Excise Department vs Chief Minister

Chief Minister Lal Thanhawla’n  ruihhlo chu a mantute atanga tihchingpen a awm leh awm loh bihchian a ngaih thu a sawi chuan Excise Department rilru tina in CM hi a thusawi hrilhfiah mai lovin thuthar la khawmtute kawmin an chhang a, eptu pawl te’n Congress chhungkaw buaina luang chhuak nen inkaihhnawih niin an ngai

26-adam- 008

Social Wefare Department (SWD) in mithiam te ruaia damdawi hmansual a nih dan leh ruihhlo ngai te dinhmun zirchianna bu a siam, ‘The Baseline Survey on the Extent & Pattern of Drug use in Mizoram’ tih chu August 8 khan Mizoram Legislative Assembly Annexe Conference Hall-ah Chief Minister Lal Thanhawla’n a tlangzarh a, tlangzarh paha thusawiin Chief Minister chuan Mizorama ruihhlo hal thinah ruihhlo tak tak hal a nih leh nih loh chian a ngaih thu sawiin, “YMA-in an halte hi chu kan ringhlel lo a. Sorkar bawk hi enfiah a ngai a, kan hotu liante’n an naute an ven that a ngai,” a ti a, ruihhlo chu a mantute atanga tihchingpen a awm leh awm loh bihchian a ngaih thu a sawi a ni.

Chief Minister thusawi hian Excise & Narcotics Department (END) rilru a tina hle a, Chief Minister hi lenchilh a, a thusawi te hrilhfiah mai lovin August 14 khan thuthar la khawmtute kawmin ruihhlo an man tawh, an kuta awm tawhte tihchingpen a awm ngai lo tih an sawi a, “Dan angin tihral a ni thin a, ruihhlo kan halte hi a tak tak vek a ni,” an ti.

END hotute chuan Chief Minister thusawi chu an department Secretary hoa an sawiho hnuah, an kalphung sawifiah tura thuthar thehdarhtute thingpui inpui an nih thu an sawi a, an thil mante an tih zui danah an pawng kawl tawp ngai lo a, Supreme Court duh dan zuiin sorkarin notification a chhuah a, chumi ang chuan ruihhlo dahnate pawh thuneitute’n an endik a, an pawmpui thlap a an ti a.

Ruihhlo tihral dan tur ngaihtuahtu tur Disposable Committee din a nih thu sawiin END hotute chuan Court-in a chinfel tawhte tihriral dan tur an ngaihtuah thin an ti a, ruihhlote chu tuam that a nih hnuah magistrate-in an endik leh vek a, chumi hnuah tihriralna hmun turah an dah thin niin an sawi.

END hotute sawi danin ruihhlote chu man an nih hnuah magistrate hmaah a thla lak vek thin a ni an ti a, document atan hman zui thin a ni. Dan ang chuan ruihhlote chu incinerator-ah hal ral tur ni mahse, Falkawna State Referral Hospital incinerator chu a tet deuh avangin hal ral hman a ni lo.

“Kan strict loh chuan tawp deuhin hna kan thawk ang tih kan hlau. Hrem pawh kan ngah tawh a, inhrem loh chuan hna kan thawh that loh a hlauhawm. Hna kan thawh that loh chuan mipui thlawpna kan hmu thei lo ang. Chief Minister sawi anga ruihhlo tihchingpen a awm kan hre lo a, kan eizawnna a nih avangin kan la na. Kan nihna nia kan hriatte sawi ve tha kan ti a ni,” an ti.

END hotute chuan, tun hmaa ruihhlo mante tihchingpen a awm leh awm loh an hriat loh thu sawiin, “Kan hriat chinah chuan tihchingpen a awm lo. Kalphung a that loh lai chuan a lo awm pawh a ni mai thei a, kan hriat chinah chuan kan man a, kan kuta lut tawh chu a chhuah leh kan hre lo. Court-a evidence atan kan la chhuak a, kan dah leh mai thin a ni,” an ti a, CM Hawla thusawi chu tun hma thil a nih chuan rinhlelh chu an neih thu an sawi a, ruihhlo man tawh la chhuak leh tura thlemna an tawh ve thin thu pawh an sawi.

 

MPC party thalaiin Chief Minister dem

MPC thalai te chuan Chief Minister thusawi chungchangah hian August 16 khan thu chhuah an siam a, “Tunhnaiah Excise & Narcotic Department ten an ruihhlo man an tihral dan chungchangah Chief Minister Pu Lalthanhawla’n a rinhlelh thu ring taka Zoram mipui hriatah a au chhuahpui ta mai hi MPC Thalai Gen. Hqrs chuan mak kan ti,” an ti a, hei hian Chief Minister Lal Thanhawla’n Excise Minister R Lalzirliana leh a department chan tihmualpho a tumzia tihlannania an ngaih thu an sawi a, hetianga Chief Minister leh Excise Minister inkara inhmuhthiam lohna boruak lian tam a awm avanga thu dik lo leh belhchian dawl lo hmanga Chief Minister a inhrithla chu an dem thu an sawi a, Congress party chhungkaw buaina chu sorkar department ah ni lo, an party chhunga chingfel turin an chah.

MPC thalaite chuan ruihhlo man leh tihral chungchanga Excise department in dan ang taka thil an kalpui chu lawmawm an tih thu leh an fak thu an sawi bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s