23 nge 3!?

Doctor 23 lak thar zingah a nghet lo a sorkara thawksa 20 an tel avang leh an aiawh lak a la nih loh avangin doctor indaih phah lo

 

Tun hnai khan Champhai leh Mamita tlawmngai pawlte’n sorkar in doctor a lak thar te an District Hospital-a a dah belh an lawm viau laia a awm sa an sawn chhuak erawh lungawi thlak an tih loh thu an sawi a. Sorkar in Mizoram Public Service Commission (MPSC) kal tlanga doctor 23 a lak te zinga 20 te chu sorkar-a a nghet loa thawk sa an tih The Frontier Despatch  (TFD)  chuan a chhuichian hnu ah a hmuchhuak a, heng mite aiawh tur hi sorkar in a la lak leh si loh avangin sorkar in doctor a neih thar chu pathum chauh an ni tihna a ni a, indaih sawt ngaihna a awm lo a ni.

 

Champhai leh Mamita tlawmngai pawl te thu chhuah

Champhai NGO Coordination Committee chuan July 11 khan thu chhuah siamin an District Hospital-a doctor indaih loh avanga sorkar nawr nana lungawi lohna an lantir lai khan sorkar in doctor a lak belh hunah Champhaia dah turin a ti an ti a, sorkar in doctor a lak thar chu Champhai ah dah mahse, a awm sa hmun danga an sawn si avangin doctor neih belha an inngaih loh thu leh sorkar in Champhai mipui hriselna a ngaipawimawh loa an ngaih thu an sawi a.

Mamita tlawmngai pawl hrang hrang intel khawm pawhin sorkar in Mamita doctor a dah belh ruala a awm sa a sawn chhuak chu tha lo an tih thu an sawi a, Mamit chu district dang zawng aia doctor nei tlem an ni chunga sorkar in doctor pali a pek belh chunga pathum a sawn chhuah sak chu hriatthiam har an tih thu an sawi a, doctor pali a pek belh zinga pakhat phei chu Mamita thawk sa a nih avangin doctor neih belhah an inngai lo niin an sawi a, sorkar in dawhthei taka doctor an dah belh hun nghak tura an tih an nghah laia hetianga sorkar in a ti leh chu an lungawi loh thu an sawi a, sorkar chu Mamit District hospital-a doctor pahnih dah belh turin an phut a ni.

Mizoram khaw lian dang ang lo takin Mamit ah hian private hospital a awm lova, sorkar damdawi in hi mipui rin ber a ni bawk.

 

Hmanhmawh taka doctor lak an nih chhan

Champhai District Hospital-a naupang doctor dah phutin Champhai MZP te chuan February 27 khan Health Minister Lal Thanzara chu lehkha an pe a, Minister chuan a tuk February 28 ah Principal Director ah bawhzui turin a thawn nghal a. Mahse, lehkha hi a bo tak avangin Champhai MZP te chuan sorkar in a ngaihsak lo nia ngaiin April 18 leh 19 khan Champhai ah Total Bandh siamin lungawi lohna an lantir a, lungawi lohna lantir hi MZP mai ni tawh lovin Champhaia tlawmngai pawl hrang hrang intelkhawm an ni a, sorkar bungraw thenkhat tihchhiat a nih avang leh boruak duhawm lo a thlen zel avang te, April 21 ah Champhai District-a MLA panga te bang tura an phut tak avangin April 21 vek hian Home Minister R Lalzirliana pisaa Health Minister Lal Thanzara leh mi pawimawh dang thu khawm chuan ‘a rang thei ang bera doctor lak te, a hmanhmawh thlak avanga interview chauha lak mai te, karleh chhung hian tih tur tul te department in lo ti vek se, MPSC ah a rang thei ang bera la tura ngen ni se tih te leh doctor lak tur te hi a tul dan azirin mamawh zualna hospital – Champhai, Mamit, Kolasib, Siaha, Lawngtlai, Chawngte, Tlabung leh a dang te – ah dah ni rawh se’ tih an rel a ni.

 

MPSC interview tur hming pe tawh, interview a kal leh si lo an tam

Sorkar thutiam bawhzui hian May 1 khan MPSC chuan doctor a lak tur hi hriattirna a chhuah a, diltu 152 lutin chung zinga 149 te dilna chu pawm a ni a. Mahse, mi 121 te’n interview an hmachhawn laiin doctor lak zat tura bithliah aia tam mah, mi 28 chu interview hunah hian an in lan ta lova. Doctor senior pakhat chuan, “Chiang taka sawi theih chu ni lo mahse, kan nau te hian sorkar doctor te hnathawh dan mumal lo chu an hre leh si ang a, interview ah hian an lo kal lo niin ka ngai. Hei hi engemaw chen chu a dik pawh ka ring,” tiin TFD a hrilh a ni.

Interview result hi MPSC chuan June 13 khan tichhuakin mi 23 te chu sorkar ah a ngheta la turin a thlen a, panel list ah mi 10 a dah bawk.

 

Thingtlanga thawk tur doctor lak belh tur awm lo

Mizoramah doctor (MBBS) zir chhuak tam tak awm mahse, a nghet loa thingtlanga thawk tur erawh chuan sorkar in lak tur a hmu ngai mang lo niin Health Department atanga thu dawnna chuan a sawi a, tuna a ngheta lak 23 zinga thawksa mi 20 aiawh tur hi lak nghal tur pawh ni se, diltu an awm mang an rin loh thu an sawi.

Hemi chungchangah hian doctor te chuan an service mumal loh avangin thingtlanga awm hi an hreh niin an sawi a, “Keini doctor ho thiam loh a ni bawk a, sorkar thiam loh a ni bawk,” a ti. Doctor te sawi dan chuan Aizawla thawh aia thlakhlelhawm a awm lo. A chhan chu Aizawlah mipui leh damlo inentir tur an tam ber avangin Aizawla hnathawh chu a hlawk bik a. Sorkar damdawi ina an thawh bakah anmahni private clinic ah te en tur an tam a, chu chuan sum leh pai thawhchhuah lamah a pui nasa hle a. Hei bakah hian an transfer and posting a fel loh avangin thingtlanga an awmin an insawn hun tur a hriat loh niin an sawi.

“Service dang te ngaihtuah chuan kan hnathawh dan hi a fuh lo em a ni. Entirnan, engineer emaw, MCS emaw, MPS emaw te chu thingtlangah awm mahse, kum thum kum li a ral meuh chuan hmun dangah an awm hnai tawh tiin an sawi ngam a, an sawi ang ngei chuan transfer an ni thin reng bawk a. Mahse, keini doctor te chu chutianga sawi ngam thei dinhmun ah kan awm ve tlat lo. Miin doctor te chu Aizawl pawnah an awm duh lo an ti thin a, a dik pawh a dik tho. Chutih rual chuan, thingtlangah kan awmin kan awm hun tur ang chhung te chiang sela, awm hrehin awm loh dan phet kan ngaihtuah kher bik ka ring lo,” tiin doctor pakhat chuan TFD a hrilh.

 

Kum 20 chhungin sorkarin doctor 200 dawn la tawh

Sorkar chuan MPSC kal tlangin kum 1998 atanga vawiin thlengin doctor (Specialist leh Medical Officer) tum sarih a la tawh a, kum 2003-04 sorkar kumah khan Medical Officer (MO) pahnih, 2005-06 ah 26, 2006-07 leh 2007-08 ah MO pakhat ve ve, 2013-2014 ah MO 88, 2015 ah Specialist 10 leh MO 27 leh nikum khan Specialist paruk a la a. Tun tuma doctor lak thar te chhiar tel chuan a vaiin kum 20 chhungin doctor 184 lak an ni tawh tihna a ni a.

Tlem viau angin lang lo mahsela, doctor senior te chuan an indaih lo viau niin an sawi a, TFD-in hemi chungchang a ziah tum pawh khan chhiartu pakhat chuan, “Hospital duty nurse leh doctor te hi darkar 24 duty an nih avangin … tam viau in lang thin mahse, ni khatah tum thum duty ang an ni a, hemi hi hriatthiam loh chuan doctor/nurse indaih lohna hi chu a awm reng mai dawn niin a lang,” tiin a sawi nghe nghe.

 

Doctor 23 la thar mahse, thawksa an tam avangin indaih phah lo

Doctor 23 lak thar zinga 20 te chu National Health Mission (NHM) leh sorkar program dang hnuaia a nghet loa thawk sa an nih avangin doctor 23 lak thar ni mahse, heng doctor 20 te kalsan post hnawhkhah a la nih rih loh avangin doctor mamawh belhna a phuhru lo hle niin TFD chuan a hmu a ni.

Doctor lak thar ni mahse, sorkar-a thawk sa ni lo pathum chauh an awm avang leh a thawksa mi 20 te aiawh tur lak hun hi a la hriat loh avangin tunah rih chuan doctor indaih lohna chu a ngai reng nia thu dawn a ni a, Champhai leh Mamita tlawmngai pawlte’n sorkar in doctor pek belh mahse, a awmsa a laksak leh avangin doctor neih belha an inngaih loh thu an sawi pawh a dik hle nia sawi a ni.

 

Doctor lak belh aiin khawl tha mamawh

Mizoram sorkar hnuaia doctor thawk sa te chuan doctor lak belh ngawt ai chuan sorkar in khawl tha pe se an tan hnathawh a awlsam zawk niin TFD an hrilh a.

Hetih rual hian, sorkar chuan February thla khan New Economic Development Policy (NEDP) hnuaiah damdawi ina khawl mamawh tam tham tak leina tur tender a chhuah a, tunlai hian chung khawl te chu an lo thleng mek zel niin TFD-in thu a dawng a, chuti chung chuan damdawi in thenkhatah heng khawl te hmang thiam technician te an la indaih kim lo hle a, damdawi in thenkhatah phei chuan corridor ah te hun rih an ni nghe nghe a, hman mai theih an la ni lo.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s