Chief Minister hna chanpual puih chungchangah PRISM leh CM inchhang

PRISM in Cabinet Minister in CM a pui chu dan kalh a ni an ti a, Chief Minister in a chhan hnu ah PRISM in CM hi an chhang leh

The Frontier Despatch (TFD) in Hachhek Congress Block pathum President te’n PWD enkawltu Chief Minister hnena engineer sawn tura an ngen, Health Minister in ti puitling tura PWD E-in-C a tih chungchang a ziah tum khan, sorkar (Political & Cabinet Department) thu chhuahah Lal Thanzara Cabinet Minister a nih hnu ah Chief Minister a pui ang tih ziaka thu chhuah a awm loh avangin Chief Secretary Lalmalsawma chu a zawtfiah a.

Chief Secretary chuan Cabinet Minister-in Cabinet Minister dang (CM) a pui theih loh thu te, a lo pui a nih chuan anmahni inkar a nih thu te leh office building khata pisa kai dun an nih avanga engmah a hriatpui loh thu a sawi a.

TFD thu ziak chungchangah hian eirukna do pawl, tun hnaia political party-a inlet ta PRISM in August 10-a inkhawm an neihah an President Vanlalruata’n, “Dan kalha Cabinet Minister Lal Thanzara’n Chief Minister a puih hi tha kan tih loh avangin Lal Thanzara dinhmun hi ennawna siamtha turin Chief Minister hi kan ngen bawk a ni,” a ti a.

PRISM thusawi hi Chief Minister Lal Thanhawla chuan August 11-a Congress Bhavan-a Political Session ah chhangin Chief Minister chuan thuneihna sang tak a neih thu a sawi a, “Danah chuan Chief Minister hian a duh duh minister atan a ruat thei a ni,” a ti a, Minister-te portfolio pawh mi dang rawn kher loin, ama thuin a siam rem thei tih sawiin PRISM chu ram danpui zir chiang turin thurawn a pe a.

Chief Minister thusawi hi PRISM chuan August 14-a an pisaa an thut khawmna ah an President Vanlalruata chuan a chhang leh a, “Mizoram Chief Minister hian India Constitution hi lo zirchiang tha leh zawk rawh se,” a ti a.

Duhsak bik nei lova rorel tura intiamtuin a party mi lo chu engahmah a ngaih loh thu a sawi te, sorkarin Minister lal dan indawt a siama pakuanaa awm a unaupa Lal Thanzara nena New Secretariat-a awm ve lova hmun danga a inkulh hranpui chu a tha lo a tih thu a sawi a, Constitution kalha Parliamentary Secretary an neih leh a unaupa dinhmun ennawn tura an ngenna chungchanga CM chhanna ram hruaitu awmdan tur a ni lo, a ti a.

August 12-a sorkar thu chhuak ah Lal Thanzara chu PWD Minister anga tarlan a ni chu PRISM chuan Lal Thanzara chu PWD Minister a nih an la hriat ngai loh thu an sawi bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s