Asia/ Acid-a theh Afghan hmeichhe pakhat damkhawchhuahna thawnthu chu khawdurin a hliahkhuh ta

Amah nghaisatute man an nih avangin hmeichhiate chanvo humsalh sak an nih loh fo na hmun Afghanistan-ah Mumtaz-i thil tawn chu thawnthu ngaihnawm leh midang tha ti tho thei tura sawi thin ni mahsela, indona chhumpik karah a nun chuan lungngaihna lam hlir a pan mek

Mumtaz-i fanu chuan hming a la nei lo cheu. Mumtaz-i hi Afghanistan hmar lama Kunduz bial a kum 23 mi a ni a, kum 18 anih laiin acid in beih a ni a, amah nghaisatu te chu jail an tang a, a hun lai chuan hmeichhiate chanvo humhalh kawngah dan a lal a ni ti a an sawi fo chhan a tling hial.

Mahse, Mumtaz-i tan chuan dan hnuaia  rorelna dik chuan chhiatna bak a thlen lo.

Thla hmasa mai khan a hmeithai a, a pasal chu amah nghaisatu chhungte’n an that a. A pasal ruangin an in a lo thlen chuan thlaphang takin a ipte a dap a, Afghani pawisa cheng 2,000 a lo awm a. Chu zawng chu a pasal boral ta chuan khawvelah a hnutchhiah.

Kar hmasa khan a fanu thla 18 mi Asma-i a damloh avangin doctor an pan a, inentirnan a pasal-i’n Mumtaz-i a hnutchhiah zawng zawng pawisa pawh chu a zo ve ta nghal a.

A boral hma khan Mumtaz-i pasal Mohammad Khan chuan Mumtaz-i tan tiin bawnghnute powder tin khat a lei a. He bawnghnute powder hian September thlaa Mumtaz-i naute neih turin taksa chakna a mamawh phurhrukna’n a tih a nia.

Mahse, pa ber a boral takah chuan Mumtaz-i leh a fanu Asma-i te chuan thingpui leh chhang lo chu ei tur an nei lo a ni der mai a, kar hmasa khan bawnghnute powder chu an in zo ta a. Mumtaz-i chuan, “Beiseina ka nei tawh lo, engmah ka nei tawh lo,” tiin a sawi.

An rokhawlhna belhchhah tur ni awm fahranin kar hmasa khan naute chu thla kim lo in a piang leh ta nghal a, vanneihthlak takin a hrisel phian. Mahse, Mumtaz-i chuan, “Ka naute pian avang hian hlimna ka nei hranpa lo. Ni hnih chhung chu en pawh ka en ngam lo,” a ti thung.

Mumtaz-i chhungte tam zawk – a nu leh pa leh a unaute tiamin – chu Turkey-a refugee camp ah an la tang vek lehnghal a, a mamawh ang pawh engmah an thawn thei lo. Tunah hian Mumtaz-i chu a pasal sun tak chhungte bulah a cheng a, mahse, anni pawh chuan an nunna chan ve mai an hlauh avangin feh pawh an feh ngam lo.

Tu in emaw tanpui duh tehreng pawh ni sela, Mumtaz-i te awmna hmun hi sorkar leh tlawmngai pawl te tlawhpawh theih loh in Taliban in an awmchilh mek bawk si.

Kum tlemte kal ta a Afghanistan hmeichhiate laka hleihlenna a thlen chuan dan in rorelna a kengkawh ang ti a thawnthu sawi a an sawi fo chu hetiang dinhmunah hian a lo ding ta a, Mumtaz-i dinhmun hian hmun ralmuang lo ah hmeichhiate chan a chhiat thin zia a tarlang chiang hle awm e.

Mumtaz-i nghaisatu hi khatih laia sorkar tan lam ralthuam keng hotu Naseer-a a ni a, Mumtaz-i hi nupuiah a duh a, mahse, a hmeichhia zawk hian midang a thlan avangin a thin a ur hle a. A ralthuam ken pui te nen Mumtaz-i te chhungkua hi an bei ta a, Mumtaz-i, a nu leh a laizawn tleirawl pahnih te chu acid in an leih ta mai a ni.

He thilthleng hi rapthlak hle mahsela, Mumtaz-i te chhungkua chuan engemaw zawng takin hlimna tur an nei a. An chunga thil thleng avang hian sorkar thuneitu te chu an harhchhuak a, hmeichhiate chanvo humhalhna dan thar khauh tak hmangin ralthuam keng pawl hotute zinga pali te chu an man a, kum 12 chhung chhuak thei lo turin jail-ah an khung ta.

Mumtaz-i leh a laizawn pakhat chu India-ah an hmai sawr chhe vek siamtha turin thawn an ni bawk a. Mumtaz-i chuan a pasal hualin a neih leh duhloh hlau hle mahsela, India atanga a haw hnu chuan an in nei ta a. Kum thum a ral hnu chuan an fanu Asma chu a piang ta a ni.

Thla nga liam ta khan Mumtaz-i leh a chhungte beitu Naseer-a chu man an ni a, tunah hian rei tak lung in tan chiah an hmabak. Mahse, khatih lai tak khan a ni Mumtaz-i beiseina te leh hma hun thlir te chu a chhe zawng hlira a kal tan.

An chhungkaw khawsakna khua chu Taliban te’n an run ta a, Naseer-a hruihhruaite chuan sorkar nilovin Taliban chu an zawm ta zawk a, hetianga an tan lam thlak hi Afghanistana ralthuam keng pawlte tih dan reng a ni: an awmna hmuna pawl chak zawk ni a an ngaih apiang an bel mai thin.

Mumtaz-i pa, Sultan Mohammad chuan Naseer-a chhungte’n an fapa laka thubuai an thehluh chu hnukkir tura an nawrna chu a chhanglet duhlo a. An thinrim chuan Sultana unaupa chu an hreng ta a, an khuaa upa rual te’n an nawr avangin an chhuah leh ta chauh a. ultan Mohammad-a pawh chu Naseer a hruihhruaite’n an sawisak rawn a, hemi hnu hian an ram chhuahsan a tum ta a. “Ka bei let thei lova, kan khua a awm reng ka tan a him bawk lova, chuvang chuan ka chhungte nen Turkey-ah kan tlanchhe ta ringawt mai a ni. Kan tlanchhiat kha chuan ka fanu leh a pasal te hi an beih ka ring pha lo,” tiin Sultan Mohammad chuan a sawi.

Tun kum tira Mumtaz-i a rai tantirh khan a pasal nen phur takin naute hming tur te an phuah a. A pasal chuan naute chu mipa anih chuan Amir Khan ni rawh se a ti a, hmeichhia anih chuan Mumtaz-i’n a hming phuah ve thung rawh se a ti a.

Mahse, kar khata upa hmeichhe naute chuan tun thlengin hming a la nei lo. Mumtaz-i chuan hmeithai bawk, rethie vawk si a naute a enkawl dan turah a ngaihna a hriat loh avangin a hming phuah tur pawhin ngaihtuahna a la seng thei thlawt lo niin a sawi a. A nu berin hming a phuahsak theih loh avang chuan hospital-a nurse te chuan hming an phuah sak lailawk a, Husna tiin an ko ta ringawt mai.

Mumtaz-i sawi dan chuan a pasal kum 27 mi Mohammad Khan-a chu taxi driver a ni a. Ni khat chu a haw kawngah Mumtaz-i beitu, Naseer-a unaupa leh an hmelhriat Baba te’n Mohammad Khan-a lirthei khalh lai tidingin an hnuk chhuak a, an silai hmawrin an vawhlum ta ringawt mai a ni. Heng tualthattu pahnih te hi tualthah thubuai awrh tir chu an ni tawh na in Taliban an huangtau hrih em avangin sorkar thuneitue chuan an la man thei lova.

Hetianga thil a thlen tak avang hian Mumtaz-i chu amah nghaisatute lakah thubuai a thehlut avangin a inchhir rum rum a. “Ka pasal an thah hma khan ka lo ngaidam mai lova ka inchhir lutuk. Ngaidam turin min ngen a, mahse, kan ngaihdam lawk loh avangin ka pasal ka chan ta anih hi,” a ti.

Mumtaz-i pa chuan naute pian hma atang tawh hian a fanu dinhmun chu a hlauhthawn pui tawh thu a sawi a, “Engtin nge a chunga thilthleng te hi a hmachhawn dawn ka hre lo. A pasala chhungte chu an khawsak a harsat avangin phuba lak chu sawiloh, an mo pawh hi an venghim zo kher lovang. Engtin emaw tak Mumtaz-i hi a tlanchhiat mai a ngai dawn,” tiin.

Kar hmasa mai khan Mohammad Khan a thattu te chu zanreh ah khua an lo lut leh a, Khan-a chhungte an rawn zawng nghe nghe.

Kunduz biala Women for Afghan Women pawl chuan Mumtaz-i hi a tir atang khan an lo pui tawh thin a, acid vanga a hmai sawr siamthatna tur plastic surgery man te pawh an tumsak a ni. Mahse, an hotunu Shamila Sahibzada chuan, “Mumtaz-i hi kan puih hmasak ber pawl a ni. Tunah pawh hian kan venhimna hnuaiah awm se kan ti lutuk, mahse an awmna hmun hi kan tan thlen ngaihna a awm hrih lo,” tiin a sawi.

Police te pawhin Mumtaz-i hi chhanchhuah an tiam a, mahse Kunduz-ah Taliban leh sipaite an in do reng avangin an la chhanchhuak thei bik lo.

Hetih lai hian Mumtaz-i chuan beiseina a neih tawh loh thu a sawi. Acid avanga a taksa a ser nung, na em em thin te chhawkna tur damdawi pawh a nei tawh lova. A pasal boral ta in cheng 2,000 leh bawnghnute powder baka a a hnutchhiah chhun mutna carpet chauh a nei tawh a.

Mumtaz-i chuan, “Sawi tham engmah min hnutchhiah lo mahsela, ka la hmangaih tho a. Hetianga nun chu thil harsa tak a ni. Ka hrehawm tih thu hrilh tur takngial pawh ka neilo a nia. Ka fanu te pahnih hian enge khawvelah an hmabak pawh ka hre thiam lo,” a ti.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s