian sorkar laipui dan chi hrang hrang 40 chu fuan khawm a, dan pali ah hlawm luh vek tum mek a ni a. Mahse, hnathawkte hna thawh tur pe thei ber tute company lian te chetna dal tu ber dan te erawh tih tawp tum thawm a la awm chuang lo.

Tunah hian India hnathawk zawng zawng zinga 10% chauh factory lian an tih, hnathawk 200 chuang thawhna hmunah an thawk a. China ah chuan hnathawk zawng zawng zatve lai chutiang factory lian ah chuan an thawk.

Oxford University-a thawk, Vijay Joshi chuan, “Hnathawkte hi India thil ngah ber a ni a, hnathawhna tur siam chur chur hi thil tihawm ber a ni. Mahse hei hi a thleng lem lo,” a ti.

Hna thawh tur siam ai mah chuan zirna tihthat hi a pawimawh zawk a, mahse, India-ah hian zirna a changtlung lo nasa hle a. Heti si hian zirna tihthat tumna hi a awm hranpa lova, hmanlai ang thovin tunlai hian zirtirtu tam tak chuan thamna nen ban an nih theih lohna hna an zawm chur chur tho.

Sumdawngte sum mamawh puktir lamah pawh hian hmasawnna hmuh tur em em a awm chuang lo: bank te hian an loan pekchhuah zawng zawng 40% chu lo neitute leh sumdawnna te reuh te te hnenah an pek a ngai a, hei bakah hian bank loan zawng zawng 20% chu sorkarin a duh dan danin a pekchhuah tir thei bawk a. Bank in hlawk a tih te chuan 40% chauh an chang ve ta tihna a nih chu.

 

Ram kalphung siam danglam tak tak si lovin sorkar hmalakna te reuh te te puangzar reng

A tawi zawng chuan, Modi-a hian policy tha lo avanga thil thleng te siamthat a thiam a, mahse, policy tha tak duan erawh a la thiam chiah lo a ni ber awm e. Kawlphetha hi entirna tha tak a ni: Modi-a chuan mipui sum tam tak sengin ba ngah em em power company te a chhanchhuak a, hetia a tih nachhan ber chu thingtlang lama kawlphetha pekchhuah tir a tumin an tih theih loh phah vang a ni a. Mahse, heng kawlphetha siamtu company te hian hlawkna an la nei miah chuang lo, lo neitute hnenah a man awm lova kawlphetha an la pek zel vang leh kawlphetha lo pawt ru tute an hrem ngam loh vangin. Enge a chhan? Ele, politician te’n an vote an la duh miau hek.

Hetianga kawlphetha siamtu company te’n hlawkna an neih loh vang hian duh ang thal in company dang te’n kawlphetha an hmu thei lova, tunah hian India-a company 40% te chuan anmahni hman tur kawlpheth an insiamchawp a ngaih phah.

Indian Railways hian tunah hian hmun hrang hrang atangin sum a hmu zel a, mahse, politics thil avangin zinmite hnena atangin fare tlemte bak a la lova. Hei vang hian bungraw phurhna man tihsan reng a ngai a, rela bungraw phurh man a san em avangin company tam tak chuan rel aiin kawngpui leh truck hmanga bungraw phurh an duh zawk a. Tunah hian India-ah hian bungraw phurh man hi ram dang nena khaikhin chuan a let li emaw laiin a sang zawk.

India Prime Minister hian liantham taka thil kalhmang siamthat ai chuan sorkar hmalakna te tak te te phawrh reng hi a tuipui zawk a, kum thum emaw chhung lekin hetiang hi 100 chuang a awm tawh a, hmuhmaih theih rual pawh an ni hlawm lo: a tlangpui thu in chanchinbu leh media te, kawngsir a billboard lian tak takah te Modi thlalak nen puanzar chuai chuai an ni deuh ziah.

Sorkarin a theh lar em em “Make in India” tih hi entirna tha tak chu a ni awm e – hei hian India chu foreign company te tana sumdawnna hmun tha a ni tiin a puang a, Modi-a leh ramdang sumdawng lian te chuan thla an la ho chuai chuai a, mahse, foreign company te hnathawh awlsam zawk theihna turin eng the ual mah siamrem a la ni chuang lova, World Bank phei chuan khawvel ram hrang hranga sumdawn awlsam dan a tehna ah India chu 130-na ah a dah heu mai.

Hetiang avang hian sumdawnna a thang thei tak tak lova, tunah hian US$ maktaduai 125 chuang man  bungraw hralh company 270 emaw chauh India-ah an awm a. Brazil-ah chuan 1,295 an awm mek a, Russia-ah 3,430, China-ah 7,680.

Modi-a tan tute chuan hetiang sorkar hmalakna te tak te te hian India economy kalhmang a thlak danglam dawn an ti tak na a, chanchinbu-ah te a chhuah hnu chuan heng hmalakna te hi hmuh zui tur a awm ngai vak lo. Kum 2022-a Indian maktaduai 500 chuang hnathawh dan tha zirtir tumna (skill development) chu hluihlawn a ni der tawh a, mimal sumdawng leh sorkar thawhhona hmanga ram mamawh thil sakna tura pawisa cheng tlunklehdingawn sangkhat hmun 400 (Rs 400 billion) dahhran (fund) ah lah chuan tuman hmalak an la tum hek lo nia sawi a ni bawk.

Sorkar hotu lian pension tawh pakhat chuan, “He sorkar hi chu thil thar pakhat atangin thil thar dangah a zuang lawr zel a, a sulhnu a chhui let tak tak lo,” a ti hial a.

Modi-a sorkar beihna hi a tam tulh tulh a, ani lah chuan a Minister te pawh rawn lovin a hnaih em em mi tlemte te chauh a rawn zel thova, tuman a thiltum tak tak an hre chuang lova. Beihna pung zel mahsela, sorkar chuan hei hi tih tak tak tumna nen nilovin mi nawlpui lawm zawng tur chauhin a chhang let zel chu a ni.

May thla khan bawng humhlahna turin dan siamthat te a ni ta hial a, mahse, hei pawh lawisa ramdanga thawn chhuaka sumdawnna thang duang tak a ti thuanawp zel zawk a, bawnghnute leh savun hmanga sumdawng te thlengin a nghawng.

Modi-a tan em em tute thenkhat pawh hian sorkarin economy lama hmalakna maksak pui pui a neih thin te hi a punlun zel an hlau ru viau awm e, sorkarin engemaw tak a ti anga a insawi mawi ve zel a ngai miau si a. Mahse chutiang a kal chu a manhla hauh lovang. Hetiang zela a kal chuan Modi hian India hi a hmuh tirh anga aia tha hret si, eng teh ual a hmasawn chiah chuang lovin a chhuah mai ang tih a hlauhthawn awm viau ta.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s