Manipur: Tualchhung indona dai thei lo a tualthi te chhiarpui – Part II

Hel pawl an tam em emna India hmarchhaka Manipur state-ah chuan kum 1979 leh 2012 inkar chhung khan venghimtu sipaite’n diklo takin mi 1,500 chuang an that a. Supreme Court chuan nikum khan thutlukna pawimawh zet mai siamin hetianga nunna chan chhungte leh helam buaipuitute chu inthahna chungchang hi chhui a an thil hmuh leh hriatte lakhawm turin a ti a. Court chuan hemi chungchang chhui tur hi a din dawn nge dawn lo tih chu July thla chhung hian thutlukna a siam dawn a. Hemi chungchang chhui hian BBC correspondent Soutik Biswas chu Manipur-ah a han zin a, heti hian a thilhmuh a ziak:

(He thuziah part-I chhiar turin hetah)

An hmangaih tak tak chantute’n Police chet dan an sawisel lai hian Police leh sipai lam chuan heng inkahnate hi a lem ni lovin a tak a nih thu an sawi a, hel pawl mite nena an inkahna-ah hel pawl leh firfiak an kaphlum thin niin tan an khawh tlat a. Sorkar pawhin nikuma Court sang ber a hrilh dan chuan Manipur mipui maktaduai 2 leh nuai 3 velte chu hel 5,000 velin hlauhna bawihah an siam niin a sawi a. Kum 2000 leh 2012 inkar chhung khan helho hian Police leh paramilitary mi 365 an that niin a sawi bawk.

Hetia sorkar, Police leh sipaite an insawi thiam mek lai hian thil rapthlak tak puanchhuah a ni ta a! Police Commando pakhat Herojit Singh chuan nikum January thla khan chanchinbumite hnenah kum 2009 khan Imphal dawrpui lun laiah hel nia rinhlelh ralthuam kenglo chu a kahhlum thu a puang a. July thla-a an kawmna-ah phei chuan mi 100 chuang a thah thu puangin a mi thahte hi a lehkhabu-ah a chhinchhiah vek niin a sawi a ni.

Thla hlui khan hotel pindanah amah ngei hi ka (BBC Correspondent Soutik Biswas) hmu a, sorkar hnathawk fapa, kum 36-a upa he Police hian a rilru a hah thu a sawi a. Kum 2 chhung chu zanah a muthilh mumal theih tawhloh thu a sawi. Khawpui chhunga lirthei chesualah thi-lo-a-ruangin a chhuak tawh a, tam tak chuan hmelma a ngah tawh em avangin mi-in thah an tum a nih an ring a ni.

Mi engzat nge a thah tawh chiah tih ka zawh chuan, “A kimchangin ka hre tawhlo,” a ti a. “Chu mi 100 aiin an tam elo?” tia ka zawh chuan, “Aw” a ti.

Mi a thah avang hian inchhirna a neih loh thu a sawi a, eng hremna pawh tuar turin a inpeih tih a sawi bawk. “Ka tihtura lum ka ti a ni mai a, ka aia lalte thupek ka zawm a ni mai. Ka inpuanna chhan hi chu thudik sawi chhuah a tul a ka hriat vang mai a ni,” a ti.

Hetia a inpuan hnu hian a nunah harsatna tam tak a tawk a. Central Bureau of Investigation (CBI) detective te chuan Imphal dawrpui lun laia kahhlum tak Chungkham Sanjit (23) thih dan kha chhui-in he commando hi vawi 10 chuang thu an zawt fiah tawh a. Herojit Singh hi a nungchang mawilo leh thu-awihloh avangin vawi tam tak a hna atanga chawlh tir a ni tawh a, lak luh leh zel erawh chu a ni.

Chhun lamah chuan a fate bulah hun hmangin in lama tihtura zirtirtute rawn hawn tirte a tihpui thin a. A ar pakhat a damloh tum chuan a mangang em em mai a, a pawm a, ran daktawr hnenah a va hruai a ni.

Manipur Police lal ber lo ni tawh, tun sorkar thara Deputy Chief Minister ni ta Yumnam Joykumar Singh chuan Herojit Singh hian inthahna chungchanga a thiltih dan hi a sawi uar mai mai niin a puh a. “Dawt a sawi a nih hi. Inkahna vawi 10 atanga vawi 15 velah chuan a tel ve mai thei a. Mahse, mi tam tak that angin a insawi a. Court hian inkahna engzatah nge a tel tih hi zawt chhuak se a tha ang,” a ti a. Police lal a nih laia khauh tak mai ni a sawi thin Singh-a hian mimal zalenna humhalhtu pawlte chu inkahna lem lem awm zat an sawi danah an uar lu deuh niin a sawi bawk. “Dan pela inthahna hi tlem a zawng chu a awm mai thei a, mahse an sawi ang em em a tam hi chu a nih ka ring lo. Dan kalhin mi 1,500 thah lo ni ta sela chuan kan state-ah hian lungawilohna an lan tir nasa ngawt ang,” tiin a sawi a.

Police lal ber a nih lai khan Police 20,000 atanga 34,000 bawr vel chu hui khawmin helho do kawnga hmahruaitu atan a hmang a. Helna leh tukluih pawisa khawn avang hian Manipur-a nunphung pangngai a sawp chhe tep niin a sawi a. A hote hnenah chuan,”Ralthuam in nei a nih chuan in kap let thei a lawm,” tiin a hrilh thin a ni.

Mitthi kaih thawh a harsa ang chiahin mitthi khin hi a awlsam a. Hun a lo rei a, mihring hriat rengna a lo daihrei lova. Post-mortem report te, Police hnena thu thehluhte chu hun a rei hnu-ah a lo engin a lo uk chuar ta thin a ni. Beiseina a lo tlahniam a. Khua rei-in lunglen a hnem tih ang maiin hun kal zel hian hliam a tidam a, inenletna hun a siam a; a chang chuan tihtur pawimawh i nei tih inhriat chhuahna’n i hmang thei bawk.

Supreme Court inrawlhna avanga huaisenna thar nei ta Manipur-a an chhungte kahhlum takte chuan an dikna leh chanvo sual chhuak turin an bei ta chiam mai a. A then chu kum tam tak kal ta a an hmangaih kal ta te thih dan thubuai bawhzui an ni. Inthahna chu a tawp tawh a, mahse dan bawhchhetute hrem an la ni tlat lo. Dikna hlen chhuak tura India rorelna kalphung muang takah hian beiseina sang tak an nei tihna a ni lova, a tuartu chhungkuate chuan an huaisenna an kaitho thar a ni. Tam tak chuan an fate emaw an chhungte dang emaw, diklo taka an pa, unau, fapa, fanu leh nupuite diklo taka hel anga puhna avanga an hming chhiat zui duhloh vanga hetianga chet duh hi an nih thu an sawi a. Chhungkaw zinga mi pakhat a hmingchhiat avanga an tu leh fate tawmim tur kha an ngai ngamlo a ni ber.

“Ka fapate vang hian ka bei fat fat a ni. Miin ka fate hi hel pawl mi fapa ni a an hmuh ka duh lo. Ka pasal hming chhiatna atanga ka tih fihlim theih chuan tiin ka fate tan ka bei a ni,” tiin Neena Nngmaithem chuan a sawi a, “Mitthi tawhte hi theihnghilh fihlim vek tur an nilo,” a ti bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s