Asia/ China lam hawi Suu Kyi-i nauvin sawisel a hlawh

Tender chhuah lova Yangon khawpui a service tur bus 2,000 lei thu ah Myanmar rorel party-in khawthlang sorkarte leh tualchhung dan siammite dem a hlawh

33783399351_53c407c53b_b

Aung San Suu Kyi sorkarin hmasawnna lian tham a chhawpchhuah hmasak ber chu a langsar ang reng a – Yangon khawpui chhungah bus rawng eng za tel a tawlh dul dul a, hei hi rorellai party chuan mipui nunphung tidanglam tura an thawh rah chhinchhiahna langsarah an ngai a ni.

Ama’rawhchu, China ram atanga dollar maktaduai 100 zet senga bus 2,000 leina tura inremna hian Suu Kyi-i party National League for Democracy chhungkua-ah khi a siam zau hle a, bial hrang hranga an party hruaitute chuan bus man to uchuak hle a an hriat thu leh Suu Kyi-i’n a duhsak em em Yangon Chief Minister Phyo Min Thein chu mantang ei-ah puhin an sawisel nasa hle. Yangon-a NLD dan siam pawl zing ami Kyaw Zay Ya chuan, “Phyo Min Thein-a sorkar hi a lang tlanglo hle a, a tihdan hi a sim loh chuan sorkar hming a tichhe khawp ang,” a ti.

He’ng bus tam tham tak an leina-ah hian China company te an sawr a ni satliah lova, a hma kum tam tak Myanmar rama tharum hmanga ro lo rel tawh sipai sorkar hunlaia sumdawng hausa tak a inrawlh bawk avangin he thil hian khawthlang ram nena an inlaichinna-ah nghawng thalo tak a neih phah niin ram palai thenkhat (diplomats) chuan an sawi a. Bus leina atana contract an ziahna-ah hian dan bawhchhiatna a awm tih finfiahna a awm hranpa lo chungin Myanmar rama European Union Ambassador Roland Kobia chuan Commerce Minister Than Myint hnena mimal lehkha a thawn-ah mipui mamawh thil leina-ah hian puanhnuai thil a awm a ni a ti.

Kobia hian June thla a a lehkha thawnah hian, “Myanmar ram chhunga sum leh pai vir vel hi mi tlemte in an khawih a, felfai taka inelna a awm thei lo a ni,” tiin a ziak a, he a lehkhathawn hi Reuters chuan a copy a nei a. Bus lei chungchang bik erawh hi chu a tarlang chuang lem lo.

China company siam an bus leite hi khawvel ramdang siam ai chuan a man hi a zahve zetin a tlawm na a, a endiktu engineer rualte chuan khawvel ram dang siamte ai-in a chhe hma anga, thlak thuai a ngai ang tiin an hrilh lawk.

Yangon Chief Minister Phyo Min Thein hi biak tumin vawi tam tak veh mah ila, Reuters min hmu duh lova. Amah leh a minister dangte chuan an bus lei dan phung hi an tan tlat a, China nena sorkar leh sorkar an indawr avang hian a man a tlahniam thei a, chubakah an rawn thlen rang bawk niin an sawi.

Reuters zawhna chhangin EU Ambassador Kobia chuan Europe rama company tam tak chu Myanmar-a lut a hnathawk turin an inpeih a, mahse tihtur a tam a, hna thawk tur chuan inelna thianghlim tak a awm a ngai a ni a ti a. Hetianga a sawi chhan chu sorkarin mipui mamawh a leina kawngah langtlang zawka thiltih a pawimawh a tih vang a nih thu a tarlang. Myanmar Commerce Ministry thupuangtu Khin Maung Lwin chuan hemi chungchangah hian a ngaihdan a sawi chhuak duh lo.

Kum 2015 inthlanpui-a Suu Kyi-i’n namen lova hnehna a chan hnu khan politics zirmite chuan hetianga mipui thlan sorkar a lo din theihna atana beitu khawthlang rama company te chu Myanmar ramah hian an in-se-hmur tuau tuau turah an hrilh lawk a. Mahse, Yangon tana bus tam tham China atanga lei a ni ta hian khawthlang rama Suu Kyi-i lo thlawp fan fantute rilru a tihnual nasa hle a, a chhan chu China nena insumdawn tawn an duh zawk nia an hriat vang a ni.

Hetiang a nih lai hian kum 48 a upa, mipui hip theihna ngah tak mai leh sipai sorkarna a dodal avanga kum 15 zet jail bang lo zut tawh Phyo Min Thein chuan a hmanhmawh thu a sawi a. Yangon khawpui a mipui maktaduai 2 chuang zet, NLD hneh taka thlangtute nitina an chet velna thin kalphung hlui tawh lutuk thlaka hmasawn tir chu hna hmasa-a neih ngei a tum a. Yangon thuneitute hian nikum lama World Bank peng pakhat International Finance Corporation in mipui chetvelna atana ruahmanna an siam chu an lo hnawl tawh a, hei hi ruahmanna kimchang, lirthei chet dan vilna leh a chhang hniam ber hnena pek tih ang vel chungchanga inrem lohna vang a ni.

A tir lama French leh Dutch company te nena an inbiakna chu a tlawlh a, a chhan ber chu Chief Minister in a duh hmanhmawh em avangin a hunah an bus duh zat an rawn thlen theih dawn loh vang a nih thu helam buaipuitute chuan an sawi. Hemi ai-ah hian Yangon Bus Public Company (YBPC), mipui leh khawpui sorkar intawm company chuan Myanmar-a Beijing Ambassador Hong Liang-a’n a company thlan Chinese supplier hnen atangin bus 1,000 chu an lei ta a. Bus 1,000 dang chu China company dang hnen atanga lei a ni a, a buaipuitu chu hmana na taka Myanmar awpbeta hrawmtu Ne Win-a tupa Kyaw Ne Win a ni a. Mipui hriat tura tender chhuah a awm eih lova, dan siamtu ho thutkhawmna-ah sawiho a awm hek lo.

YBPC Chairman Maung Aung chuan, “Nia, mipui chuan lang tlang taka thiltih a awmlo niin an sawi ang chu. Mahse, tender koh hi a tha zawk kher lem lo. He thil hi ram pahnih inkara inthian thatna humna atana pawimawh a ni,” a ti hmiah mai.

Nikum September-a China rama a han zin khan Suu Kyi leh Chinese President Xi Jinping hian China-in inkalpawhna ruhrel lian tham a sial mek hi engtinnge Myanmar in a hlawkpui ang tih an sawi dun nia hriat a ni a. Suu Kyi hian China ram thil siam thenkhat hi a tha tawk lova ngaihna a awm tih a hriat thu a sawi chhuak a, hemi avang hian Xi-a chuan Chinese palai Ina thawkte chu a tha ber pe thei tur company lo zawn sak turin a hriattir niin bus leina thila inhnamhnawih pakhat chuan a sawi.

Bus pakhat zel hi dollar 56,000 man tura bithliahin April ni 11 khan inremna an siam a. A hnu thla hnihah chuan China sorkar company Anhui Ankai Automobil Co. Ltd leh Zhengzhao Yutong Bus Co te chuan bus rawng eng 500 ve ve an rawn thlen a. Mimal enkawl Zhengzhaou Yutong hi a neitu chu China ram National People’s Congress a member (MP) a ni.

Eng ang tehna hmangin nge heng company pahnihte hi thlan an nih tih chu hriat a ni lo na-in Maung Aung chuan heng company pahnihte hmunpui awmna bial thuneitute chuan an thil siam hi a tha tawk tiin an pawmpui niin a sawi. Ankai leh Yutong company hotute hian engmah an sawi duhlo thung.

China ram company hotu pakhat chuan, “Khatianga thil lei leh hralh kha chu a vang khawp mai. Ramdangah te chuan tender an kova, chumi kaihhnawiha inkaihhruaina leh khuahkhirhna awm angte chu kan zawm a ngai thin,” tiin a sawi.

Kum 40 zeta upa bus tawngtawl leh a chhunga boruak tih vawhna awm lova chuang thin Yangon khawpui a kum tam bus chuang thlan dup thinte tan chuan hmasawnna chu a ni teh meuh mai a. China siam bus hi Myanmar thlenpui a nih hma-in endik a ni a, endiktute zinga engineer pakhat Soe Aung chuan Europe leh Japan siam ai chuan a quality a hniam hle a ni a ti a, mahse, China siam hi a man pawh a zahve velin a hniam thung a ni a ti. He thil hi kum 5 chhung a tan chauh a ni a, nitin a tlan chuan bus te hi kum 5-ah chuan an tawng ve tawh khawp ang tiin Soe Aung chuan a sawi.

Sorkar thuneitute chuan kum 5 ral hnu-ah chuan electric tha hmang lirthei hmanga thlak a nih tur thu an sawi a, mahse, kum 10 dang lo awm leh tur chhung pawha an kawlphetha dinhmun chhe lutuk siam that hman a nih dawn loh laia electric hmang lirthei hman chu a taka thil thleng theilo a ni.

Khawthlang rama an lirthei siamte hman tangkai theih chhung chu China siam bus let hnih hi a ni ang tiin mithiamte chuan an sawi a. Consulting farm B+H Architech global director Robert Marshall chuan hun reilote hman hnu-a thlak leh mai tur thil thar lei chu a mawl thlak hle-a a hriat thu a sawi bawk.

An bial chhung MP te’n he project atana kyat (Myanmar pawisa) tluklehdingawn 70 zet hmanna tur an pawmpui hnu hian vote an thlak theihna chu a rawn kalpuina senso chauh a ni. April thla a bus leina tur inremna an ziah hnu khan dan siamtu pawl a mite chuan khawi sum nge hman a nih te, sumdawnna atana ruahmanna siam dante leh bus an thlan dante an zawt a, mahse, chhanna an hmulo.

Yangon state a planning leh finance changtu minister Myint Thaung chuan bus leina sum an hmuhna chungchanga Reuters zawhna a chhang duh lova. Anmahni sawiseltute chuan sipai sorkar lai ang tho khan thuneitute nena hnungthak inhiah tawn thin sumdawng hausa tlemte khan hna hlawk chin chu an la pumbilh reng niin an sawi.

Sipai sorkarna a thuneitu lian tak chhungkaw zing ami chuan sorkar company Beiqi Foton Motor Co. Ltd hnen atangin bus a lei a, mahse, a kimchang engmah a sawi duhlo.

Beiqi Foton lah chu chengkawl zaipawl an sawi ang maiin an ngawi hmak bawk. He bus tam tham lei avang hian Kyaw Ne Win chu Yangon khawpui-a bus tlan tir tam ber a ni dawn a, “Mipui tan veivehna tha tak kan siam sak dawn, chu chu ka tum ber a ni,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s