NHM hnuaia thawktu 1,500 chuang te hlawh cheng vbc 9 aia tam sorkar in pe thei lo

State Matching Share pek theih loh vang a ni: NHM hotute

State Matching Share diltu te pek loh kan nei lo: Finance Dept

 

Sorkar laipuiin an hlawh a tum sak, National Health Mission (NHM) hnuaia thawktu te hlawh turah Mizoram sorkar in a tum ve tur State Matching Share (SMS) a pek theih loh avangin programme 11-a thawktu 1,500 chuang te chuan thla thum te, thla li te leh thla nga lai te hlawh an la thei tawh lo a, heng thawktute hlawh tur sorkar in a bat sak hi cheng vbc 9.29 chuang a ni.

NHM atanga thu dawn danin, NHM Mizoram hnuaiah hian programme 17 a awm a, chung zinga programme 11-a thawktute chuan hlawh hi an la thei lo mek a, hei hi Mizoram sorkar in a tum ve tur zaa 10 a tum theih loh vang niin The Frontier Despatch (TFD) an hrilh a, Mizoram sorkar in a tum ve tur a pek theih hunah sorkar laipui lam hian sum hi an rawn pe dawn niin an sawi.

“Mizoram sorkar in a tum ve tur a pek theih miau loh avangin sorkar laipui chuan sum hi min rawn pe thei lo a, tunah hian a hranpa in cheng vbc 9.03 chu sorkar laipuiah rawtna kan thehlut leh tawh a, hetah pawh hian Mizoram sorkar in a tum ve tur a pek theih loh chuan kan hmuh a rinawm loh a, a tum ve tur a pek theih hun hunah kan rawn pe ang che u an ti,” tiin thu dawnna chuan a sawi a, “Tunah hian sum hman tur hi programme hrang hrang atangin kan pawtpeng nasa hle,” a ti bawk.

 

SMS pek theih loh kan nei lo – Finance Dept

Hetih lai hian, Finance Department hotute chuan SMS dil pek loh an neih loh thu an sawi a, “Tunah hian sum lamah Mizoram sorkar harsat loh lai tak a ni a, NHM hnathawkte’n hlawh an la thei lo a nih chuan technical lamah thil fel lo an nei a nih hmel a, SMS tur atan Mizoram sorkar in cheng vbc 190 vel a dah,” tiin Finance Department atanga TFD thu dawnna chuan a sawi ve thung.

 

Hlawh la thei lo te mangang

Mipui hriselna tura hnathawktu tam takin hlawh an lak theih loh avangin an mangang hle niin an sawi a, doctor leh nurse te chuan zing, chhun leh zana thawk an ni a, chhungte nena riahho loh pawh thla khatah zan tam tak an neih laia an thawhhlawh an la thei lo chu manganthlak an tih thu an sawi a, hlawh an lak theih loh chhan chu sorkar laipuiin a rawn pek loh vang pawh ni lo, Mizoram sorkar in a tum ve tur zaa 10 chauh pawh a pek theih loh vang nia an hriat thu leh chu chu pawi an tih thu an sawi.

NHM hnuai nilova thawk doctor pakhat chuan tunhnai deuh khan NHM atanga hlawh la nurse tlemte hnathawh dan chu a duhthusam a nih loh vangin a zilhhau ve ngawt thu sawiin, “‘Thla thum thla li hlawh la thei lo ve ula chu hnathawh in phur bik lovang,’ tiin min chhang a, an lungchhe lek lek ta mai a. Ka zilhhau chu ka inchhir mai ni lovin, ka khawngaih tak zet a ni. A hrehawm dan tur chu ka hrethiam khawp mai,” tiin a sawi.

Doctor leh nurse te bakah thawktu dang te pawhin an hnathawh hlawh an la thei lo chu manganthlak an tih thu an sawi a, a bikin thingtlang lama NHM hnathawk te chuan lungawi lohna lantir nan hna chawlhsan lailawk (strike) an inring viau tawh niin an sawi bawk.

NHM hnuaia thawktute chuan tun tum chauh hi hlawh lak theih loh an neih a ni lova, kuminah hlawh an lak mumal loh bakah kum hmasa lamah te pawh sorkar in thla li hlawh te a batsak thin tawh niin an sawi a. Hlawh lak mumal loh avangin ba an ngah bakah thla tina an khawl ve tur te pawh hlawh an lak mumal loh chuan khawl a harsa tih an sawi a, ban mai duh, an chhungte’n an la ui pui si  te pawh an awm an ti.

 

Hlawh la thei lo te chu tu te nge?

NHM hnuaia programme chi hrang hrang 17 te hi pawimawh tak tak, pawimawh ber leh pawimawh lo ber thliar hran theih loh khawpa pawimawh an ni a, mahse, NHM hnuaiah rau rau Reproductive & Child Health (RCH) hi mipui hriselna khawihtu langsar ber an ni a, RCH hnuaiah hian Specialist doctor 13, Medical Officer 23, Staff Nurse 276 leh Health Worker 427 te bakah Technician hrang hrang, Pharmacist, Counsellor hrang hrang leh thawktu dang 439 an la awm a, heng mite hian April, May leh June thla hlawh an la tawh lo a ni.

Anni bakah hian National Programme for Prevention & Control of Cancer, Diabetes, Cardiovascular Diseases & Stroke (NPCDCS), National Mental Health Programme (NMHP), National Oral Health Mission (NOHP), National Programme for Palliative Care (NPCC), National Programme for Control of Blindness (NPCB), National Programme for Health Care of the Elderly (NPHCE), National Tobacco Control Programme (NTCP), National Leprosy Eradication Programme (NLEP), National Iodine Deficiency Disease Control Programme (NIDDCP) leh Integrated Surveillance Project (IDSP) hnuaia thawkte’n hlawh hi thla engemaw zat an la tawh lo.

 

NHM program hrang hrang thawktu hlawh la thei lo, an lak theih loh chin leh an sum mamawh te

RCH

Staff: 1,178

Hlawh lak loh: April, May, June

Thla khata hlawh mamawh: cheng vbc 1.8

 

NPCDCS

Staff: 121

Hlawh lak loh: February, March, April, May, June

Thla khata hlawh mamawh: cheng nuai 30

 

RNTCP

Staff: 91

Hlawh lak loh: March, April, May, June

Thla khata hlawh mamawh: cheng nuai 22

 

NMHP

Staff: 21

Hlawh lak loh: March, April, May, June

Thla khata hlawh mamawh: cheng nuai 13

 

NTCP

Staff: 40

Hlawh lak loh: April, May, June

Thla khata hlawh mamawh: cheng nuai 12

 

IDSP

Staff: 28

Hlawh lak loh: June

Thla khat hlawh mamawh: cheng nuai 7.6

 

NPCB

Staff: 49

Hlawh lak loh: April, May, June

Thla khata hlawh mamawh: cheng nuai 7

 

NPHCE

Staff: 26

Hlawh lak loh: April, May, June

Thla khata hlawh mamawh: cheng nuai 7

 

NOHP

Staff: 9

Hlawh lak loh: April, May, June

Thla khata hlawh mamawh: cheng nuai 2.23

 

NPPC

Staff: 6

Hlawh lak loh: April, May, June

Thla khata hlawh mamawh: cheng nuai 1.4

 

NLEP

Staff : 5

Hlawh lak loh: May, June

Thla khata hlawh mamawh: cheng nuai 1.3

 

(NLEP thawktu te hian NIDDCP sum an puk a, tunkarah hlawh an lak theih an beisei)

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s