Ramchhung/ Manipur: Tualchhung indona dai thei lo a tualthi te chhiarpui

Hel pawl an tam em emna India hmarchhaka Manipur state-ah chuan kum 1979 leh 2012 inkar chhung khan venghimtu sipaite’n diklo takin mi 1,500 chuang an that a. Supreme Court chuan nikum khan thutlukna pawimawh zet mai siamin hetianga nunna chan chhungte leh helam buaipuitute chu inthahna chungchang hi chhui a an thil hmuh leh hriatte lakhawm turin a ti a. Court chuan hemi chungchang chhui tur hi a din dawn nge dawn lo tih chu July thla chhung hian thutlukna a siam dawn a. Hemi chungchang chhui hian BBC correspondent Soutik Biswas chu Manipur-ah a han zin a, heti hian a thilhmuh a ziak:

 

Neena Ningombam-i chuan a pasal bo tak daih ni kha a la hre reng a, a hnu lawkah Cable TV-ah a ruang an rawn tilang a nih kha.

Kum 2008 November thla kha a ni a, ni a sa tha hle a, Michael (32) chu Imphal khawpui a a thianpa te inah a va leng a. In lamah chuan Ningobam-i chuan sekrek a lo khawih thung a. A fapa pahnihte chu an mu tui hle. Chawhnu dar 3.30-ah chuan a mobile phone a lo ri a. Rawn betu chu Michael-a niin, a rawn haw kawngah Police Commando te’n an lo man thu leh an chhungkaw hmelhriat Police Officer lian lo be vat a, a chhuah theihna atana tan la tura ngen turin a hrilh a.

Chutia an inbiak lai chuan a tawp chawt a. A phone let ngial hnu darkar 2 liam hnu velah chuan mipa pakhat hian phone chu a lo la ta hram a, Ningombam-i hnenah chuan a pasal chu inthiarna pindanah a awm nia sawiin a rawn bia tih a lo hrilh tur thu a sawi a. Michael-a hian a rawn phone let ta lo reng reng a. A nupui in phone leh a va tum chuan phone chu a lo in switched off tawh.

Hlauthawng leh rilru buai tak chungin Ningombam-i chu TV hma-ah a thu a, a pasala farnu chuan an chhungkaw hmelhriat Police Officer chu a va zawng thung a, mahse hmuh tur a awm lo.

Tih ngaihna dang awm chuang heklo, Michael-a nghah pah chuan TV-ah an tualchhung channel chu a en reng mai a, zan dar 9-ah chuan thu thar thin thawng tak mai an rawn puang ta a. TV hmai-ah chuan a pasal thi hnuang mai, tracksuit pawl leh T-shirt hring duk ha, chhuat a a ruang let reng chu a rawn lang ta a. A sirah chuan Chinese siam grenade hi a awm bawk a. Chanchinthar puangtu chuan Police Commando hovin hel pawl mi pakhat an thah thu a rawn sawi ta a ni.

A hnu-a Ningombam-i’n a sawi leh dan chuan TV hmai a en a, a khawng nghal vek a, lungngaihna chuan hlauhna ang maiin a tuam nghal a. “Ka tap vak vak tih chu ka la hria a. Tu emaw hian TV hrui chu a rawn pawt phawi a. Ka pasal unaupa chu ruang dahna hmunah va kalin ka pasal a ni tih a va chian a ni,” a ti.

Post-mortem report-ah chuan Michael Ningombam hian a chuap leh thin-a silaimu luhna hliam avangin thisen chhuak nasa lutuk a nei a, a thih phah tia ziahlan a ni a. Police sawi dan chuan Michael leh a thian pahnihte chu motorcycle-a an chuang lai khawpui hmawr fem ngaw hnuaiah commando mi 6 velin an lo ti ding a. A hnunga chuang chuan Police chuanna motor chu a kap a, Michael-a hian commando ho lama grenade vawm a tum lai takin mahni invenna’n an kaphlum ta a ni an ti. Police te chuan Michael-a chu hel pawl mi, tukluih pawisa khawn ching niin an puh bawk.

“Ka pasal hian hna chi hrang hrang thawk kualin a theihtawp a chhuah ve a. Ruihhlo a ti ve thin a, theih tawpin bansan a tum a. Mahse hel erawh chu a nilo,” tiin kum 40 mi Ningombam-i chuan min hrilh a. College an kal laiin an intawng a, an tlan dun a an innei ta a ni. Michael a thih dan chhui phutin helai veng a chengho chuan nawrh an huaihawt ta chiam a. Ningombam-i hi history subject-a MA ni chungin a fate chawmna’n lirthei khalh zirna sikul a enkawl a. Hemi piahlamah hian dikna hlen chhuah a nih theihna’n a mal beih a, sorkar thuneitute hnenah lehkha thehlutin court-ah a kal bawk a.

Lehkha pawimawh la khawmin thuhretu awm theite chu an hriat dante sawi turin a ngen kual a. Thla khat chhung chu nitin hian a scooter-in kilometre 15 a hla, Imphal khawpui femah a kal thin a, hetah hian a pasal kah hlum a nih tlai a commando hovin SUV-a a pasal an phur lai lo hmutu dawr nghaktu putar tak hi a va kawm thin a. Chupa chuan a hnu lawkah hla deuh hleka silai puak thawm a hriat tak thu a sawi.

“Ni tam tak ka bia a, a chhungte nen pawh kan titi ho hnu-ah putara hian a thil hmuh leh hriat chu sawi chhuak a thuhretu pawimawh taka tan a remti ta a ni. Kum 4 a ral hnu July 2012 khan district judge chuan Michael-a chu Manipur Police commando hovin an that a, Police nen hian silai-a inkah tawnna a awmlo tiin thutlukna a siam ta a. High Court chuan he thu hi pawmin  Ningombam hnenah hian zangnadawmna cheng nuai 5 pe turin thupek a siam ta bawk a.

Hetiang tawk hi Michael Ningombam-a chauh hi a ni lova. Mimal dikna chanvo humhalhtu pawlte chhut dan chuan mi 1,528 aia tlemlo chu dan kalha dahthat an nih an ring a, hetianga chetna hi inkahna lem tia vuah a ni. Inkahna lem lema thite hi a tam ber chu mipa an ni a, khawtlanga rethei deuh leh hna nghet vawn neilo an ni tlang pui a. Thah zingah hian kum tlinglo 98 leh hmeichhia 31 an tel. A upa ber chu pitar kum 82 mi niin a naupang ber chu hmeichhe naupang kum 14 mi a ni. An zinga langsar ta ber chu kum 32 a upa Thangjam Manorama Dei a ni a, ani hi kum 2004 khan paramilitary sipaite’n an pawngsual rawn hnu-ah an that nia sawi a ni a. He tualthahna duhloh lantirna’n hian nuho chuan ruak ngal ngatin kawng an zawh a, khawvel an barakhaih a nih kha. Inthahna thenkhat chu sorkar laipui hnuaia mimal dikna chanvo humhalhtu pawlte’n an chhui a. Court thuneitu lamin an chhui chhuah avanga zangnadawmna dawng chu za aia tam an awm. Chuti chunga thil fello leh rilru tibuai thei tak chu Police emaw sipai emaw pakhatmah hi hetiang inthahna avanga court-a ding leh hrem an la awmlo hi a ni.

“Mi tam tak chu an mu ar lak tawp a, hel pawl mi niah puhin an that tawp mai a. An han ngaih pawimawh lohzia lanna chu hetianga thihna a thlen hian Police-in thubuai an ziak lut ngai lova. A mawhphurtu zawn chhuah a awm tur a ni a. Mi nun theihna chanvo laksakin I that ngawt thianglo,” tiin mimal zalenna tana thawh hlawk tak Babloo Loitongbam chuan a sawi. Kum riat kal taah khan hetianga tualthahna tuartu chhungte hi mimal chanvo humhalh kawnga thawktute nen thawk hovin Police, sipai leh paramilitary ho duh thala an tal vel dan nunphung dolet turin tan an la a. Kum 2009 July thla khan inhmukhawmin an chanchin leh tawrhna chungchangte an sawi hova pawl dinin “Extra Judicial Victim Families Association” tiin an vuah a ni.

Hetiang chhungkaw tangrual hovin dilna an thehluh zulzuiin nikum July thla khan Supreme Court chuan thutlukna pawimawh tak siamin lehkha thehluttute chu tualthahna chungchanga an hriat belh theih ang ang te khawnkhawm turin a hrilh a. An thil hmuhchhuahah hian a tuartu (mitthi) chu hmelma leh a bei hmasatu pawh ni sela that turin  tullo takin tharum thawh a ni em tih pawh chhui chiang turin an ti a.

Court sang berin thuneihna a pek tak heng chhungkaw intel khawmte hian tualchhung chanchinbu hrang hrangah advertisement te leh ngenna te chhuahin an thil hriat ang ang thawh khawm turin an ngen a. Inthahna chungchanga thuchiang hriate chu an kokhawm ta. Chhungkaw 900 vel chuan he sawmna hi rawn chhangin Police hnena an thu thehluh te, post-mortem report te leh inthahna kaihhnawiha court thupekte an rawn keng a. Hemi atana inpete, zirlaite leh mitthi chhungte chuan Manipur state pumpui-a district 9 an tlawh chhuak a, thil an la khawm a. Ukil pakhat a thlawna thawk tura inpe chuan dan lampang thil a buaipui thung a. Kum khat a liam leh meuh chuan an lehkha tian khawm chu file 1,500 chuang a lo tling ta a, a vai hian tualthihna chungchang a ni. April thla khan inthahna 748 chungchang chu a tuartu chhungte hian court-ah an thehlut a, thubuai dang an buaipui zui zel bawk a. Tun thla chhung hian court sang ber chuan chhui chian tur chungchangah thutluk a siam ngei beisei a ni.

Manipur a thihna rapthlak thleng thin ang hi India ram hmun dangah a awm kher lovang. Mihring chanvo humhalh lama thawktu nu pakhat chuan, “Fate enkawl puitlinna atan hian hun a duh viau a. An han puitling ta cheng a kahhlum an ni leh mai thin a. Hei hi a ni reng tur a ni lo. Ruang dahna hmuna kan fate ruang en fo hi kan tlin tawhlo a ni,” a ti hial a ni. Mipa thenkhat chu an khuangcher bo tawp mai a, a nih loh pawhin dawra leitha lei tura an kal emaw, an car spare part an lei tur emaw, DVD hawh tura an kal emaw, bus an chan lai emaw-in venghimtu sipaite’n an man tawp mai a. A then erawh chu an bialnute hmu tura an kal laia kahhlum an ni a, dila sangha an man laite leh restaurant-a thil an ei lai taka kahhlumte an awm bawk.

Hmeichhe pakhat chu a fanu nausen a hrai laia kahhlum a ni. Hmun thenkhatah chuan sipaite hi inchhungah an pawng luh tawp a, an mi rinhlelhte chu an chhungte hmuh laia hnukin an that mai thin. Hetiang hian kum 2009 May thla khan Pathian thu zir mek kum 29 mi Ngangban Naoba Singh chungah a thleng a. Naoba hi inneihna ah a farnu nen kalin zanah an haw dun a. An unau hian TV an en a, an nu Kamalini Ngangban, khawchhiar hna thawk chawl tawh chuan a rawn zawm ve a. Naoba chuan a nu hnenah chuan, “Zan rei lama an film chhuahte hi tar en chi a ni lo a nia, mu tawh rawh,” tiin a nu chu a fiam a. Chu chu a thusawi hnuhnung ber a ni.

Zanlai-ah chuan Pi Ngangban-i chu an in kawngkhar rawn kik dawt dawt chuan a ti harh a. Tawng ri hria-in tute emaw chu an ina lo luh an tum tih a hre mai a. A fapa pindanah lutin a va kai thova, in hnung lam kawngkhara chhuah tir a tum a. A fapa an rawn zawng niin a hria ni maw? “Thil engemaw fello a awm tih ka hre mai a. Naoba chu a mut a chhuak em em mai a, thil awm dan a hre hauh lovin ka ring. In hnung lama kan chhuak chu mi pakhat hian min lo ti ding a,” tiin a sawi. Mi 10 vel nia rin hi an lo ding a, an taksa ruangam chauh a hmu thei a. “Ti ding rawh u” an rawn ti tuarh a. Chutah mi pakhat hian Naoba hnenah chuan “Khawiah nge kal i tum?” tiin a zawt a. Ani chuan a nu-in lo chhuak tura a koh thu a sawi a. Chutah boruak a danglam thut a. Chumite chuan Naoba chu an hruai chhuak a, a chhungte chu inah an nam lut a, an phone te chu lak sakin pawn lam atangin an kalh khum a. Pawnah chuan inbe thawm a awm a, thupek pe thawm an hri a, silai a puak thuai thuai bawk a. “Lo man rawh u, lo man rawh u,” tia au thawm an hria a. An motor chu an ti nung a. Ngangban-i chuan a fapa chu a tlanbo theih a beiseina a. Ai-mit-thlawn ang maiin a thim a, an chhungkua chuan chu zan thim takah chuan an tawm tlaivar a. Khua a lo var chuan an fapa chu an in hnung lamah kah hlum niin, a ruang chu motor a hruai bo a ni tih an hre ta a ni.

“Vawiin thleng hian an thah chhan hi ka la hre lo. Thudik hi ka hre duh a ni. Thil kan ti dik lova tlanbo a tum a nih pawhin a ke-ah an kaphliam thei reng si a,” tiin Ngangban-i chuan a sawi a. “Ka fapa chuam bik a ni a, cinema hall-ah te kan kal dun thin a. Ka fate dang pahnih chu Manipur pawn lamah awmin hna an thawk a. Naoba hi chu kan chhungkaw pa ber tur a nia sin maw le,” a ti. Police chuan Naoba hi dan pawna hnawl hel pawl mi leh tukluih chhiah khawn ching niin an sawi a, hemi zan hian amah zawngin an in hi an hual niin an sawi. Kum thum a ral hnu chuan judicial inquiry report chuan hel pawl mi emaw pawisa chhuh luih ching emaw a ni tih finfiahna a awmlo tih a tarlang a. Judge thutlukna a a landan chuan police commando ho hian Naoba hi man tum lovin an pawng kah a, ram dan ang zui chu nise hetiang hian an che lovang a ti. Inchhung luma i awm avang ngawtin i nunna a him tihna a ni lo.

Oinam Amina Devi chu a fanu sen thla khat mi chauh an in chhunga a hrai laiin April 1996 khan paramilitary sipai in an kap hlum a. Sipai ho hian hel nia rinhlelh pakhat an um a, chupa chu Amina te in chhungah hian tlan lutin khum hnuai-ah a tawm a. Sipaiho an ina an rawn tlan luh tak khup khupah chuan bathlara nausen hrai mek Amina chu a zam chhe ta mai a, in chhungah a tlan lut a. Kawngka khar a tum lai tak chuan sipaiho chuan an rawn kap ta a, amah chu kap tlangin nausen chu an kap fuh tel a. Thi in a bual khah tlat nausen chu damdawiin panpui nghal a ni a, doctor-te’n silaimu chu an la chhuak a, a nu erawh chu ka pawh chhawn lohvin a thi nghal. Khawtual mipui thinrimin lungawilohna an lan tir a, post-mortem a nih hnu-ah a ruang chu a chhungte’n inah an la duh lova. Police in la letin an hal ral ta a. Mipui nawrna a nasat tak em avangin sorkar chuan a chhui tir ta a. Chhui chianna-ah chuan silai hmehpuah chu thil tul hauh lo leh tih hauhloh tur, tum bik pawh awm lova pawng kah a ni tih a ni a. Sorkar chuan report chu SC-ah a thehlut a, a chhungte chuan zangnadawmna atan cheng singnga an dawng. A fanu dam chhuak ta Oinam Sunita Devi (20) mi hi a pa bulah a awm a, a pa hian nupui dang a nei leh tawh. A nu a ngaih thu a sawi a, a damkhawchhuah theih chhan chu a hriat bik loh thu sawiin khuarelah a ngai hmiah niin a sawi.

He thu hi karleh lamah chhuah chhunzawm a ni ang – Ed


One thought on “Ramchhung/ Manipur: Tualchhung indona dai thei lo a tualthi te chhiarpui

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s