Consumer te chanvo humhaltu te’n cheng 300 an hlawh ang tih sorkar thuchhuah in sawisel tawk nasa

District tina consumer te chanvo humhalhtu sang ber te chu ruat fel ni tawh mahsela, ni khata “helper hlawh em pawh tling lo” hlawh tir na chuan sawisel a tawk nasa hle a, Mizoram Consumer Union pawhin vawihnih lai siamrem anih theih nan thu a thehlut tawh

 

Consumer te chanvo humhimna danin a phut angin tun hnai khan Food, Civil Supplies and Consumer Affairs (FCS&CA) Department chuan Consumer Disputes Redressal Forum (District Forum) president atan Judicial Officer engemawzat July thla laihawl khan a ruat thar a. District Forum te hi  district tina consumer te’n sumdawngte laka vuihvaina an neiha thubuai chingfel tu sang ber an ni. Mahse, consumer te dikna chanvo humhalh sak tura ruat te hian vawikhatah (per sitting) cheng 300 an hlawh ang ti a sorkar thuchhuah chu Consumer Union te leh president atana ruat te ngei ngei te pawhin hian a tlem lutuk tiin consumer te chanvo ngaihthahna tluk hialah an ngaih thu an sawi.

“Keini chuan vawi hnih lai state consumer protection council meeting ah pawh hei hi kan sawi tawh a. Sitting allowance hi sangkhat aia tlem chu a tih chi tawh lo kan tia. Minister ah te, Director ah te pawh kan sawi tawh a. Kan Minister kha chuan awm a ti viau a, mahse, a thawk a te hian ‘a ho emai’ tih zawngin an la a. Kan la nawr leh ang hei chu. A diklo kan tia. Helaiah mi reng rengin seminar paper an pharh pawhin cheng 1,000 te ania an in pek tawh. Keini chuan district forum ah cheng 1,000 nise, state forum ah cheng 1,200 tal ni se kan tia. [Cheng 300] chu a awm tawh lova tunlai thil man ngaihtuah pawhin,” tiin Mizoram Consumer Union President Thanglura chuan The Frontier Despatch (TFD) bulah a sawi.

FCS&CA Dept thuchhuah chuan Gauhati High Court remtihna in district hrang hranga Additional District and Sessions Judge pali leh Fast Track Court Judge pahnih te chu District Forum hrang hrangah president turin a ruat a. A tlangpui thu in heng judge te hian an awmna hmuna District Forum te hmui nghal dawn mahsela, thawktu an indaih loh avangin Additional District and Sessions Judge, Aizawl ami chuan Serchhip District Forum a hmui a, Siaha-a Fast Track Court Judge chuan Siaha District Forum bakah Lawngtlai District Forum a enkawl thung dawn a ni.

District Forum president atana ruat thar pakhat chuan per sitting allowance chungchangah hian “Tunlai helper hlawh em pawh a pha lo chu a nia. Consumer te chanvo humhalhna hi sorkar hian a ngai pawimawh lutuk lo niin a lang ber mai,” tiin a sawi a. |henawm state Assam ah chuan District Forum president te’n per sitting allowance ah cheng 1,000 leh conveyance (veivahna) allowance ah cheng 150 an chan thu sawiin, Mizoramah chuan district dang daih hmui tu te tan takngial pawh conveyance allowance siam a ni lo thung niin a sawi bawk.

Chutih rualin, District Forum President ruat chungchang ah hian hun engemaw chen chu dan kalh a thil tih a lo ni tawh thin niin sawi a awm bawk a. President atan hian Deputy Commissioner te ruat an ni mai thin a, nmahse, dan chuan District Court Judge an ni ngei tur a ti thung a. District Forum President ni theilo te’n post an chelh miau avangin dan hnuaiah chuan an thutlukna hi kenkawh theih a ni lo ang tluk ani bawk niin TFD chuan thu a dawng.

Hetih rual hian MCU President chuan helaiah hian Mizoram leh hmarchhak state dangte chuan buaina an tawk deuh a, Forum president atana ruat tur lamah mi tling tlakchhamna a awm avangin dan hi siam rem pawh a ngai deuh thei a,chumi kawngah chuan sorkarah thu an thlen tawh thu a sawi bawk.

FCS&CA Dept a officer lian pakhat chuan District Forum te per sitting allowance leh conveyance allowance te hi ennawn an nih hmel thu te erawh TFD a hrilh a, a chang chuan President chu sawi loh, member ruat turah pawh post luah duh tur hmuh zawh loh chang an neih thu a sawi bawk a. Member ni tura apply te chu an qualified loh fo avangin hemi kawngah pawh buaina neuh neuh a awm thin thu a sawi ve bawk.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s