Polythene kg 11,000 chuangin thla tin Aizawl a run

Khawvel tuifinriat te leh hmun kilkhawr ber ber te pawh plastic leh polythene-in a run mek lai in, Mizoram pawh kan bang chuang hauh lo. Awlsam taka kan thil lei te khai nan chauha kan ngaih laiin, polythene bag man nei lo emaw kan tih hian kan leilung a tihchhe nasa hle a, hman man kan la chawi dawn chauh niin a lang

367

 

Tu pawh in kan thil tawn tawh hnu a ni awm e. Dawr ah kan kal a, kan thil lei te khai nan dawrkai te’n polythene-ah min dah khawm sak a, kan khai haw mai a, polythene man kan chawi ngai lo tlangpui bawk. Mahse, kan polythene hman man kan chawi loh hian awmzia chi hrang hrang a nei.

Pakhatna ah chuan, ramchhung hmun dang ang lo takin Mizoramah hian polythene hi a tlawm hle a. A tlawm chhan pakhat chu India-ah danin a khuahkhirh angin polythene chhah lam hi micron 50 tal a tling tur a ni a, heti zat a tlin chuan thil dang siam nan a hman nawn (recycle) theih vang a ni a. Tin, polythene chhah chi hi chu a man a tlawm lo va, dawrkai te’n an thlawna pe chhuak mai lovin, anmahni dawr tute an lei tir thin a ni.

Mahse, Mizoramah chuan hetianga polythene chhah hi kan hmang lem lo. Tualchhunga polythene kan hmuh tam zawk hi India rama siam ni lovin Myanmar atanga lak luh deuh vek an ni a, hei hi dan kalh a nih mai mai bakah, Myanmar polythene lo lut te hi an pan em em a, recycle hleihtheih an ni lo. Mi thiamte chhut dan chuan polythene hi kum 1,000 hnu ah pawh a la tawih ral thei lova, tet te telh telh mahse, leilungah hian a awm reng tluk a ni.

A tawi zawnga sawi chuan, Myanmar mite’n polythene an siam Mizorama an rawn thawn luh hian sum tam tak an hmuh phah bakah heng tawih ral thei lo te hi Mizoramah an rawn paih tihna a ni.

352

Polythene a thlawna hman mai tur a awm reng hian awmzia a neih dan dang leh chu hei hi a ni: a thlawn a nih miau avangin tu pawhin kan hmang nasa a, kan thil leite khaina tur mahnia inken chawp ai chuan dawrkaite’n khaina tura min pek mai thin avangin a hluar hle a. Tin, tlawm ta na na na chu, a aia leilung tichhe lo leh ti bawlhhlawh lo hman kan tum loh phah a, polythene bawk hi kan hmang leh mai thin ti ila a sual tam pui awm lo ve.

Science Teachers’ Association of Mizoram (STAM) mi thiamte’n Aizawl Municipal Corporation huam chhunga polythene hman dan an zirchianna, tunkar Thawhtanni (July 10)-a AMC hnena an thehluha an tarlan dan chuan Aizawl khawpuia chengte hian thla khatah ringawt polythene hi kg 11,325.4 lai kan hmang!

Mizoram khawpui lian bera polythene kan hman zozai te hi engtin nge kan tih riral a, khawi ah nge kan paih kan tih chuan, chhanna tam tak a awm lem lo.

Mi thenkhat, khua leh tui tha nih tum lem lo chuan venchhung kawr ah te kan paih mai a, mi dang chuan AMC leh Local Council tangrualin bawlhhlawh paih motor ah kan hlang lut zel a. Mi tlemte chuan a remchan changin kan hal ral ve bawk awm e.

354

Polythene halral hi a hrisel lo hle tih chu sawi tam a ngai awm love. Chutih rual chuan kawrha paih mai hian leilung a ti chhe viau thei bawk a. STAM zirchiannaa puipa pakhat, Dr Laldinpuia, Pachhunga University College-a Assistant Professor, Geology hnuaia landslide (leimin) chungchanga Ph.D nei sawi dan chuan polythene leh plastic paih mai mai hian leilung a ti nghet lo hle a. Tin, kawra paih te pawh hian kawr a hnawhping zel a, tui put a tam phah a, hei hian a bulhnai leilung te pawh a ti nghet lovin, leimin tam tak hi a chhan pakhatah chuan polythene paih fimkhur loh vang a ni thei niin a sawi.

Tun hnu hi chuan khawpui chhunga veng tam zawkah bawlhhlawh paih motor an tlan tawh avangin chhungkaw tam takin kan polythene hman te chu heng lirthei ah te hian kan hlang mai a, lirthei te hian Aizawl bawlhhlawh paihna hmunpui ber, Tuirial dumping ground ah an chhung khawm ta vek mai a ni.

STAM zirchianna in a tarlan dan chuan Tuirial Dumping Ground hi kum 1997 May thla atang khan hman tan a ni a, ni khatah truck 85 phurh tawk bawlhhlawh chi hrang hrang – hnahthel te, chaw bangnawi te, lehkha chhia te, puan chhia te, plastic leh polythene te, tin chhia leh thir chhia te, um te leh darthlalang keh them te – chu helai hmunah hian paih ziah a ni. Dumping ground ah hian nitin hnawmhnawk khawnkhawmtute (rag-pickers) 40 atanga 50 bawr velin recycle theih tur thil chi hrang hrang an zawng khawm leh thin a, an hmuh ang ang te chu an hralh leh chhawng thin.

Heti a nih lai hian bawlhhlawh zinga hman tangkai theih lei khawmtute (scrap dealers) zawng zawng mai chuan polythene ai chuan plastic um leh plastic atanga thildang te an duh zawk vek a. Tin, rag-pickers te pawhin polythene chu chhar chhung a rei em vang te, polythene 350 emaw lai chhar khawm hnu ah kg 1 a tling chauh avang te leh tlawm te lo chuan hralh theih a nih loh avangin an khawnkhawm peih chuang lo va. Hei vang hian dumping ground ah hian kum sangkhat hnu ah pawh la tawihral lo tura ngaih polythene te hi an awm reng mai a ni.

365

Heti khawpa leilung tana thil hnawksak thei a nih avang hian sorkar laipui pawhin kum 2011 khan plastic atanga siam (polythene tiamin) bawlhhlawh te enkawl dan tur dan a lo duang tawh a, nikum khan a thlakna tur dan thar – Plastic Waste Management (PWM) Rules 2016 – khauh zawk a duang leh a. AMC chuan he PWM dan thar hi hman a nih hma in bawlhhlawh chang mai thei polythene hi eng ang takin nge Aizawlin a hman hre duhin STAM hi zirchiang turin a ruai ta a ni.

PWM dan thara a inziah dan chuan plastic leh polythene siamtu te, chah lut tute leh an thilsiam te heng plactic leh polythene-a tuama hralhchhuak tute chuan an sumdawnna kaihhnawih atanga bawlhhlawh chhuak reng reng ah mawh an phur tawh tur a ni a, heng bawlhhlawh te an sawngbawl dan tur felfai taka ruahmanna siam lo te hnenah chuan state tina Polution Control Board te’n siam phalna an pe tawh lo tur a ni.

Mahse, hei ai maha Mizorama plastic leh polythene hmanga sumdawnna he danin a khawih dan tur chu hei hi a ni: PWM dan thar hnuaiah chuan dawrkai tu pawh, an thil zawrh te fun nan leh hralh nana polythene hman tumte chuan AMC hnuaiah an in register tur a ni a. Hetih rual hian AMC chuan dan siamin polythene pechhuak tur sumdawng te hnena atangin kum tin cheng 48,000 (thlakatah cheng 4,000 zel) an khawn ang a, he sum tlingkhawm hi plastic leh polythene atanga bawlhhawlh insiam then fai nan hman a ni ang a. Tin, dawrkai te hian langsar takin polythene chu an hnenah a lei theih tih an tar bawk tur a ni ang.

STAM pawhin he dan thar hi hman ni se tiin AMC hnena a zirchianna report hi a thehlut a, chu mai bakah chuan Myanmar atanga polythene lak luh hi khap ni se tih te rawtna a thlen a. Kum 2/3 chhungin polythene chu hman phal loh tawp ni se a ti bawk.

AMC Commissioner Dr H Lalthlangliana chuan Plastic Waste Management Rules hman a nih hunah AMC in polythene hi pawngpaw khap an tum loh thu The Frontier Despatch (TFD) a hrilh a, “Awmze nei leh dan ang thlapa khap kan duh dawn a, kan khap loh pawhin a hman dan tihtlem kan ti maithei bawk a, chumi atan chuan kan lo inhmakhua a ni,” a ti a, polythene hian leilung a tichhia a, chuvang chuan a thlakna hi zawn hmuh a ngai tawh a, hemi atan hian mi thiamte’n hma an la hmasa ta niin a sawi.

 

STAM-in enge an hmuhchhuah?

STAM hian Aizawl khawpuia dawr 2,408 te chuan thil khai nana hman chi polythene kg 8,500.53 leh thil fun nana hman polythene kg 2,824.87 chu thla tin an hmang thin.Mi hrang hrang chhan tura zawhna (questionnaire) an siam atangin zaa 98.78 in polythene hi an hmang tih STAM chuan a hmuchhuak a, heng zinga zaa 77.89 te chuan thil fun nan an hmang a, zaa 1.21 te’n ei tur fun that nan an hmang. Tin, zaa 44.78 te chuan kar tin polythene pahnih aia tam an hmang a, polythene hmangtu zinga zaa 29.57 te chuan vawi khat an hman chu an paih laiin zaa 52.67 te chuan an hmang nawn.

 

Hunpui laiin thermo thleng leh no hmang nasa: STAM zirchianna

Kristian te hunpui ber, Krismas leh Kumthar laiin Kohhran zawng zawngin thingpui ruai leh ruaipui an siam thin a, heng ruai ah te hian Aizawl ah chuan chaw ei nan aluminium leh steel thleng te hman a ni mang tawh lo a, thingpui ruai ah pawh chhang dah nan thermo thleng te hman a tam tawh hle a, hei bakah hian inneih lawmna ah pawh thingpui ruai leh ruai ah thermo thleng leh no hman a tam hle a.

STAM hian thil tihkhawmna liam tham 129 ah zir bingna hi an nei a, chung zinga zaa 48.84 chu Presbyterian Kohhran thil tih khawm a ni a, zaa 15.50 chu Chhandamna Sipai Pawl, zaa 11.63 chu UPC Kohhran pahnih thil tihkhawm, 10.08 chu Baptist Kohhran thil tihkhawm niin a dang zaa 13.95 chu inneih lawmna, zirna in, ei leh in siamtute leh Kohhran te zawkte an ni.

AMC Ward 19-a Kohhran, pawl, inneih leh thil tihkhawmna 129 ah hian plastic thleng hman zat chu 3,49,530 a ni a, plastic no hman zat chu 7,88,725 niin heng an zir chianna zawng zawngte hian plastic thleng leh no an hmang vek a, hnawmhnawk leh ruai ilo bang dah khawm nan polythene bag lian an hmang vek bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s