MSU in cement manah an duh dan aia sangin company inremna ziahpui

Mizo Students Union (MSU) in Aizawl ah cement man Rs. 400 aia to in mipui lei lo se an tih avangin cement khuahkhirh mahse, Valley Strong Cement company te nen Aizawlah bag khat Rs. 425-a hralh theih turin inremna an ziak.

 

MSU hian cement company-te’n Mizo mipuite an bum nasat thu leh state danga an sum hloh hmuh kir nan Mizoram an hmang niin an lo sawi tawh a, cement man tur zat an bituk avangin Mizoram pumah cement a harsat phah bakah in sa lai a nghawng nasa hle.

MSU President RB Lalmalsawma chuan June 19 khan an pisa ah thuthar la khawmtute a kawm a, hemi tum hian Mizoramah cement company pariat an rawn luh thu a sawi bakah heng company te hian an cement te Mizorama phur lut turin Carrying & Forwarding (C&F) an neih thu te, cement rate an zirchianna leh state dangte nena kan inthlauhna te, non-trade hoin an lei theihna zatte an khaikhin vek hnuah, Mizorama cement man a sang uchuak hle tih an hriat thu a sawi a, “Cement company-te hian chhun zan zawmin min bum reng a, state danga eng emaw chhiatna vanga an sum hlohte hmuh let nan min hmang nasa tih hi kan hmuh dan a ni,” a ti.

 

Cement vang nghal

MSU in hetianga an sawi hnu leh cement an khuahkhirh avangin Mizoramah cement a vang nghal a, in sa lai tam tak an buai phah a, C&F te pawhin an kudamah dah khawl an neih loh avangin a zuartute pawhin zawrh tur an nei lo a, cement zuar tam tak chuan state pawn atangin cement an zu la hial a ni.

 

MSU in an duh dan ni lovin company an inrem pui

MSU hian Aizawl ah cement man chu Rs. 400 aiin a to tur a ni lo ti mahse, anmahni vek hian an duh dan an bawhchhia a tih theih a, Topcem company nen Aizawla Rs. 420 aia to lo leh Mizoram hmun dangah Rs. 500 aia ti loa zuar turin inremna an lo ziak tawh a, July 8 khan khan C&F Agent, Dealers aiawhte leh MSU te chuan inremna ziak lehin Valley Strong Cement te hian Aizawl ah bag khat Rs. 425 aia to lo leh Mizoram hmun dang ah pawh Rs. 500 aia to lo – . Lunglei Rs. 475, Siaha Rs. 500, Champhai Rs. 475, Serchhip Rs. 450, Lawngtlai Rs. 495, Hnahthial Rs. 465, Khawzawl Rs. 470 – a zuar turin an inrem leh a ni.

 

MSU President insawifiah

MSU President RB Lalmalsawma chuan in salai te’n cement an mamawh em avangin MSU chu an tawlh hret niin The Frontier Despatch (TFD) a hrilh a, “Kan duhthu sam lo mahse, mipuite Rs. 400 aia to loa lei lo tura kan ngenna a hlawhtling vek thei lo a, mamawhna a san avangin kan duh aia toa inremna siampui an ngai rih a, chutih rual chuan tunah hian tunah hian cement man a tla hniam tawh hle a, inremna kan ziahpui loh zingah pawh Dalmia in a hmaa Aizawla bag khat Rs. 480 an tih kha Rs. 450 in an zuar tawh dawn a, Star Cement Rs. 460 ni thin pawh Rs. 440 in an zuar dawn a, hma kan sawn hret ni ah kan ngai,” a ti a, “Nakinah chuan MSU hmalakna avangin Rs. 400 aia to loa an lei theih kan la beisei tlat a ni,” a ti bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s