Zirlai pawlin cement man a khuahkhirh avang leh GST avangin cement vâng

Mizo Students’ Union (MSU) in Mizorama cement rawn lut siamtu company in Mizo mipuite an bum nia an hriat thu an sawi leh company atanga Mizorama rawn phur luttu Carry & Forward (C&F)-te’n bag khat Rs. 360 aiin ti to lo se an tih avangin tunlai hian Mizoram hmun hrang hrangah cement a vang hle a, hei bakah hian sorkar laipuiin July 1 atanga chhiah thar a lak Goods & Services Tax (GST) avangin cement phurlutu te an buai a, in sa tam takin hna an thawk chhunzawm thei lo.

 

MSU in cement an khuahkhirh avang leh GST hman vang hian Mizorama cement phurluttu C&F-te’n company atanga cement an phur luh loh avangin cement zuarte’n state pawn atangin cement an la a, hei vang hian cement bag khat man Rs. 10 leh Rs. 20 velin to sawt niin The Frontier Despatch (TFD) chuan thu a dawng a, “C&F in cement an rawn phur luh kha chuan dealer ah an rawn sem loh pawhin an kudam atanga kan lakin kan motor-a an dah leh hlanthlak kha a thlawn a ni a, tunah chuan C&F-te’n an phurh loh avangin state pawn ami kan lak a ngai a, C&F te angin truck trip tam tak kan lak ve theih loh avangin a man hi a to ta deuh a ni,” tiin dealer pakhat chuan a sawi a, “Hei bakah hian GST avangin C&F-te’n cement an la lo bawk a, hei hi a chhan deuh ber chu a ni,” a ti bawk.

 

MSU rate siam C&F-te’n zawm harsa la ti

MSU in Mizorama cement man a tlak hniam theih nan C&F-te’n dealer ah Rs. 360 aia to in pe lo se an tih chu cement company hrang hrang aiawh C&F te chuan thil harsa tak niin TFD an hrilh leh a, cement a van hma khan dealer te kha Rs. 400 chuang theuha an pek thu an sawi a, an zawrhna erawh chu anmahni in an chhiar dan a ni mai a, Rs. 360 kha chu thil theih loh a ni a, tunah hian GST avangin cement rate tur a la chiang lo an ti a, MSU avang leh GST avangin cement an phurh luh tawh loh thu an sawi.

 

Topcem leh MSU inrem

MSU in cement man tihniam tura company te an ngen a hlawhtlin loh avangin Mizorama in sa lai te an buai hle a, hemi chhawk zangkhai tur nia insawiin MSU leh Topcem cement company te chuan inremna an ziak a, an inremna ang chuan Topcem cement hi Aizawl ah Rs. 420 aia to loa zawrh tur a ni a, Mizoram hmun dangah Rs. 500 aia to loa zawrh tur a ni.

MSU leh Topcem cement company aiawhte hi karleh lam hian an inbe leh dawn a, MSU ngenna Rs. 360 aia to loa pek an theih leh theih loh tur chu company thuneihna niin Topcem C&F chuan TFD a hrilh.

 

C&F-te’n hmai hnih nei – MSU President

MSU President RB Lalmalsawma chuan an hmalakna zaa 80 chu zirlaite hamthatna a nih thu leh zaa 20 chu ram leh hnam tan a nih thu July 5 (Nilaini)-a MSU khawzawl Sub-Hqrs in Zaingen YMA Hall-a Graduate tharte lawmpuina hun leh Career Awareness, Mental Health Awareness campaign a hmanpuinaah a sawi a, cement hi a ti thei fal leh milian te chuan Rs. 360 in an la thei tih hi MSU chuan a hria a a ti a, “Hei hi mi thil tithei chauh tan ni loin mi nawlpuite pawhin man tlawma kan lei ve theih hi MSU duhdan a ni a, company leh dealer te inkarah C&F te hian hmai hnih an nei a , cement rate tihniam tura MSU hmalakna thlawp ang taka an awm laiin company leh mipui lamah C&F te hian awr an senin lehlamah awr an dum niin MSU chuan kan hria a. Dealer thenkhatin man toa an lo zuar a nih pawhin mamawh hle tawh mah ila man to chung chuan mipui ten lei rih lo turin kan in ngen a, cement company te hian cement rate hi an tihhniam hma chuan Mizorama cement lakluh chungchangah tun aia khauh zawkin hma kan la zel dawn a, a tul a nih chuan hnam hnatlang pawh kan ko mai ang,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s