Khawvel/ Plastic Bottle: Tangkai hle mahse, tuifinriat a ti bawlhhlawh nasa hle

Khawvel pum anga chhutin minute khat zelah plastic bottle maktaduai khat hralhchhuah a ni a. Heng bottle te hi hmannawn (recycle) an nih mang loh avangin tuifinriatah an luang lut zel a. Heti reng a nih chuan kum 2050-ah chuan tuifinriata sangha te aiin plastic awm te buk a rit tawh zawk ang.

 

Minute tin mai hian khawvel pumah miten plastic bottle maktduai khat an lei a, kum 2021 a lo thlen meuh chuan hei hi 20% velin a pung tura chhut a ni a. Heti taka mihring te’n plastic bottle kan hman nasat avang hian khawvel sik leh sa inthlak danglam ang zetin leilung dan kalhmang ah plastic avangin buaina a thleng thei dawn.

London atanga tih chhuah, khawvela chanchinbu lar The Guardian-in a chhuichhuah dan chuan tun kum sawmbi tawpah hian plastic bottle maktaduai vawi thuma inpuntir chhawng (trillion) lai hralh zawh hmana rin a ni. Second tin maia hetiang bottle singhnih zet hralh a nih chhan hi chi hrang hrang a awm thei ang a: a bulpui berah erawh chuan tui thianghlim in tur mamawhna a san vang leh awlsam taka nung duh, mahni in ami tui pai aia dawra tui bottle lei mai duh zawk khawvelah an pun zel vang a ni.

Kum 2016 khan plastic bottle tluklehdingawn sangkhat (billion) lai khawvel hmun tinah hralh a ni a. Heng bottle zawng zawngte hi zawm khawm vekin, khawi ah emaw tung ila chuan khawvel leh Ni (sun) inkar zatve chuang a thleng pha ang.

Plastic bottle tam zawk hi hman nawn (recycle) leh awlsam tak ni mahsela, hralhchhuah zat a tam em avang hian hmang nawn theih tura khawm theih a ni tawh lo a, tuifinriat ah tamtak chu a luang lut tawh a. Kum 2016-a plastic bottle hralh zawng zawng zinga a zatve chauh kha hman nawn theih an ni a, hman nawn tura khawm zinga 7% chauh chu bottle tharah siam an ni nghe nghe a. A dang zawng chu bawlhhlawh paihna hmun leh tuifinriatah paih an ni.

Ellen MacArthur Foundation chhut dan chuan kum tin mai hian plastic maktaduai ton 5 atanga maktaduai ton 13 vel tuifinriatah te hian a luang lut a, hetiang zela thil a kal chuan kum 2050 kan chuan kai hunah khawvel tuifinriata sangha zawng zawng aiin tuifinriata plastic awm zawng zawng hi a buk a rit tawh ang.

Mi thiamte chuan hetianga plastic bottle paih mai mai them te hi mihring eitur ah a lut reng tawh nghe nghe an ti a.

Tuifinriat dep hmun tinah plastic avanga leilung dan kalhmang buai phah chu mi thiamte’n an buaipui mek zel a. Nikum mai khan mi thiamte chuan khawvela thliarkar fal bera ngaih, Pacific tuifinriat chhim lama awm ah chuan plastic ton 18 zet an hmuchhuak a. Mi thiamte chuan khawvel hmar tawpa Arctic vaukamah pawh mihring tlemte chauh cheng mahsela, plastic tam tak tuikamah a inchhek hner hnur tih an hmu bawk.

Khawvela plastic bottle tam zawk hi chu tui thianghlim paina tura siamchhuah a nih thu plastic bottle siam dana mi thiam pakhat Rosemary Downey, Euromonitor pawl ami chuan a sawi a. A sawi dan chuan plastic bottle tam zawk siam chhuah a nih chhan chu China vang a ni a, heng bottle te hralh zawng zawng hmun lia thena hmun khat (25%) chu China-a hralh a ni a ti.

Kum 2015 khan China mipuite chuan plastic bottle billion 68.4 lai an lei a, a kum leh 2016 khan hei hi nasa taka pungin billion 73.8 a tling hial.

“Heti khawpa a pun nachhan hi China-ah khawpui liana mihring cheng an pun vang a ni,” tiin Downey chuan a sawi.

Plastic hi kum 1940 bawr vel khan siamchhuah niin hmanna a pung nasa hle a. Khatih hunlaia plastic siamchhuah te kha tunlai pawh hian a la tawih ral lova, tuilalhthei leh hmanraw ang hmanga plastic siamchhuahna hi kum za fe hnu ah a tawih ral thei chauh reng a ni.

Cold Drinks siamtute hian plastic bottle tam zawk hi an siam chhuak a. Leilung humhalhtu Greenpeace chhut dan chuan Coca Cola company hian kum tin paih mai tur plastic bottle billion 100 vel a siamchhuak ziah a, chu chu second khatah bottle 3,400 a siam chhuak tihna a ni. Greenpeace sawi zel dan chuan khawvela cold drinks siamtu company lian paruk te chuan an plastic bottle siam zawng zawng 6% chauh hi a hlui hnu ah an hmang nawn nghe nghe a ni.

Plastic bottle te hi hmannawm leh vek theih an ni a, heng plastic hlui tuaithar atanga bottle thar siam te hi RPet tia koh an ni a. Mahse, heng company te hian an duh tlat lo – RPet hi plastic bottle thar hlak ai chuan a hmel a lo mawi lo deuh a, heng company te hian an cold drinks siam te hi bottle thar tle vara zawrh an duh tlat.

Chutih rual chuan, British Plastics Federation (BPF) chuan tunhnai khan Britain ram rorelna sang House of Commons hnuaia committee pakhat hnenah RPet bottle siam nan hian kawphetha an hmang tlem zawk daih niin a sawi a. Plastic bottle thar hlak siam nana kawlphetha an mamawh hmun lia thena hmun thum (75%) chauh RPet bottle siam nan hian a ngai a, chuti chung chuan BPF hian RPet hmang tura cold drinks siamtute nawr a hreh hle a, polythene hman tlem nana polythene a chhiah lak te anga plastic bottle khuahkhirh chu an duh lo nasa hle.

Greenpeace chuan heng cold drinks siamtute hian nasa takin an plastic bottle siam dan an thlak danglam a ngai a ni a ti ve tlat thung a. Greenpeace hnuaia tuifinriat humhalh pawl hruaitu Louisa Casson chuan, “Hmanni deuh khan Scotland hmar lama mihring chen mang lohna vaukam kan fang a, khawi hmunah pawh plastic bottle hmuh tur a awm. Cold Drinks siamtute hian an bottle siam dan an thlak danglam ngei ngei a la ngai dawn a ni,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s