Chakma district-ah hnathawh chak, bill a chhuak hma an tih chu CAG-in dawt a ti

Chakma Autonomous District Council (CADC)-a lei dawh leh kawng siam hna te chu thawh zawh tura ruahman hun hma daihin thawh zawh an ni awm a, contractor te hnenah pawh bill pekchhuah zung zung a ni bawk a. Mahse, dawt mai a ni e tih CAG-in a hmuchhuak  

bRIDGE

Chhiartute chuan an la hre awm e: Bairabi khaw bula Tlawng lui kanna tur lei chu dawh tan a nih dawnin kum thum chhunga dawh zawh tura ruahman a ni a, mahse, kum 11 hnu ah an zo tawk a.

Mizoram hmar lamah heti taka lei an dawh rei lai hian chhim lam Chakma Autonomous District-ah erawh chuan thla nga lek chhungin lei an dawh zo hman a ni awm e, engineer te chhinchiah dan chuan.

Lei dawh lamah chauh pawh hian Chakma hmunah hian contractor te tuan a tha chuang lo: kawng sial ah pawh hma an la chak hle a, km 2-a thui kawngpui leh a sir drain te leh leimin tur venna te lamin thla ruk chhungin an thawk zo vek thei bawk, engineer te chhinchhiah dan tho chuan.

Mahse, Comptroller and Auditor General of India (CAG) in District Council Affairs Department hnuaia lei dawh leh kawng sial dan te a zirchian chuan Chakma Autonomous District chhungah hian contractor te’n Mizoram hmun dang aiin an hnathawhna bill lak an awlsam daih zawk tih a hmuchhuak bawk a. Hmun dangah chuan thla tel te, kum tel te bill chhuah nghah a ngai nia sawi a awm thin laiin, CADC ah chuan hna an thawh zawh hma daihin contractor te hian cheng vbc khat chuang man bill an la thei tlat.

 

Samuksury lui kanna lei saknaah bill chhuak hma uchuak

Kum 2012 October thla khan Non-Lapsable Central Pool of Resources (NLCPR) sum hmangin Development of North Eastern Region (DoNER) chuan Kamalanagar (Chawngte) khua tihchangtlun leh cheithatna tur sum a dah hrang a. He project hnuaiah hian cheng vbc 1.20 chu Samuksury lui chunga lei dawhna tura ruahman a ni.

Central Public Works Department Manual, 2007 in a phut dan chuan hetiang hna thawh a nih hian Measurement Book (MB) siam tur a ni a, chutah chuan hnathawh viltu Junior Engineer-in contractor hna thawh dan zawng zawng a record ang a. Contractor-in bill a lak hma in MB hi Assistant Engineer-in a endik vek ang a, a tawp berah chuan he MB vek hi Executive Engineer-in a pawm tur a ni.

Samuksury lui chunga lei dawh hna hi CADC chuan Assam ami contractor pakhat, Dewan Abdul Khuma, Silchar-a cheng hnenah a hlan a, mahse, a hna hlanna agreement leh notice ah te hian engtikah nge hna hi a thawh tan tur leh engtikah nge a thawh zawh tur engmah a inziak lo va. Mahse, CADC Executive Secretary-in a chhinchhiah dan chuan, he hna hi September 13, 2014 khan thawh tan a ni.

CAG chuan he lei dawh hna record-na MB chu a enchiang a, chuta a inziah dan chuan lei dawh hna hi February 13, 2015 khan thawh zawh a ni a. MB-a chhinchhiahna behchhan hian CADC chuan hna thawh zawh a nih hnu kar hnih emaw lek – February 25 – ah cheng vbc 1.20 man hu bill chu contractor hnenah a hlan fel ta vek mai a ni.

Mahse, CAG chuan he lei dawh hna hi December 2015 khan a hmunah a enfiah a, bang pakhat chauh sak a la nih bakah a lei tak phei chu dawh tan pawh a lo la ni lo hrim hrim.

Hemi chungchang hi District Council Affairs department hnenah a thlen chuan, department chuan contractor hian hna a tan hma in bungraw mamawh leina tur sum a mamawh a, hnathawh theih hun chhung a liam zel bawk nen, sum hi pek hmasak a ni ta mai niin a sawi a. CAG chuan hei hi chhanna tlingah a ngai lo va, dan zawng zawng bawhchhiat a nih vangin mawhphurtu chu hrem ngei ni se tiin rawtna a siam.

 

CADC New Secretariat panna kawng sial zo chak, bill pawh chhuak hma hle

Kum 2014 March thla khan Mizoram sorkar chuan State Plan Assistance hnuaiah Udalthana leh New Secretariat inkar kawng chu phah that nan cheng vbc 1.21 a pe a, hemi thla vek hian sum sanction zawng zawng chu CADC hnenah a hlan a.

A hnu deuh, May thla-ah chuan CADC hian he hnathawhna tura tender chhuah chhang hniam ber tu RV Hluna, Edenthar, Aizawl chu thuthlung a ziah pui a, kum hnih chhung hna hi thawkin May 2016-ah kawng siam hi zo hman turin an inrem ta a, kawng siam hian kawng phah that bakah side drain, slab culvert leh protection works te a huam vek a ni.

Mahse, MB-a engineer te chhinchhiah dan chuan contractor hian hna hi a thawk zo hma hle a, Kum 2016 laihawla zo tura ngaih a nih laiin kum 2014 December thla khan a thawk zo der mai. MB-a hetianga chhinchhiah a nih hnu hian CADC Executive Secretary chuan a hna thawh man cheng vbc 1.21 chu contractor hnenah February, 2015 khan a pechhuak nghal vek bawk.

Mahse, CAG-in a kum 2015 December-a he hnathawh hi a hmuna a enfiah chuan side drain te, protection works leh slab culvert te hi contractor-in thawk zo tawh mahsela, kawng phah hna chu a lo la thawk zo hauh lo tih a hmuchhuak a, boulder phah mek chauh a a lo ni nghe nghe.

Hemi chungchang hi CAG-in District Council Affairs Department hnenah a thlen hnu chuan department hotutute’n MB a chhinchhiah dan dik lo nasa tak awm chhan chu sawiin, kawng chu km 2 ni lovin km 3 tur a nih leh si vang a ni a.

Tin, leimin avangin kawng hi a kual phah bawk a, contractor in hna chu thawh zawh ngei a in tiam avangin leh retaining wall te siam a ngaih dawn avangin bill chu pek hmasak a ni ta mai niin an sawi a.

Ama’rawhchu, CAG chuan hnathawh reng reng chu thawh belh tur a awm a nih phawt chuan kalphung duan sa a awm a, chutianga kalpui a nih theih reng laiin MB-ah dik lo taka chhinchhiah a lo awm leh chu chu pawm a nih mai avangin a mawhphurtu chu zawnchhuah ngei ni se tiin rawtna a siam.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s