Asia/ “Hmelma ka nei lova, huatna ka pai heklo”

China sorkarin mimal chanvo a rap bet ti a a sawisel avanga a puitlin hnu hun chhung tam zawk lung ina tang Liu Xiaobo chuan hmangaihna chungchang sawi fo mahse, ram hruaitute ngeng a chhun lo hle

 

“Hmelma ka nei lova, huatna ka pai heklo,”  tiin kum 2009 a ram leh hnam phatsana puhna chungchanga Beijing Court-in a chungthu a ngaihtuah laiin Liu Xiaobo chuan a sawi chhuak a. Huatna hian mihring finna, thiamna leh rilru ngaihtuahna a ei khawlo thei niin a sawi a. Sorkar huatna chhan tur a ngah mai a, China rama mipui rorelna a awm theihna atana mite hnena an hming ziak tura a tih avang ringawtin taninah a tang dawn a ni a. Mahse, ngaihdamna a dil chu Communist Party hotute chuan an chhang let lo. A hma kuma Nobel Peace Prize chawimawina an pek chu China official-te hian a dawn an remti lova, a chhan ber chu Nobel petu Committee-in “China rama mimal zalenna leh chanvo humhalh tura a beihna avangin” an tih vang a ni.

Sorkar chauh hmelma-ah a insiam lova, amah anga mithiam leh zalenna atana beitu midangte pawh an chak lohna leh dawihzep avangin na tak takin a sawi fawk fawk thin. Thu ziak mi leh zirtirtu a ni a, Chinese leh khawthlang thuril leh ngaihdan hrang hrang chhiar zau em em a ni a, kum 1980 bawr chho atang khan China ram inkaihhruai dan hi a bei tawh a ni. Chinghne mal tlat, mi zingah pawh langsar nalh mai niin a inhmu a, mipui mimir ngainat a hlawh hle.

Kum 1989 a mipui rorelna duhna avanga China ram hmun tina lungawilohna lan tir a nih lai khan tui-lai-rapa awmte chu a sawisel na thei hle a, Columbia a thil a zirlai kalsan a America chhuahsan a nawrhna han zawm ve chu a chak zek zek a. Tiananmen Square-a zirlai nuar pungkhawmte chu mipui rorelna thuthlung awmzia an hriat chian loh avanga zilh hauh kha a tih ngei turah pawh a ngai a. Sipai tirh luh an nih hma ni chiah khan amah leh mithiam dang pathumte chuan chawnghei an tan a. Zirlaite chet dan chu a duhkhawplo hle a, naupang lutuka politics luh chilh chu a lang thei bak a awm lova, punkhawma inrawt phur an chauh a ni a ti a. Chinese ho zalenna tak tak lo thlen hun tur chu mitinin mahni ngaihtuaha an nun hun, huaisen leh zalen taka an awm ngam hunah a ni a ti a. An chaw nghei pawh chu thihna atan ni lovin nunna tak tak atan niin a sawi.

A tawp thlengin square-ah hian a chambang a, zirlaite chu inhnukdawk turin a ngen a. Hemi avang hian nunna tam tam humin a awm phah a ni. A hnu deuhah chuan jail chhunga a awm laiin tumah Tiananmen hmuna thah an awm a hmuh loh thu sorkar TV-a a sawi avangin a thiante a ti thinrim hle a. Communist party thu thehdarh pawmawm taka chhuahtu-ah an puh a. Mahse, thudik tak a sawi a, thisen luanna tam ber chu square pawnah a ni.

Tiananmen nawrhna a a tel avang hian taninah thla 19 zet a tang a. Communist thurin kalh zawnga che a mi a fuihpawrh avangin thiam loh chantir a ni a, mahse zirlaite inhnukdawka inthiar fihlim tura a tih avang khan chhuah zalen leh a ni. Mi sawisel a chhunzawm leh nghal a, 1992-a ‘Monologues of a Doomsday Survivor’ tih a ziaha America rama zirlai tlanchhiate a beih zui avangin sawi a hlawh leh hle a. Tuipui rala tlanchhiate chuan a nungchang leh thiltih dan sawisel ve pha tur an nilo tiin a sawi a ni.

Amah hi thil a eng zawnga ngaihtuah aia a chhe lam thlir chi a ni a, khawvel mihring hmalam pawh hi a hmu thim hle a, thim thuah hnih tih lam pang sawitute zinga tel chi a ni. Chutihlai chuan Communism tluchhe tur a hmu niin a sawi thung a, communism tel lova khawvel awm tur hi a suangtuah thin. China Communist party chuan thuneihna an la chelh fan a, khawvel hmun dangah chuan an tlu chhe vek tawh, chumi avang chuan kum rei vak lovah China pawh hian a zui ve mai in a ring a ni. Beijing-a sorkar-in na taka zalenna duhtute a rahbehna atanga dam khaw chhuak a nih avangin Communist Party chet dan a hmu chiang a, tluchhe mai tur a nilo tih a hriat phah awm e. Hemi hnu hian chawl lovin a bei zui zel a, mipui rorelna siam duhtute hming ziak a la khawm leh a nih kha. Kum 1996 khan lung in hnathawhna hmuna kum thum chhung hna rim tak thawk turin hrem a ni a. Chuti chung chuan politics lam thil a ziak lui ngat ngat a. Kum 2008-a Tibet a nawrhna a lo chhuah khan sorkar hotute hnenah Tibet chu thuneihna pe tura ngenin Dalai Lama pawh be turin amah leh mithiam dangte’n an nawr a ni.

Hemi hnu kum khan UN Universal Declaration of Human Rights kum 60 tlinna pualin ngenna a ziak a, chumi avang chuan a tawpna atan Jail bang a zut leh ta a. He thupuan bung 8-na zulzui hian party mal sorkarna titawp a, sorkar thar, mipui rorelna leh mihring dikna leh chanvo humhalhtu sorkar din a phut a. Mi za telin an hming an ziah hnan hman na-in a hun hi a fuh chiah lova. Beijing Olympics a tiak takah kha chuan ramdang mi pawimawhte lawmzawng tih reng kha a tul ta lovin China khan a hre ta a. Kum 2008 December thla khan Liu-a hi man leh a ni. China sorkar hian a Nobel Prize dawn hi an sawihnawm nasa hle a (Chinese mi damlai, China rama cheng ngei zinga Nobel chawimawina engpawh dawng awm chhun a la ni a). Khawthlang sorkarte’n a chunga zahngai tura an ngenna chu China chuan a uksak duh hauh lova. Khawvel puma sum leh pai harsatna chuan khawthlang ramte a sawp chau mek a, China hun a lo thleng ta a. Kum 2012 a China ram hruai hna Xi Jinping-a’n a chelh tan atang khan sorkar dotute chu a hrual na zual ta a, Liu-a nupui Liu Xia pawh an chenna inah pawn chhuak thei lova kharkhir a ni a. A tawp lamah chuan Communist Party chuan khawngaihna lan tirin Liu Xia hi thin cancer vei mek a pasal tlawh an phalsak a, mahse ramdanga enkawl tura China chhuahsan erawh chu an remtih sak lo.

A chungthu an ngaihtuah laia hmangaihna hmangin huatna chu nawr kiang rawh tih thu a sawi chuan party hruaitute ngeng a chhun pha lo. A thih dawn hnaihah chuan amah lainatna lam thusawi puanzar a nih lohna turin khauh takin internet khuahkhirh a ni.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s