Independence Day, BJP leh Sardar Patel

Independence Day lawmna hun hmangin Mizoram BJP chuan Congress puipa Sardar Patel pawimawh thu an sawichhuak a. An party el em em hruaitu hmasa an chawimawi tak hi ramchhunga BJP leh RSS hmalak tawh dan thlir chuan a mak hran lo

August 15, Independence Day kha BJP Mizoram Pradesh hruaitute’n Aizawla an party office ah hnam puanzar pawtpharhin an lawm a. Hemi chungchanga an thu chhuah chuan, “Dr JV Hluna, President chuan hnampuan zar pawtpharhin India ram zalenna atana beitu hriat hlawh loh Sardar Vallabhbhai Patel-a hnathawh ropui tak a sawichhuak a, One India, One Nation tipuitlingtu pawimawh ber te zinga pakhat a nih thu a sawi,” tih a tarlang.

Independence Day hi Mizorama mi nawlpui chuan Mohandas Karamchand Gandhi, Mahatma Gandhi tia hriat lar zawk, nen an hmehbel tlangpui awm a. A nih loh vek pawhin Sardar Vallabhai Patel hi mipui mimir rilru ah a lang lutuk lem lo maithei. Ama’rawhchu, BJP hruaitute’n India zalenna sualtute zingah Patel-a hming an sawi lang bik hi a mak lem lo: Congress hruaitu lar leh Jawaharlal Nehru-a Deputy Prime Minister hial ni tawh Patel-a hi BJP leh RSS te’n hman deuh atang khan ta neih an lo tum tawh thin hrim hrim a ni.

Ramchhung hmun tinah Sardar Patel-a hi BJP (India zalenna sual laia party la piang lo) leh RSS (an mi leh sa ni thin in Hnam Pa tia koh Mahatma Gandhi a kahhlum hnu a Patel-a ngeiin a khap) te hian India zalenna sualtu te zingah an sawi lar bik fo hrim hrim a, thil awmze thuk tak nei a ni nghe nghe.

Zirmi te chuan hemi chungchang hi ramchhung leh khawvel chanchinbu lian ah te an lo chai fo tawh a, kum 2013 chho bawr vela khatih laia Gujarat CM Narendra Modi-a’n Patel-a lim, metre 182 zeta sang, Statue of Unity tia koh sa tura hma a lak pawh khan he thu chai hi a lar hle.

Khami tum khan UK chanchinbu lar The Guardian chuan he lim sak hna hawnna inkhawm ah pawh Congress hruaitu tumah an tel duh loh thu tarlangin, ti hian a sawi: “Gujarat-a piang Patel-a hi lal ram 550 chuang India ramchhunga a rin luh avangin “Iron Man of India” tia koh a nih phah a. Congress hruaitu lar tak a ni a, a party awmna thin chu Modi-a party BJP nen an inkhing mek a. Mahse, Hindu nationalist te tan chuan hruaitu itawm tak a ni. A chhan chu, Patel-a hi India Prime Minister hmasa ber Jawaharlal Nehru nen an in el tih ngaihdan a awm vang a ni.”

“Hindu nationalists te hian ram zalenna sualtute zingah anmahni lamtang sawi tur an hre lova, chuvang chuan midang lam tang chu anmahni lamtang anga sawi phet an tum a ni,” tiin Professor Aditya Mukherjee, Centre for Historical Studies, Jawaharlal Nehru University, chuan he chanchinbu hi a hrilh nghe nghe a. “Tin, Modi hian ‘Iron Man’ nih a, India khua leh tui zinga an ram buaina chingfel tu tur hruaitu chak tak it tu te zinga inti itawm a tum,” a ti bawk.

Ramchhung chanchinbu lar The Hindu BusinessLine ah pawh ngaihdan ziaktu pakhat chuan, “BJP leh he party nu leh pa, RSS, hian hmanlai mi ropui tak han chhuan tur an van hle a. Hindutva rindan tichhuak tu pakhat Vinayak Damodar Savarkar lah chu Mahatma Gandhi thahna ah thubuai a awrh a, British sorkar hmaah ngaihdam dil a an ngaihdam tak kha a ni bawk si a.  Heti a nih vang hian ramin zalenna a sual kawnga  inhmang chhuan tur nei si lo party tan chuan hruaitu chhuan tham hawh mai loh chu tih tur a vang a, chutiang tel lo chuan zalenna sualin a ken tel, mahni inpumpekna kha an hauh pha ve mawlh lo a ni,” tiin.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s