Khawvel/ Kum 23 zet thumal pakhat buaipuitu chu

“Macedonia” aiawh thei tur ram khat hming tur ngaihtuahtu Matthew Nimetz chuan kum 23 chhung UN Secretary General aiawhin he inhnialna hi a lo ngaihven tawh a. Chinfel hun tur hriat la nilo mahse, kum khata dollar khat a hminga hlawh ve Nimetz hian hmingah hian thil tam tak a bet tel tlat tih a hrechiang tulh tulh

 

Yugoslavia a keh darh atanga kum 26 hnu-ah Republic of Macedonia a lo piang a. Khami chhung zawng khan he ram lo pian thar hian khawvel pum huap pawm a hlawh lova, chu chu a ram hming vang a ni a. “Macedonia” tih hi Greek hovin hman an phal lo.

Hetih hun chhung zawng deuh thaw hian he harsatna chin fel tum hian mi pakhat, Matthew Nimetz chuan a bei ngar ngar a ni.

Nimetz hian mi-in an hriat thiamloh a hlau ve thova. Kum 23 chhung khan a harh lai zawngin ‘Macedonia’ tih thumal ringawt chu a ngaihtuah ngut ngut reng biklo niin a sawi.

“Midang zawng ai chuan ka vei zawk mai thei, a ram chhunga chengte ngei ai pawhin,” tiin US sorkar palai, kum 78 a upa chuan a sawi a. “Mahse, hna berah chuan ka nei lo,” a ti.

Kum 1994 atang tawh khan Nimetz-a hian khawvel huapa inhnialna nasa ber pawl tih reh tum hian tha a lo thawh tawh thin a. Macedonia tih hming hman hi Greek sorkar hian a remtilo bur a, European Union leh NATO zawm ve pawh a remti lo.

Greece hian ‘Macedonia’ tih hming hman an phallohna chhan chu an ram hmar lama ram bial pakhat Macedonia rawn hauh tumna-a an ngaih bakah Greek hnam nihna hlui rawn chuhpui-ah an ngai a ni. Greek sorkar chuan he ram thar hi a hmingah chuan ‘Skopje’ tih lampang vuah awm tak niin an ngaih thu an sawi a, Skopje chu Macedonia khawpui ber hming a ni.

_97154729_mapofgreeceandmacedonia (1)

Macedonia sorkar erawh chuan an ram chu Alexander Ropui-a’n a awp hma daih tawh khan hmakhawsangah ‘Macedon’ lal ram kha a lo ding daih tawh a, chuvangin Macedonia tih hming hi thlan awm hliah hliah a ni an ti thung.

He inhnial buaina chungchang chingfel tura Nimetz-a’n beih tan tirh lai hian US President Bill Clinton-a palai vohbik a ni a, mahse, kum 1999 tawp lam atang khan UN Secretary General mimal palai hna a thawk tan a – a hna ber chu an inrem lohna titawp tura a tawn tawna dawr a ni a, hetihlai hian kum khatah dollar 1 a hmingin a hlawh.

UN-a an luh theihna atan hian Macedonia chuan ‘The Former Yugoslav Republic of Macedonia (FYROM) tia phuah chu official thilah an pawm a, mahse hei hi hming nghet a nih loh ang bawkin harsatna siam belhtu mai a nihna chen a awm. “He hming hi chu lam a rem lovin a ulh lutuk hrim hrim,” tiin Nimetz-a chuan a sawi.

UN Secretary-General hlui Ban Ki Moon khan vawi khat chu he ram hming hi a lam sual pek a, “Former Yugoslav Republic of Yugoslavia” tiin a sawi a. “He harsatna hi i chinfel a ngai a ni, min ti a thei tak ngial dawn,” tiin min hrilh a ni tiin Nimetz chuan a sawi.

“Thenkhat chuan Macedonia hming hma lama dah tur dap ringawtah min ngai mai thei – entirna’n New Macedonia, Upper Macedonia tih ang reng – mahse, he thil hian history-ah hmun pawimawh tak a luah a, ram leh hnam din chhuahna hawlh pha a ni,” a ti.

“Lemchan ngai reng pawh hi a changtute a zirin a ninawm lo thei. King Lear emaw Hamlet emaw lemchan te pawh hi a director pangngai rengah pawh a lemchangtu dangin an chan chuan a ninawm ngai em ni?” a ti bawk.

Nimetz-a hi Clinton-a palai a nih lai pawh khan he inhriatthiam lohna hi a punlun lutuk dawn emaw tih turin a awm a. Greece chuan Yugoslavia atanga Macedonia an indan hlim, kum 1991 atang khan ‘Macedonia’ tih hming hman hi an lo phallo tawh a. A kum lehah hian Greek mipui maktaduai khat, a ram mihring za zela 10 chuan Thessalonika khawpui kawtthlerah Macedonia hming hman duhloh lantirna’n kawng an lo zawh tawh a. An kawngzawh avang hian an ram prime minister chuan a ban phah a, amah thlaktu Andreas Papandreou chuan Macedonia atanga lawng kal reng reng Greek ho lawng chawlhhmuna an luh a khap a. Macedonia chu Greece tana hlauhawm reng a ni a ti a ni.

Nimetz-a hian nakinah chuan Macedonia hian Greek ram hi an la chuh mai ang tia Greek mi tam tak hlauhthawnna hi a hriat thiampui khawp mai a. “Chhuan thum kal ta chhung khan Greece hian hetiang hlauhawm hi a tawng fo tawh a, Balkan ram then darha awm tam tak hi an thlir reng a, an ram thenawmte dinhmun an en hian lung muan a harsa ve khawp ang,” a ti.

He thu inchuh chungchang hi US Senator ho hma-ah sawi fiahin anni pawhin Mexico hian Republic of Mexico and Texas tiin an ram hming hi thlak ta mai sela eng angin nge an ngaih ang tih a zawt a, hemi rual hian tunhma lama US chhim thlang lam ram lem kha chhuah fo sela chuan an lungawi biklo khawp ang tih a hrilh a ni.

Chuti chung chuan Macedonia mipuite rilru pawh a hriatthiam pui tho bawk. “Greek hovin ‘Mai mai che u hian, kum zabi 9-na leh 10-na vela lo lut ve chauh kha in nia, helai biala awm nghet pawh in nilo. In duh ngang a nih chuan New Macedonia in vuah rawh u’ an tih chu Former Yugoslav Republic of Macedonia mipuite tan chuan pawm harsa tak a ni. Mi thar emaw ram ding tharah an inngai lo. Ram leilung fa, ram luah hmasatu-ah an ingai tlat.

Hetiang teh nuaih hi ni mahse Nimetz-a chuan a tirah chuan he thil hi chinfel thuai theih a beisei a. Macedonia politician ho pawhin an ring ve tho. Thenkhatin sorkar inthlak te awm sela kum rei vaklo hnu-ah a chinfel theih mai an beisei hi a awmlo lemlo.

A ram hming tura rawtna hi a tam khawp mai – New Macedonia te, Nova Makedonija te, Slavo-Macedonia te leh Republic of Skopje tih te. Vawi khat phei chu Upper Republic of Macedonia leh Republic of Upper Macedonia tihte chu pawm a ni titih hman a ni.

Mahse, pakhat mah khi a taka pawm a awm ta lo. A hma lama Macedonia sawifiahna (adjective) dah tur dang dap a ngai ni mai-ah a ngaih theih a, mahse, Nimitz-a chuan a hun takah thil a fel mai a beisei thung. Northern Ireland emaw Germany insuihkhawm lehna emaw hi ngaihtuah ta che u, a ti a. Thil lo thleng zelah mipui hian he thil hi en dan dangin an thlir hun a thleng thei a, a nih loh paw’n hruaitu thar lo chhuakin ram hruaitu chak takin thutlukna nghet tak a rawn siam thei bawk a. A nih loh vek pawhin mipui hian tawp-in-tai awm lova inhnial ai chuan chinfel an duh hun a thleng mahna. Chu hun tha chu thleng mai turah a beisei reng a. A chhan pawh Macedonia rama hruaitu thar – Social Democrat mi leh sa Zoran Zaev-a kumina prime minister a rawn nih tak vang a ni pakhat a.

Chubakah chuan Macedonia hian a harsatna ching felin NATO leh EU a zawm ve thuai theih dan a dap nasa hle a ni. A khirh khan lai ber tur chu ram pahniha chengte hmin hi a ni dawn tih Nimetz-a chuan a pawm a. Macedonia ram hruaitute chuan mipui ngaihdan lak (referendum) hmanga inremna hi siam theih an beisei a ni. A pawimawh ber nia a hriat chu an ram hming hi an hnam nihna nena inmil a ni kher lem lo ti zawnga mipui hmin a ni.

“Skopje khawpui a pa pakhatin min hrilh dan chuan, ‘Zinga ka thawha ka hmuihmul ka meh lai hian darthlanga inen chungin Macedonia mi ka ni ka ti a. Chuan naktuka ka hmuihmul ka meh hunah khan New Macedonia mi emaw Upper Macedonia mi ka nia ti turin min beisei em ni?’ a ti a ni,” tiin Nimetz-a chuan a sawi.

Chutiang ngaihdan neite pawm dan chu a hriatthiam sak rualin heti zawnga thu lak chu a fuhlo tih a hrilh thin niin a sawi a. “He ram hi khawvel ram dangte nena a inlaichin dan tur hi kan sawi ber chu a ni a. Mipui mimir nun a khawih hranpa dawn lo. Hnam nihna lam a khawih lova, chutiang lam chu ni sela chuan ka inthiarfihlim daih tawh ang,” a ti a ni.

Khawvel pum huapa thil ngaihtuah thin a ni chungin hnam nihna chu ngaih pawimawh sak a tulna a hre thiam a. Tribal te dinhmun, mahni hnam humhalh duhna chu hnam changkang pawhin an nei vek a ni a ti a. Engpawhnise, he ram hming tur, thumal pakhat hi kum 23 chhung zet chu a chai tawh a ni phawt mai.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s