Mizo Carbon chungchang CBI chhui chi a nih leh nih loh thutlukna chu kan siam ang: Gauhati High Court

Sorkar ukil-in Anti-Corruption Bureau (ACB) hmalakna chhuanlamin Mizo Carbon Products sumdawn dan felhlel tak niawma lang chu CBI kutah hlan a ngai lem lo ti mahse, Gauhati High Court chuan ACB chhuichianna te chu a enfiah hnu ah CBI koh luh a ngaih leh ngaih loh thu ah thutlukna a siam dawn niin order a tichhuak

 

Kar hmasa Nilaini (July 12) khan Gauhati High Court, Aizawl Bench chuan activist Vanramchhuangi (Ruatfela Nu) in Mizo Carbon Products-in felhlel taka subsidy a dawn dan chungchanga Public Interest Litigation a thehluh chu a ngaihtuah a, court chuan CBI hnena he thubuai hi hlan chi a ni nge ni lo tih thutlukna a siam tur thu leh subsidy pekchhuah a nih dan leh subsidy lo dawng tawh tu company te zawng zawng sawifiah turin Taxation leh Industries department te a hriattir nghal.

 

Sorkar ukil-in ACB chhui vangin CBI chhui ngai lo ti mahse, HC-in ACB chhuina chu kan enchiang ve phawt ang a ti

Hemi ni hian sorkar ukil hotu ber – Advocate General Biswajit Deb – chuan he thil dik lo ni ngeia lang hi Central Bureau of Investigation chhui theih turin state sorkarin hma a lak tawh chu a sawi a. Hetih rual hian, Anti-Corruption Bureau-in he thubuai hi a lo chhui zawh fel tawh avangin CBI kuta hlan kher chu a ngai leh lova, state sorkar pawhin a hmalak tawhna chu a hnukdawk leh maithei tiin a sawi a. Deb-a chuan state sorkar hian he thubuai chhui tur hian CBI koh luh a remtihna chu May 29 khan a tifel niin a sawi a. Ama’rawhchu, hemi hnu hian ACB-in final inquiry report a peih bakah FIR a ziak lut niin a sawi.

Mahse, HC chuan Deb-a thusawi hi pawm mai lovin ACB-in he thubuai a chhui dan te chu court hnenah thehlut se la, court-in ACB chhuina chu a en thlithlai Subsidy kalphung sawifiah turin court-in Industries leh Taxation dept te hriattir

High Court chuan Vanramchhuangi PIL thehluh thil kaihhnawih te en in Industries leh Taxation department te chuan a hranpa in affidavit an thehluh ve tho a ngai a ni a ti a, heng department te hi Mizo Carbon Products subsidy dawn ang chi, Central Transport Subsidy (CTS) leh Central Capital Investment Subsidy (CCIS) dawng tawh tu zawng zawng industrial unit/mimal/firm/company te hming leh engvanga an dawn phalsak nge an nih tih chu court hriattir turin thu a pe bawk.

 

Sorkar hotute chu thubuaiah anmahni mimal ni lovin an hna chelh vang zawkin

PIL-ah hian Minister leh state sorkar hotulu pali te chu anmahni mimal hmalakna (individual capacity) avangin thubuaiah hian tarlan tel ni mahsela, PIL thehluttu ukil rawih Senior Advocate C Lalramzauva chuan hei hi tihsual thil a ni tiin, an mimal hmalakna vang ni lovin an hna chelh behchhana an hmalakna (official capacity) avangin tarlan zawk tur a ni a ti a. Hei vang hian siamthat nan application hranpa a thehluh tur thu court a hrilh a, court chuan  a dilna hi a lo phalsak bawk a ni.

 

Bhavan-ah CM-in Mizo Carbon PIL chungchang a sawi

“Zo-Carbon thubuai chungchang sawiin Pu Hawla chuan ACB ten ngawrh takin an chhui a, officer engemaw zat dik lo hrem turin hma an la a, FIR te thehlut in chak tak a hma an lak laiin Ruatfela nu in High Court ah PIL a thehlut a, a ukil ah pawh Serchhip bial a tum engemaw zat MLA inthlana min khing tawh thin a ruai a. Kan ukil in an PIL thehluh hi Public interest litigation ni lovin Political Interest Litigation a ni a tih sak a, a dik khawp mai a ti.”

– MPCC press release 14.7.2017


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s