Islamic State: Indonaah chak lo mahse a chimit mai hmel loh

Khawvelin a ngaihven em em IS firfiak pawl chu tangrual sipaite’n an hmunpui ah hneh mahse, an mi leh sa te chu Afghanistan, Europe leh Africa-ah an tlan darh mek ni a hriat a ni a. Firfiak pawl dang al-Qaida-in IS sipaite hi chhawm a tum mek bakah, phuba lak duhna rilru chu firfiak tamtak ngaihtuahnaah a in tuh mek zel

800 (2)

Iraq-a Mosul khua leh Syria-a Raqqa khawpui te atangin Islamic State (IS) firfiakte chu nawr chhuah mek niin khawpuia an tawm hmun te chu tangrual sipaite’n suat sak mek mahsela, he firfiak pawl hi hmun hrang hranga tantu nei anih avang leh internet hmanga inpawh tak anih reng avangin a chimit mai loh hmel a, hun lo kal zel turah chuan “indona thianghlim” (jihad) a la puan theih zel hmel hle.

IS hian kum khat chuang chu Mosul leh Raqqa, khawvel pum huap jihad-a langsar tak khua te atang hian hnawhchhuah a ni ngei dawn tih a inhre tawh a. Chutih hun lai atang daih tawh chuan tlawmna karah pawh nise hmun hrang hranga he pawl tantu te a fuih thar sauh sauh a, indona kal mek te hi an zawh fel hunah he firfiak pawl thiltum chu a hlawhtling ang nge a hlawhchham ang tih a hriat theih chauh dawn niin The Associated Press chuan a ziak.

 

Khawvel hmun hrang hrangah IS tlan darh

IS firfiak za chuang zet chu kumin February thla atang khan Afghanistan ah an lo pem tawh a, a hnu ah 20 emaw bawr vel chu Afghanistan-ah bawk hian an thleng leh tih thu chu kar hmasaa United Nations-in a tarlang a.

IS hi Afghan tamtakin tan lo hle mahse, thalai engemawzat zingah chuan a lar viau a, a lar chhan pakhat chu Afghanistan-a kum tamtak lo awm tawh Taliban firfiak pawl in a sipai te thla khatah US$ 500 – 600 emaw a pek theih laiin IS hian chumi let emaw zet chu a hlawh tir theih vang a ni.

Mahse, IS firfiak tamtak chu Afghanistan nilovin Europe leh Africa hmar lamah an kal darh mek ni a hriat a ni bawk a, Europe-ah chuan hei hian mi a ti ralkhel hle tawh a, Europe khawmualpuia raltlan maktaduai fe tlulut te zingah hian IS firfiakte an in phum ru reng thei tih chu hlau an tam hle. Africa hmar lam lah hi hmun ralmuang lo, silai lei mai theihna hmun leh ralthuam a tam em em na a lo ni lehzel bawk nen.

RAND think tank-a mithiam pakhat Colin Clark sawi dan chuan IS hi khawvel pum huap ni a sawi thin nimahsela, a hnuaia sipai te chu hmun khatah a vai vaiin an kal hmel loh hle a, anmahni pian leh murna hmunah theuh kir lehin chung hmunah te chuan intihbuaina chi hrang hrangah an in tuk luh a rinawm zawk.

 

Firfiak pawl inkarah innghirnghona

Al-Qaida leh Islamic State hi kum 2014 khan an inthen a, an intthen chhan tak hi rindan leh duh dan inan loh vang aiin an thiltih duh dan vang zawk a ni. Al-Qaida hian tunhnai atang khan Syria-a Idlib leh province dang thenkhatah chuan IS firfiakte a do tan bawk. Al-Qaida leh IS te hian in an na an ngah hle a, an pahnih hian Osama bin Laden zsa thiltum te hlenchhuak an tum ve ve. Tuna al-Qaida-in firfiak pawl dang a beihna hi a nasa zual zel maithei: mithiamte chuan al-Qaida hian IS hi a hnuaia dah a tum ngei leh chumi hlen turin al-Qaida zawm duhlo firfiakte chu a thah hmiah hmiah mai zel an ring.

Georgetown University-a firfiakte chungchang zirmi George Hoffman sawi dan chuan IS-a firfiak tamtak te’n kum hnih-thum kaltaa Syria an pan nachhan ber chu al-Qaida zawm an tum vang a ni a. Mahse, Syria an thlen takah chuan IS hi pawl chak zawk leh hnehna chang thei zawk ni a an hriat vangin IS an zawm ta zawk a. Hoffman chuan heti anih vang hian IS firfiak tamtak chuan al-Qaida zawm leh hnuhnawh chu an harsat vak a ring lem lo.

 

Firfiakna ti punlun thei tu: Sunni Mosolman te hnuaihnunna

A hunlai chuan IS khan ram zau tak a awp a, Sunni Mosolman tamtak te chuan he ram hi an ngaisangin an thlahlel hle a, a chhan chu Iraq-a Sunni te Shia Mosolman rorelna hnuaia lungawi lo tan tawmhimna tha tak leh an duh ang tak sorkar a din vang a ni pakhat. Tunah hian khawvel chuan Iraq sorkar hi Sunni te chhawmdawl hle turin an chah lawk tawh a, mahse IS awp hnu ram, Sunni-te awm tamna ber ah te hian indona a lo nasat tawh em avangin indona thlen hma hun anga chawikan leh chhung chu a rei hle dawn niin mithiamte’n an ngai.

 

Chaklohna vangin phuba lak duhna a piang

Hun engemaw thleng kha chuan IS insawimawina video ah te chuan Sunni-te tana hmun nuam siamtu anih zia inchhalin  buh seng lem te, naupang infiam lai lem te leh damlote a enkawl that zia te a auchhuah pui nasa hle a. Mahse, tun hnu deuhah hi chuan Mosolman ram indo thlawhna te’n nasa taka an bomb lai video a tichhuak nasa ta hle. Hei hian awmze thui tak a nei: IS hian phuba lak duhna rilru amah tantute zingah a tuh mek a ni. Thla hmasaa London Bridge a firfiakte an chet khan IS chuan phuba lakna thil anih thu a puang anih kha.

IS len ber lai chuan a hnuaiah sipai sing fe an awm a, mahse indo thlawhna te’n an zinga tam zawk chu a that tawh niin a ngaih theih. Chutih rual chuan, sipai ngah ringawt hian firfiak pawl a ti changtlung kher lem lo thung. “Firfiakna chuan sipai tamtak a mamawh kher lo. Mi tlemte pawhin an hmelma ram leh mipui zingah nasa takin chhiatna an thlen thei a, an rikrap nasa thei hle bawk. Chu chuan firfiakna chu a chawm nung reng thei. Phuba lak duhna hi mihring rilru hneh thei tak thil a ni a, phuba lakna chuan lawmna a thlen a, phuba la tu chuan a tih tur diktak niin a ngai thei,” tiin Hoffman chuan a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s