“Party ten hlawkna kan neih theih nan”

Cheng vbc 180 man hu kawng sial hna thawhna bialah party mite’n “Party ten hlawkna kan neih theih nan” engineer thawklai panga sawnchhuak turin PWD changtu Chief Minister an ngen a, PWD enkawltu ni lo Minister-in department hotute hnenah a thlen sak   

cover

Nikum kum tawp lam khan Hachhek Assembly bial chhunga Congress block pathum President-te’n Chief Minister hnenah an bial chhunga Engineer panga sawn chhuak turin an ngen a, he an ngenna hi Health Minister Lal Thanzara’n tipuitling turin PWD Engineer in Chief R Vanlaltluanga a hrilh.

Hachhek Assembly bial chhunga Congress block pathum President – Lalthakima Ralte (Hachhek South Block Congress Committee), K Lalngheta (Hachhek Central Block Congress Committee), Lalnunkima (Hachhek North Block Congress Committee) – te chuan November 10, 2016 khan Chief Minister Lal Thanhawla, PWD Minister chu lehkha thawnin Engineer panga te sawn chhuah sak turin an ngen a, an lehkha an chuan, “Kawrthah PWD Division Staff te hi sorkar hmalakna a kal tluan a, Party-te’n hlawkna kan neih theih nan siksawi kan duh hle a, rawtna kan rawn siam hi khawngaiha min tihhlawhtlin sak turin kan ngen a che,” tiin.

Congress Block pathum President te lehkha hi Health Minister chuan PWD E-in-C hnenah thawn chhawngin tihlawhtling turin a ti a, “Heng rawtna te hi a theih dan ang ang a tihpuitlin vat an va tha ve, khu lamah khuan project lian kan kalpui mek si a. An bialtu pawh hian heng ho hi chu a iai hle hlawm a ni,” tiin Health, ICT, I&PR Minister seal chhu in a ziah hnan a ni.

 

Party in tu te nge sawn tura an tih?

Hachhek Congress Block pathum President te hian Kawrthah EE R Zirsangliana chu sawn tura ngenin a ai ah Vanlalruata Sailo dah turin an rawt a, Kawrthah SDO Lalduhzuala ai ah Champhai SDO C Lalrinsanga, Kanhmun SDO Lalduhthlanga ai ah Tuidam SDO Zosanglura, Tuidam SDO Zosanglura ai ah Transport-a AE Biaknunga Colney te chu sawn chhuah tur leh an aiawh tura an rawt te an ni a, hei bakah hian Kanhmun JE Lalchhanhima chu sawn chhuak turin CM chu an ngen bawk.

 

Tu te nge an sawn?

Hachhek Congress Block President-te’n Kawrthah PWD Division hnuaia Engineer panga sawn tura CM an ngenna lehkha The Frontier Despatch (TFD) in a neih hnu hian PWD Secretariat ah PWD Engineer transfer & posting chungchang zawhna a zawt nghal a, channa atanga a lan danin party mite duh dan leh rawt angin Kawrthah EE R Zirsangliana chu Hmuifang Division ah an sawn a, a aiawh tura party mite duh Vanlalruata Sailo chu Kawrthah EE tur hian an dah a.

Kanhmun SDO R Lalduhthlang, sawn chhuah tura an duh ve tho erawh CM hnena lehkha an thawn hma hian Department thuneitu lamin Transport Department AE turin an sawn hman a, a aiawh tur hian Hachhek Congress Block hruaitute duh zing ami Biaknunga Colney chu an dah a, Biaknunga Colney hi Tuidam SDO ni tura an duh leh rawt a ni.

Kawrthah SDO Lalduhzuala, Tuidam SDO Zosanglura leh Kanhmun JE Lalchhanhima te erawh chu party mite’n sawn chhuak turin duh mahse, sawn chhuah an ni lo tih department transfer & posting lehkha ah chuan a lang.

 

Engineer te lawm lo

Hetianga party mite’n sorkar hnathawk sawn tura thuneitute an ngen leh, an lehkha ah party-te’n hlawkna an neih theihna tura siksawi an duh thu an ziak hi Engineer te an lawm lo hle niin TFD an hrilh a, Mizoram Engineering Service Association (MESA) WhatsApp group ah lungawi lohna leh tha lo an tih thu an sawi nasat thu an sawi.

“Hetianga party mite’n sorkar hnathawkte transfer tura thuneitute an hrilh hi tha lo kan ti hle a, transfer tura an tih piah lamah an duh zawng an la thlang zel te kha tha kan ti lo a, hetianga sorkar hnathawk transfer & posting chungchanga party mite an inrawlh zel dawn a, thuneitute’n tihlawhtling tura hma an la zel dawn a nih chuan ramin a la tuar ngei ang,” tiin MESA hruaitute chuan an sawi.

 

Kawrthah PWD Division hnuaia thawkte duh loh chhan nia sawi

Party mi in sorkar hnathawk sawn tura CM an ngen chungchang leh a changtu ni lo Minister in hma a lak chungchangah hian sawi a tam hle a, Mamit atanga thu dawnna pakhat chuan Khedacherra-Damcherra-Zamuang-Kawrthethawveng-Tuilutkawn (KDZKT) Road sial leh siam that mek hi ABCI in thawk mahse, party mite’n sub-contract an hmuh chungchangah an duh angin hlawkna an tel thei lo nia sawi a nih bakah Kawrthah PWD Division hnuaia thawkte’n an mi duhsak zawng hna tenau deuh an pekah party dang an tel ve thin nia sawi a ni a.

PWD atanga thudawn danin sub-contract hna thawk hi 100 bawr vel emaw an awm a, hengte hi permanent works bik niin project pumpui zaa 20 emaw bawr vel chauh a ni thung a. Inremsiamna lamah sub-contractor te hian an chan tlem avangin a then chuan a hlawk tawk lo tiin midang hnenah ah hralh chhawng leh bawk a, heng ah hian Hachhek Block Congress mite’n an duh ang an thawh theih loh avangin lungawi lohna pawh lantir an duh a, mahse, Congress Bhavan atangin ti lo tura hriattir an nih hnu ah an ti ngam lo a, CM hnenah an thlen ta nia thu dawn a ni. Hetih rual hian helai biala Congress hruaitute chuan sub-contract hna te hi

 

Block President pathumte’n eng nge an sawi!

Mahse, hetianga puhna hi Hachhek Block Congress President pahnih te chuan an pha a, pakhat erawh chuan mumal taka thil kalphung a hriat ve loh thu a sawi.

Hachhek North Block Congress Committee President Lalnunkima chuan thil a hriat chian vel oh thu leh an pute zawt mai turin a ti a, “Party hlawkna tur chu a ni lo ang, thil dang a niang, eng emaw a awm a niang. Kan pute ho in engtin nge maw an tih dan ka hrechiah lo, kan lehkha ah chuan seal chhut a awm em? Pu Lalngheta tih hming a awm em? Pu Thakima te’n kei aiin an hre chiang. Ka hre chiang ve lutuk lo, lo zawt mai teh a,” tiin TFD zawhna a chhang a.

Lalthakima Ralte, South Block (Hachhek) Congress President chuan Engineer panga sawn chhuah an duh chhan chu sub-contract an hmuh that theih loh vang a nih loh thu TFD a hrilh a, “Anmahni kan duh loh chhan kha a inang lo, mumal zawka helai (KDZKT road) hnathawh leh Kawrthah PWD Division hmalakna a kal chak theih nan tih a ni a, nikumah ruahtui a tam a, kawng chhe nasa a, mipui an phun nasa a, sawifiah chungchang ah te, chingfel tura hnathawh leh company (contractor) nawr kawngah department (PWD) mite’n kan duhthu an sam lo kan ti,” a ti a, “Lehkhaa ‘party-te’n hlawkna kan neih theih nan’ tih kha Department mite’n mawng zang takin an bial fang se, mipui harsatna te company mite nen sawi zung zung thei se, chutrah chuan kan sorkar hmalakna mipuiin an hre thei ang a, party in hlawkna kan nei ang tih a ni. Party mite’n sum kan neih belh ang tih lam a ni lo,” a ti bawk.

Hachhek Central Block Congress Committee President K Lalngheta pawhin Kawrthah PWD Division hnuaiah chak zawkin hna kal se an duh vangin hnathakw sa te an duhkhawp loh vang a nih thu TFD a hrilh ve bawk a.

“A, kha kha chu helai ah kan hna kal lai (KDZKT road project) hi chak zawkin hma lak kan duhna vang a ni mai, an aiawha kan duhte hi hma la chak tura kan ngaih te an ni,” tiin K Lalngheta chuan a sawi a. Sub-Contract an hmuh that loh vanga puhna chu a pha a, “Khatih lai khan sub-contract tur a awm lo, sawi vak tur kan nei lo, KDZKT road project ah hian PWD leh Forest Department te am inmil loh avangin hna a chawl, neuh neuh a awm, chuvang chu a ni mai. ‘Party te’n hlawkna kan neih theih nan’ tih kha a lehkha a leak out takah chuan party anga hlawk pup pupna tur a ni lo a, project tluang takin kal se sorkar a hlawk dawn a, chu chu kan rilru a ni. Miin an chinpawr chuan a awk thei tho a ni,” a ti a, “Lehkha leak out mahse, kan ti tawh, pawi kan ti lem lo,” a ti bawk.

 

Health Minister hi PWD Minister a ni tho em?

December 14, 2013-a Congress sorkar thar a pian a, Chief Minister Lal Thanhawla’n Minister 11 (Cabinet 7 leh Minister of State 4) a ruat hnu, December 16, 2013 khan sorkar chuan Minister te hna chanpual a puang a, Minister of State Lal Thanzara chu Health & Family Welfare, Minor Irrigation Department leh Information & Communication Technology Department chan tir a ni a, hei bakah hian PWD leh P&E Department ah Chief Minister a pui ang tih a ni a. January 7, 2014 khan sorkar chuan thu chhuah thar siamin MoS Lal Thanzara chu Chief Minister department chan zawng zawng – Political & Cabinet Department, Vigilance Department, General Administration Department, Secretariat Administration Department, Personnel & Administrative Reforms Department, Information & Public Relations Department, Public Works Department, Power & Electricity Department, District Council Affairs Department – a pui ang a ti leh a.

Mahse, Lal Thanzara hian August 18, 2015 khan Chief Minister hnenah MoS atangin banna a thehlut a, hemi tlai hian CM thurawn angin Larsap chuan a banna a pawm a. Hemi ni vek hian sorkar chuan thu chhuah siamin Lal Thanzara hna chan zawng zawng – Health & Family Welfare, Minor Irrigation Department leh Information & Communication Technology Department – chu Chief Minister enkawl turin a ti a.

Lal Thanzara hi November 21, 2015-a Aizawl North III Assembly by-election ah MLA atan thlan tlin leh a ni a, December 1, 2015 tlaiah Larsap in Minister ni turin rinawmna thu a tiam tir leh a, a tuk December 2 khan sorkar chuan thu chhuah siamin Lal Thanzara chuan Health & Family Welfare, Information & Public Relations Department leh Information & Communication Technology Department a chan thu a puang leh a ni.

Mahse, Lal Thanzara hian sorkar thu chhuak thar a awm tawh lo chungin a hma ang tho in PWD leh P&E department ah Chief Minister a pui leh niin a lang a, vawi tam tak heng department pahnih hotute thut khawmpuiin an hna a enpui niin a lang.

Hemi chungchangah hian TFD zawhna chhangin Chief Secretary Lalmalsawma, Political & Cabinet Department enkawltu chuan Cabinet Minister in Cabinet Minister (Chief Minister) a pui thei lo niin a sawi a, “Cabinet Minister in CM a pui thei lo, a lo pui a nih chuan anmahni inkar thil a nih ka ring, building khatah office an nei sia,” tiin a sawi.

 

Lal Thanzara’n PWD leh P&E a enkawl reng em?

PWD leh P&E engineer te chuan ziakin awm lo mahse an Department chu a (Lal Thanzara) enkawl niin an sawi a, “File a khawih leh khawih loh chu kan hre lo a, min enkawl alawm, vawi tam tak kan hotute a ko khawm a, Department kalphung leh hnathawh te, hmachhawp te pawh an sawi alawm,” an ti a.

Vanglaini chuan April 6, 2016 khan “Minister in PWD hmalakna enfiah” tih thupuia hmangin, “Minister Lal Thanzara chuan Thawhmanni khan Mizoram PWD hnuaia hmalakna, Hnathial-Haulawng (via Zotuitlang) kawng laih leh Tuipui-D (Darzokai) lei dawh mek a tlawh a, hnathawh dante a enfiah,” tiin a ziak a, January 5, 2017 khan I&PR chuan an website ah, “Vawiin khan Pu Lal Thanzara, Minister for Health, I&PR, etc.. chuan kum 2016 chhunga PWD hnathawh te thlirletna hun E-in-C Conference Hall, Tuikhuahtlang a buatsaih chu a hmanpui a.” tiin an ziak a, a tuk January 6, 2017 khan “Therhlo beisei lo tur leh kawng mha siam turin Lal Thanzara’n PWD engineer-te a chah” tih thupuia hmangin Vanglaini chuan, “PWD enkawlnaa Chief Minister puitu Lal Thanzara hian nimin khan PWD-in kum 2015-16 chhunga an hnathawhte thlirletna leh hun lo kal zel tura an hmalak dan turte Engineer-in-Chief pisa conference hall-a neihah thu sawiin, PWD engineer-te chu hna mha zawka thawk turin a ngen a…” tiin a ziak bawk a.

He chanchinbu vek hian November 25, 2016 khan “Power-ah NE-a titha ber Mizoram – Lal Thanzara” tih thupuia hmangin “Power & Electricity department enkawlnaa Chief Minister puitu Lal Thanzara chuan, nimina Aijal Club-a P&E Engineering Officers’ Association inkhawmpui vawi 17-na a hmanpuinaah thu sawiin…” tiin a ziak bawk a.

Sorkar in ziaka a dah dan chuan Cabinet Minister Lal Thanzara hian Department pathum – Health & Family Welfare, Information & Public Relations Department leh Information & Communication Technology Department – a enkawl a, mahse, a lan dan chuan PWD leh P&E Department ah te hian CM a pui vek a, Chief Secretary chuan Cabinet Minister in Cabinet Minister a pui thiang lo niin a sawi.

 

 

Lal Thanzara hna chanpual bithliah a lo nih tawh dan

Gazette Notification No.J.11012/331998-POL/78, the 16th December, 2013-a a lan dan chuan Minister of State Lal Thanzara chu (a) Health & Family Welfare Dept (b) Minor Irrigation Dept leh (c) Information & Communication Technology Dept te chang tura tih a ni a. He notification ah vek hian “He will assist the Chief Minister in PWD & P&E department” (PWD leh P&E ah Chief Minister a pui ang) tih a inziak bawk.

Political and Cabinet Department notification No.J.11012/6/98 – POL/80, January 7, 2014-a tihchhuahu chuan a hma thla khat tlinglo a notification chhuak chu siam danglamin, “Pu Lal Thanzara, Minister of State, will assist him (the Chief Minister) in all the Departments under his charge” (Pu Lal Thanzara, Minsiter of State-in Chief Minister hna chanpual zawng zawngah a pui ang) a ti a.

Political and Cabinet Department notification No.J.11012/6/98 – POL, August 18, 2015 ami chuan Lal Thanzara a ban tak avangin (a) Health & Family Welfare Dept (b) Minor Irrigation Dept leh (c) Information & Communication Technology Dept te chu Chief Minister-in a enkawl tur thu a puang a.

Political and Cabinet Department thuchhuah No.J.11012/3/1998 – POL/Wed. December 2, 2015 chuan “Consequent upon the induction of Pu Lal Thanzara as Cabinet Minister in the Council of Ministers of Mizoram, the Governor of Mizoram, on the advice of the Chief Minister is pleased to allocate the following portfolios with immediate effect”  (Pu Lal Thanzara Mizoram Council of Ministers-a lak luh anih avangin Larsapin Chief MInister rawtna bawhzuiin heng portfolio te hi a hlan a ni) tiin a sawi a. Lal Thanzara portfolio te chu Health & Family Welfare Dept, Information & Public relations Dept leh Information & Communication Technology Dept niin a tarlang nghal bawk.


One thought on ““Party ten hlawkna kan neih theih nan”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s