District demand chanchin (1996 – Tun)

(Mizorama district demand history-a sorkar lehkha pawimawh lo awm tawh te bihchhianna tawi)

India rama district lian ber zatve aia zim mah Mizoram state-ah district pariat a awm mek laiin, tunah hian district puitling dang pasarih ngiatna a awm mek. Kum 20 chuang kalta atang tawh khan district demand chungchang hi inthlan dawn hnaihah a vung tlangpui a, sorkar term hnih danah pek an ni ziah bawk a, ruling erawh an tlin chhunzawm phah lem lo niin a lang. Kuminah pawh hian district demand thu hla a inmung tan leh mek a nih hmel

Cover-web

Tun thla ni hmasa ber (August 1) khan Saitual District Implementation Demand Committee chuan Aizawl Press Club-ah thuthar thehdarhtute an kawm a, Saitual district nihna pek tawh, la tihpuitlin si loh chungchang sawiin Chief Minister Lal Thanhawla hnena an memorandum thehluh te an tlangzarh a.

District pek ni ve tawh tho, Khawzawl pawhin tunah hian district tih puitling ngiatin thu leh hla an nei thar ve leh mek bawk a, August 12 hmaa Khawzawl district tih puitlin a nih hman lo chuan lungawi loh lantir nan August 14 (Thawhtanni) hian total bandh huaihawt an tum mek niin an sawi a ni.

 

Inthlan dawn hnaih apiangin district ngiatna au hla

The Frontier Despatch (TFD)-in sorkar lehkha pawimawh chi hrang hrang a zirchiannaa a lan dan chuan district thar ngiat chungchang te leh hemi kawnga sorkar hmalakna te hi tualchhung inthlanpui hnaih lam, Mizote’n “kum 10 aia rei party khat in a zawnin lalna a chang thei lo” tia kan sawi thin zulzui deuhin kum sawm dana inthlanpui awm dawn hnaih lam ah a inmung chho thin tlangpui.

Chutih rualin, kum 2013 tualchhung inthlanpui hma deuh, Congress sorkarin term khat hmang zova, a zawn a term hnih lal an chuh dawn hnaih pawh khan district implementation leh district demand committee hrang hrangin thu chhuah te siamin district demand boruak chu a inmung chho tho mai.

 

District ngiat thawm tam hnuhnun ber, kum 2013-a thil awmdan

Tualchhung inthlanpui kum, kum 2013 khan Darlawn ah district ngiat tute’n an thil ngiat tih hlawhtling a nih theih nan leh tihhlawhtlin anih thuai loh demna’n ni khat chhung (June 25) sorkar pisa leh sikul an khar a. Thla thum hnu, September 24, 2013 khan Hnahthial leh Khawzawla district tihpuitlin ngiat tu te pawhin an huamchhungah total bandh an buatsaih bawk.

Darlawn, Hnahthial leh Khawzawlah te hetianga sorkar pisa leh sikul khar leh total bandh huaihawt anih inkar hian Saitual a district tihpuitlin ngiat tu te pawhin Delhi tlang thlengin aw an nei a, kum 2008 November thlaa Congress Vice-President Rahul Gandhi-a’n an party in khami tuma tualchhung inthlanpuia an party in hnehna an chan chuan district chu an tihpuitlin sak ngei ang ti a thu a tiam video recording te pawh Rahul Gandhi hnenah hian an thawn hial. Tin, July 22, 2013 khan Saitualah kawng te pawh an zawh a ni.

Saituala kawngzawh a nih hma deuh hian Tlabung ah pawh district ngiat tute’n July 2, 2013 khan kawng an lo zawh ve tawh bawk a. Darlawn ah pawh district ngiat tute’n June 20, 2013 khan kawngzawh an lo huaihawt ve bawk.

Hetih rual hian North Vanlaiphaia chengte chuan district an lo ngiat ve bawk a, district demand committee chairman Rev Dr R Laldawngliana chuan July 26 khan Aizawlah thuthar thehdarhtute kawmin hmun dang te district pek an nih chuan hmaih bik chi an ni lo tih a lo sawi ve bawk.

Inhtlan a zawh hnu chuan district tihpuitling ngiat tute leh district thar ngiat tute hian thu leh hla an nei chhunzawm em em ta lova, mahse khami tuma inthlan dawn hnaih tak tak, campaign hun a tawp titih tawh hnu khan ruling party ni leh mai tur Congress chhungkua ah district ngiat thu hla avangin buaina tenau a chhuak lek lek.

November 22, 2013 tlai lam khan South Tuipui biala Congress MLA ni lai leh 2013 a seat chuh leh tu John Siamkunga’n Congress a sorkar leh anih chuan Hnahthial district pek tawh chu tihpuitlin anih tur thu leh Saitual leh Khawzawl erawh chu tihpuitlin an nih kher lem loh tur thu a sawi a. Congress aiawha Tawi bial leh Tuichang bialtu leh bial chhunzawm tum R Lalzirliana leh Lalrinliana Sailo te campaign puipate pawh a thusawi hian a ti thlaphang hman hle a, a tawpah erawh chuan inthlanah an chungnung ta tho thung.

 

India district lian ber zatve pawh tiat lo state-ah district 8, district 7 dang ngiatna

Mizoram state (21,081 sq km) hi India rama district lian ber Kutch District, Gujarat (45,674 sq km) zatve aia zim a ni na a, district pariat ah then a ni mek a. MNF a tlak hma lawka district thar pathum a puan (Khawzawl, Saitual, Hnahthial) leh district thar ngiat te (Darlawn, Tlabung, North Vanlaiphai) chu an vaia belhkhawm in paruk an ni a. District pek tawh tih puitlin ngiatna te leh district thar ngiatna te hi tihhlawhtlin ni ta sela chuan, Mizoram hi district 14-ah then a ni dawn tihna a ni a.

Hei bakah hian nikum June thla khan District Re-organisation Committee din thar leh, Chief Secretary kaihhruainaa thu khawm chuan district pek tawh, la tihpuitlin loh te tihpuitlin an nih theih dan tur leh Kamalanagar (Chawngte) district dilna (proposal) te a ngaihtuah a. District Re-organisation Committee din thar leh hian Darlawn, Tlabung leh North Vanlaiphai district dil/ngiatna chu ngaihtuah tel lo thung a. Committee minutes hi social media lamah a darh chhunzawm hnu deuhin sorkar ni lovin sorkar lai party – Congress – chuan Kamalanagar district hi pek tumna a awm lo angin sawi hnuhnawh leh mahsela, dilna/ngiatna a awm hrim hrim tihna a ni a, hemi tel hi chuan Mizoram hi district 15 ah then a ni thei tih chu a sual tam pui awm lo e.

 

District pek tawh, tihpuitlin la ni silo te: Saitual, Khawzawl, Hnahthial

District thar ngiat mek te: Tlabung, North Vanlaiphai, Darlawn, Kamlanagar/Chawngte

 

District HQ atana sorkarin 1996-a a awh tawh te: Khawzawl, Saitual leh Lengpui

Eng a pawh chu ni se, district pathuma then hran ni thin Mizoram state hi district tam zawka then sawm tumna sorkara ngaihtuah a nih hmasak ber ni awm a lang chu 1996 khan a ni a. Khami kum, December 6 khan khatih laia GAD Secretary Vanhela Pachuau chuan Council of Ministers ngaihtuah turin heti hian a thlen.

He lehkhaa a lan dan chuan, Aizawl District chu hmun thumah leh hmun li ah then sawm a nih theih dan ngaihtuahna a awm a. “Flag A” tia sorkar hotute’n an sawi mai ah chuan Aizawl chu hmun thum a then a, Mamit, Khawzawl leh Aizawl khua te chu district pathum headquarters ah theuh dah rawtna a ni a.

“Flag B” a awm leh a, chutah ve thung chuan District Headquarters te chu Lengpui, Saitual leh Aizawl ah te district headquarters nghah rawtna a ni a. Khatih laia GAD Secretary ziah dan chuan he rawtna hi administration fawng chelhtute thlirna atang chuan a duhawm ber niin a lang a.

Heng rawtna pahnih bakah hian Lalbiakthanga (IAS retd), district then dan tur ruahman tura sorkarin a ruat chuan Aizawl District chu hmun li ah then darh a, district headquarters palite chu Aizawl, Kolasib, Champhai leh Thenzawla nghah ni se tiin rawtna a thlen thung tih lehkha ah hian a inziak bawk.

 

Rawtna hmasa pathumte rel an nih hma in Minister pakhatin a puanzar vangin hnukkir leh  

Mahse, GAD-in heng rawtna pathumte ziaka a thlen hnu lawk hian Minister pakhatin mipui ah a lo puangzar a, Council of Ministers-in a rel hma hawta chutia puanzar a lo nih tak avangin  December 10, 1996 khan Chief Minister Lal Thanhawla chuan notesheet ah, “Even before many Minister could see the proposal being circulated for their opinion, some irresponsible Ministers divulge the proposal to the people. It was quite possible that some Ministers many not agree to the proposal and may even want to discuss verbally. Therefore, the file was called back. I shall call the meeting as early as convenient” (Minister tam zawkin proposal te hi an hmuh hma hawtin Minister dawn tawi thenkhatin mipui hnenah a lo puangzar a. Minister thenkhat te chuan proposal hi an pawm lo thei a, sawizau te pawh an duh thei. Chuvang chuan file hi koh kir a ni a. Meeting chu a remchang hmasa ah ka ko ang) tiin.

Hemi hnu hian sorkar chuan Aizawl district then darh chungchangah thutlukna a nei lo ta vang vang a. Kum khat a liam hnu, December 10, 1997 khan khatih laia Chief Secretary Lalfakzuala leh sorkar hotu lian pasarih dang te chu an thu khawm leh a. Chutah chuan chipchiar takin Aizawl District then dan tur rel a ni a, district thar headquarters te nghah an nihna hmun tur a zirin sub-division hmunpui te nghahna tur pawh duang vek a ni bawk.

 

Khawzawlah sorkar pisa pariat tihchhiat a ni

Chief Secretary hova sorkar hotu lu hrang hrang te an meeting hnu thla hnih chuang deuhah chuan February 2, 1998 ah Secretary hrang hrang an inhmu khawm leh a, chutah chuan Khawzawla sorkar department pariat ngawt pisa te tihchhiat an nih thu sawiho niin, notesheet-a a lan dan chuan PWD building pahnih, PHE building pahnih, BDO office, P&E building pahnih, Soil and Water Conservation dept building pakhat, Horticulture building pakhat, AH&Vety dispensary leh Forest Range Office pakhat te an tel a. Department thenkhat te chuan hun rei vak lo ah pisa te hian hna ngai an thawh leh theih tur an sawi a, Chief Secretary chuan an thu thlen te chu CM hnenah a thlen chhawng a.

Mahse, CM Lal Thanhawla erawh chuan Febuary 28 ah ziakin, “However, till I take a final decision, this matter may wait for some more days, pse. No office should function now except those which are already functioning” (Thutlukna ka siam hma loh chuan he thil hian ni engemawt zat chu lo la nghak rawh se, khawngaihin. Tuna thawk sa tawh te lo pisa chu thawk hrih suh se) tiin.

 

Party pakhatin kum 10 sorkarna a chan zawh dawn hnaihah District thar puang

Thla li emaw a liam hnu chuan GAD-in notification a tichhuak a. He notification, March 11, 1998 ami chuan Aizawl District chu hmun thumah thenin Tuichawng leh Tuivawl lui te leh Tlawng luite karcheh zawng chu Aizawl District ah a puang a, Tuivawl leh Tuichawng chhak am zawng chu Aizawl East District ah a puang thung a. Tin, Tlawng thlang lam zawng chu Aizawl West District ah a puang ta bawk a ni.

July 29, 1998 khan GAD chuan notification dang tichhuak leh in, Aizawl District chhunga bial awm tur te a sawifiahin Aizawl North I & II, East I & II, Aizawl West I&II, Aizawl South I&II te bakah Tlungvel, Sateek, Saitual leh Ratu MLA bial te chu Aizawl District ah khungin Aizawl khawpui ah district headquarters a nghat ta a.

Bilkhawthlir, Kolasib leh Kawnpui MLA bial te chu Aizawl North District chhungah khungin district headquarters chu Kolasib ah a nghat thung a.

Tin, Serchhip, Lungpho leh North Vanlaiphai MLA bial te chu Aizawl South District ah khungin district headquarters Serchhipah a nghat thung a ni.

Hei bakah hian Aizawl East District chhim-thlang lam chu notification hian a siam danglam a, North Vanlaiphai MLA bial chu hemi district atang hian a la chhuak.

Chutih rual chuan sorkar chuan Chhimtuipui West District a din thar nghal bawk a, Lai leh Chakma Autonomous District Council te’n an huam chin (Sangau MLA bial tiam lovin) chu he district, Lawngtlaia headquarters nei tur chhungah a rin lut a. Tin, Chhimtuipui East District din bawkin hei hi Mara Autonomous District area leh Sangau MLA bial zawng Saiha a district headquarters hnuaiah a khung bawk.

Thla 11 emaw a liam hnu chuan GAD-in June 3, 1999 khan notification a tichhuak leh a, chu chuan Aizawl East, West, North leh South district te bakah Chhimtuipui East leh West district te chu hming thar pe in, Champhai, Mamit, Kolasib, Serchhip, Lawngtlai leh Saiha District ah te a puang ta a ni.

 

Party khat kaihhruai sorkar term hnih ral dawnah district thar dang puang leh

Hetianga Mizoram district pariata then a nih hnu ah hian sorkar lamah chuan district dang chungchang a reh deuh vang vang a, mahse district thar ngiat erawh an awm reng tih chu a lang tho a. September 1, 2008-a Chief Minister Zoramthanga kaihhruaina hnuaia Council of Ministers thu khawm chuan “District siambelh thu hi sawi ho a nih hnuah Cabinet chuan District dil mek Hnahthial, Khawzawl leh Saitual pek a remti a, an ramri tu chu sawrkar siamfel tur a dah a ni,” tiin a rel thlu a. He meeting vek hian North Vanlaiphaia Sub-Division hawn belh a remti nghal bawk. He Council of Ministers meeting-in a thu rel bawhzuinan hian Sept 12, 2008 khan GAD chuan notification tichhuakin, Hnahthial, Khawzawl leh Saitual district te chu a puang ta a. District thar pathumte ramri chin erawh chu a remchan dana sorkarin ti chiang turin a sawi thung.

 

District demand chungchanga sorkar hmalakna te (Timeline)

6th December 1996 – GAD Secretary-in Aizawl District trifurcate (hmun thuma then) dan tur proposal a sawi lang. Hetah hian hmun li a then theih dan pawh a tel. Mahse hei hi leak vangin hnuh let lailawk leh a ni.

10th December 1997 – Chief Secretary hovin Aizawl District thensawm dan tur sawi zau a ni a, sub-division te duan chhin a ni.

11th March, 1998 – GAD notification-in Aizawl District, Aizawl East District leh Aizawl West District a din.

29th July, 1998GAD notification-in District thar hnuaiah MLA bial te a thendarh. Chhimtuipui East leh Chhimtuipui West a din tel nghal.

3rd June, 1999GAD notification-in district thar te hming a phuah. Champhai, Mamit, Kolasib, Serchhip, Lawngtlai leh Saiha district te an piang.

1st September, 2008Council of Ministers-in Hnahthial, Khawzawl leh Saitual district pek a remti.

12th September, 2008GAD notification-in Hnahthial, Khawzawl leh Saitual district te a din, ramri siamfel lo, a hnulama siamfel atan a khek.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s