Dan leh Hrai/ Maoist hel, TA/DA, Zu leh police constable ban te

Kum 2006-a an pawisa dawn tur an dawn loh chhuanlama an pu te thu awih loh vanga Chhattisgarh kal tur Mizoram Police constable ban tak te chuan ban an nih dan High Court ah bei let fat fat mahsela, court chuan sum leh paia harsatna an nei an tihlaiin zu an rui thei thova, ban an phu reng a ni tiin thutlukna a siam

v2i21-Dan leh hrai

An pu te thu an awih loh avanga police 27 ban tak te’n court hmaa thu an sawi dan chuan hetiang hian thil a thleng: 2nd India Reserve (IR) Battalion-ah constable vek an ni a, kum 2006 khan Chhattisgarh-a Maoist hel bei turin Vairengte-a Indian Army training na hmunpui – Counter Insurgency and Jungle Warfare School, CIJWS – ah ral beih an zir a. Chuta an awm lai chuan kar hnih chhung TA/DA pek an ni lo va, an pu te hnenah an pawisa dawn tur chu pe thuai turin an ngen a. Chumi hnu chuan Khawzawla an battalion hmunpui an pan ta a. Mahse, Khawzawl an han thlen chuan battalion Commandant-in suspension order a pe vek a, ni hnih hnu lawkah chuan banna lehkha an dawng zui nghal bawk.

Hetia ban an nih hnu kum hnihna ah heng constable ban tak te hian Gauhati High Court Aizawl Bench-ah ban an nih dan sawiselin Writ Petition an thehlut a, HC chuan ban an nih hma hian departmental enquiry kaltlangin an thil tihsual te hrilh an nih hmasak loh bakah an thiamthu sawina hun pek an nih loh avangin ban an nihna chu dan kalh a ni a ti ta a.

Court-in hetiang thutlukna a neih tak si avang hian kum 2009 kum tir lam khan Police hotute chuan heng constable te hi ban khawp hial tawk tura an thil tihsual chu anmahni ngei hi a hriattir a, an thil tihsual te chu heti hian sawi a ni: August 21, 2008 zan dar 7:30 vel khan heng IR constable rual te hi ral beih an zirna hmunah an pungkhawm a, an thawhpui te chu nuar ve turin leh camp chhuahsan turin fuihpawrh an tum nghe nghe a. An company hotupa Havildar chuan an thawhpuite a khap laiin heng constable te hian kutthlak an tum hial a, a hnu deuhah chuan an bungrua te nen camp chu an chhuahsan lui a, Vairengte police-te’n check gate an siam te pawh chu tichhia in Aizawl lam an pan ta a ni.

Tisual anga puh an nihna hi constable te chuan an chhanglet a, anni sawi dan chuan hetianga an chet chhan chu kar hnih chhung TA/DA pek an nih loh vang leh sum lama an harsat vangin an nitin mamawh chi hrang hrang – sahbawn, hair oil, tui in tur leh thingpui – leina tur pawh an nei tawh lo niin an sawi a. Tin, an thawhpuite’n an TA/DA te chu an pute’n an lak chhuah tawh thu leh an battalion hmunpuiah an kawl tawh thu an hrilh avangin Khawzawl lam panin an kal ta mai niin an sawi bawk.

Constable te’n hetianga an chhan hnu hian enquiry officer chuan a report a thehlut ta a, Police hotute chuan a hma ang thovin constable te hi thu awih loh vangin Mizoram Police Manual tlawh chhanin August 27, 2009 khan an ban leh ta tho a, suspend an nih chhung zawng pawh chu an duty lo anga ngaih turin thutlukna an siam ta a ni.

Constable te hian ban an nih dan hi HC-ah vek an khinglet leh a, an ukil PC Prusty chuan ban an nihna order chu dan kalh a ni tiin, Mizoram Police Manual, 2005 chu Section 12, Indian Police Act, 1861 hnuaia duan a ni lo va, chuvang chuan constable ban an nihna dan tlawhchhan Police Manual chu dan kalh a ni a ti a.

Tin, Supreme Court-in kum 1996-a a lo rel tawh angin, police hnathawk te’n an dawn ngei ngei tur an dawn loh vanga lungawi lohna lantir nan buaina siam lova an nuar a nih chuan ban tur hial khawpa thil tihsual an nei lo a ti bawk a.

Hetih lai hian, sorkar ukil Rosangzuala Ralte chuan Mizoram Police Manual hi Indian Police Act section 46 hnuaia duan a nih vangin constable te ukil thusawi chu thu belhchian dawl lo a ni a ti thung a, Police Manual chu dan ang thlapa duan a nih vangin manual hnuaiah chuan constable te hi ban an ni thei ngei a ti bawk.

Dan chu dan lo ni ta se, sorkar ukil chuan hemi tuma police nuar te hi mi sawmthum tling lo an ni a, an battalion awmna – 2nd IR – ami police 791 zet chu training camp ah hian an awm ve bawk a, heng constable nuar ta te hi mi tlemte chauh an ni a, TA/DA pek ngiata an chet chhan ber pawh hi zu leina tur an neih loh vang chauh a ni tiin court hmaah a sawi a.

HC chuan lehlam lehlam ukil te thusawi a ngaihthlak hnu hian Mizoram Police Manual hi dan kalh a ni reng em tih a ngaihtuah hmasa a. Sorkar ukil sawi angin Manual hi Indian Police Act Section 46 hnuaia duan a ni ngei a, chuvang chuan dan kalh a ni lo va. Chu mai bakah, Supreme Court-in kum 2004 khan dan chuan danpui tlawhchhan a neih phawt chuan a tlawhchhan bung leh chang chu ziah sual palh awm mahse, dan chu dan dik lo a ni kher chuang lova, Mizoram Police Manual pawh hi dan dik lo a ni chuang lo a ti bawk a ni.

Tin, HC chuan enquiry report-a thu inziah dan chu sawiin constable te hian an TA/DA chu dawng lovin sum leh pai ah harsatna tawk deuh mahsela, zu an lei tho a, nawrh an huaihawt zan pawh khan a tam zawk chuan zu an rui tho a. Chu bakah, an thawhpui dangte chuan sum leh pai harsatna an tawh ve tho laiin nawrh an huaihawt ve kher lova. Tin, nawrh huaihawttu te hian an nawrh hma in an TA/DA dawn loh vangin an hotutue hnenah thu an thlen lo hrim hrim bawk a, nawrh in an tan nghal tawp mai a. A thu hrimah, constable te hi force mi leh sa an ni a, an aia thu zawkte thu an awih tur a ni a. Supreme Court pawhin kum 2011 khan force mi chu phalna la hmasa lova duty-na hmunah a kal lo a nih chuan ban khawp hial tawk mahse, a awm lo lem lo tiin ro a rel tawh bakah constable te hian ban an nih dan ah ngaihdan kawi leh tih hrehawm duh vang hrim hrima an chunga hmala an awm tih an sawi bawk si loh avangin HC chuan ban an nih dan hi dan ang thlap a ni e tiin June 23 khan thutlukna a siam ta a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s