Khawvel/ Iraq sipaite’n Islamic State an beih hnu ah Mosul khawpui bul Tigris lui ah ruang chhar a tam

Mipa thalai ruang engemawzat nitin maia Tigris luiah chhar a nih hnu in mihring dikna chanvo humhawlh pawlte chuan sorkar sipaite’n an mi man te chungthu dan anga bawhzui lovin a hmuna that zel ah an puh a. IS-in Mosul an awp laia sakhaw peng lehlam an tihduhdah thin em vanga phuba lakna ni te pawhin a ngaih theih

Mosul khawpui atanga luang thla Tigris lui kamah chuan lui tui in ruang a rawn len thlak hi hmuh tur a awm reng a, hei hian mel 24 vela hla-a Islamic State (IS) ho nena indona hautak zet kal mek chu ngaihtuah chhuah loh theih a ni lo. Chu’ng ruang a rawn len thlakte chu tawih rimchhe tawh tak a ni hlawm a, hnungkhirh leh an mit tuam an ni vek a, thenkhat chu an taksa chan sawm te pawh a ni bawk. Nipui lai khan ruang hmuh tur hi a awm tan a, he khaw ropui tak ni thina tawm IS ho nawr chhuak tura beihpui thlak ngawrh zual a nih atang khan a thlang lui kama Qayyarad khaw bula ruang len thlak hi a lo tam zual ta a ni.

He khua a lirthei khalhtu Ahmed Mohammed-a chuan, “Nitin hian lui-ah ruang ka hmu thin,” a ti a, “April thla chawhma lam atang khan a tam zual ta a, hmanni phei kha chuan ni khatah ruang 5 a rawn len thla a. Tlangval la naupang tak tak hnung khirha phuar leh mit tuam te an ni,” a ti.

Firfiakte luh chhuak tura thla kaw chhung dawnlai nasa taka an inkah hnu-ah Iraqi prime minister Haider-al-Abadi chuan kar hmasa khan hnehna an chan tak thu a puang a. He khawpui hi firfiakho hian kum 2014 khan an awp thu an lo puang tawh a ni. Mosul khawpui a hlui rup tawh a, chu khawpui chim kar atanga hmeichhia leh naupangte an rawn vah chhuah mek lai chuan he khawpui la let tura beihna-in a nghawng rapthlak tak chu a lo lang chiang dawn chauh a la ni.

Helai tualchhung mite hian lui tui-in ruang a len lai an hmuh chuan lo chelh din tumin an bei a, an chelh din hnu-ah sipai an ko ta thin a. Sipaite chuan Mansour Maroof Manour enkawl he khawpui a Damdawi In-a miruang dah khawmna siam chawpah an dah ta thin.

Lui-a ruang an chhar tam ber hi hriat theih danah chuan tlangval kum 20 chawhnu lam an ni hlawm a, chu bak chu an nihna hriat belh tur a vang hle. Mansour-a chuan, “Lui-a ruang chharte hi tunge an nih kan hre theilo. Ruang hi a tawih nasat tawh bakah tunge an nih hriat theihna tur engmah an taksa-ah hmuh tur a awm lo,” tiin ruang dahna ip engemaw zat awmna pindan chhunga ding chungin a sawi a. Ruang pakhat mah hi ka ui ka ar tia rawn la tur an awm lova, hriat loh mi thi zat hi hriat a harsa hle a, ruang hmuh zawh loh pawh a awm teuh awm e.

Driver Mohammaed-a chuan, “Naupang pakhat ruang tuia lang kan hmuh chu a tet deuh avangin kan man fuh thei lova, lui khuahna thir karah a len chhuak a, kan hmu zo ta lo a ni,” tiin inthiam lo takin a sawi a. Mihring chanvo humhalh duhtu pawlte chuan Mosul khawpui a tualthahna tam lutuk an vei thu hi an au chhuah pui a, a bik takin Tigris lui dunga ruang an len thlak tirte hi an vei zual a. Human Rights Watch (HRW) chuan sorkar sipaite hian IS mi emaw anmahni tanpuitu emaw nia an rinhlelhte hi dan anga an chungthu rel lova an thah tak mai mai a tam hle tih finfiahna a awm niin an sawi.

HRW-a deputy Middle East director Lama Fakih chuan April thla a inthahna tam em em chungchangah chuan, “Mosul khaw bulah leh Tigris lui-ah hnungkhirha hmai tuam chunga thi ruang tam tak hmuh a ni a. Sorkar sipaite hian dan kalphung pawisa lovin an that a nih rinna a awm. Sorkarin hetiang thil thleng chhui chhuah a tum loh danah hian mi rinhlelh an mante chanvo zah sakna an tlachham tih hai rual a ni lo,” a ti.

Hetianga inthahna rapthlak tak takte hi chhui chiang tura hmalakna a awm tlem hle a. “Mosul khaw mite’n an hmuh thin thil rapthlak tak tak hi helaia indote’n mihring nunna an hlut sak lohzia an lan chhuahna chiang tak a ni a, a mawhphurtute hi hrem lohvin an chhuak tur a nilo,” tiin Middle East-a Amnesty International research director Lynn Maalouf chuan a sawi.

Lui hnar lama tharum thawhna rapthlak tak hian a thlang lama Qayyarah khua-ah te chuan hlimthla duhawmlo zet maiin thla a zar a. Qayyarah khua hi Mosul khua a beihpui an thlak tan tirh a IS kut atanga chhanchhuah a ni a. He khua a cheng tam zawk hi chuan lui dunga ruang an hmuh thin chanchin hi an sawi hreh khawp mai a. An khaw dawrpui lun lai, sipai ho vei huai huaina hmuna sangha zuar pakhat chuan, “Chutiang lam thil engmah ka hre velo,” a ti nghe nghe a ni.

Iraq rama sakhaw pawl hnih inepna na lutuk hi IS ho hian din chhuahna atan an hmang tangkai hle a. Muslim pawl tam zawk Shia ho thunun sorkar hian a rapbet hle nia ngaitu Sunni Muslim tan tam chuan sipaite laka an himna a nih beisei-in firfiak pawlin kum 2014 an khawpui an rawn luh khan an lo ngaithei viau a ni. IS ho firfiakzia leh hrohrang natzia an han hriat chian takah chuan Sunni tam tak chuan an khua an chhuahsan loh leh IS ho hi a ruk takin an do tan ta a. Sorkar rinhlelhna an neih nasat em avangin IS ho umchhuah an nih hnu pawh hian Sunni tamna bialah chuan an rilru a la muang chuanglo hle.

Qayyarah khua a khawsa tawh thin IS hotu hriat hlawh tak Ali Khether-a in bangah chuan, “Thisen aiah thisen” tih hi a inziak a. He in bul lawkah hian stadium tereuhte a awm a, chutah chuan IS ho hian tualchhung mite tanpuina-in mi an lo that nual tawh a, an puhnate chu sipai ho tana enthlatu emaw mawngkawhur tih te a ni.

Hetia IS hovin Syrian khawpui Raqqa lam leh Iraq khawthlang thlaler lama an tawlh kian san tak hnu hian an lo tihduhdah thin hote chuan ralthuam keng pawl an din ta hlawm a. Popular Mobilisation Unit (PMU) hnuaiah inzawm ve ang renga awmin an kutin dan an kengkawh thin. “PMU hel pawlte hian IS hovin an tihduhdahna phuba lakna’n dan bawhchhia-in Sunni mite chu an nghaisa-in an that mai mai thin,” tiin Amnesty International report chuan a sawi.

Khawpui an laklet leh hnu hian sipaite chuan IS hovin an nghaisaka an thah ruang tam tak lui-a an paih takte an hmu niin Qayyarah Police Station a officer Walid Khaled chuan a sawi a, mahse, a hnu lama ruang tam tak lui tui-in a len thlak tak chhan erawh chu a hrelo niin a sawi thung. “Tutenge an nih kan hriat miau loh avangin khawi atanga lokal nge an nih kan hre lo a ni,” a ti.

Khawpui a cheng mi thenkhat chuan ruangte hi Mosul a a kawtawpa tang IS hovin an thahte an nih an rin thu an sawi a, mahse, Iraq sipaite hian khawpui hi km 20 bialah hual vekin lui dunga IS mite putru tur vengin lui hi a dang chat vek bawk si a. A thlang lama awm Qayyarah khua lah chu sipai kutah thla tam a awm tawh bawk si.

Helai bula Munirah khaw pawhtu lei (bridge) vengtu sipai, a hming sawi duhlo chuan dan anga an chungthu rel awm lova inthahna hi chu a tam a ni tih hawi zawng chuan a sawi ngei a lawm. The Guardian hnenah video film pakhat a entirah chuan amah leh sipai dangte’n mihring zawi vek tawh, a taksa a thisen kai hnuang mai lui kama an hnuk lai a entir a. “Amah hi firfiak zing ami lo biru a nia, kan that a ni,” tiin phur fe-in a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s