Khawvel/ Indopui pahnihna ami tawh Japan flag rang riai ruai ah chhungkaw khat hlimna sawi sen loh

US sipai hluiin Japan flag, thian leh thenawm te’n sipai zinbo tur thlahna thu an ziahna chu sipai thi ta chhungte hnenah a hlan let a, fam chang Japanese sipai  chhungte tan chuan an unaupa hnuhma an neih chhun a ni

Tatsuya Yasue chuan an hnam puanzar-ah chuan a hmai phumin a hnim a. Chutah he a rohlu an ina rawn thlentu putar kum 93 a upa kut chu la-in a fawp ta a.

Marvin Strombo hian kum 73 kal ta a Indopui pahnihna hunah khan thliarkar pakhata an inbeihna-ah he Japan hnam puanzar hi sipai thi tawh kut atangin a la a, chu chu he sipai thi Sadao Yasue chhungte hnenah hian August thla bul khan a hlan let.

Hemi hma hi Yasue chhungte hian a ruang chu sawiloh, a thil neih dang reng reng an la dawng ngailo.

He sipai farnu kum 93 a upa Sayoko Furuta chu Tatsuya Yasue-a’n a malchunga hnam puanzar a dah lai chuan a kut pahniha a hmai hup chungin ri lovin a tap a. Strombo chuan a dar chu a chul sak hauh hauhva. “Hnam puanzar ka kir leh kha ka lawm tak zet a ni,” tiin Strombo chuan a sawi a. “Kha hnam puanzar kha a (Sayoko Furuta) tana a hlutzia ka hmu a, khawvela thil hlu zawng zawng hen a ni a, kei pawh ka hnuk a ulh ve teuh mai,” a ti a ni.

He hnam puanzar var lai-ah hian he thingpui hmun siamtute awmna Higashishirakawa khua a Sadao Yasue thiante leh thenawm 180 te chuan an hming an ziak a, ral ram atanga dam taka Yasue a lokir leh theihna atana duhsakna hming ziak a ni. An hming ziah avang hian Strombo hian he hnam puanzar hi a neitu chhungkua dik takte hnenah a hlan theih phah. Chuta thuziah pakhatah chuan,”Indona mualah chuan vannei takin che reng ang che,” tih a inziak a. An hming leh hawrawp a en mai pawh chuan sipai thi ta unaupa Tatsuya Yasue rilru-ah chuan an hmel leh a u nena an inlaichin dan zawng zawng a lo lang zut zut a. A chhungkhat laina te hnena an hmangaih em em Japan sipai kut atanga hnam puanzar a pek kir leh hnu hian an chhungkua chu an rilru a dam huai ang tih he Indopui pahnihna a phek chhuak US sipai Strombo hian a ring nghet tlat a ni.

He puanzar rim hian Tatsuya naupan lai thil tam tak a hriat chhuah tir a. “A rim chu ka u rim ang chiah kha a ni mai a, chutih rualin ka nu-in choka-a a ei siam, kan ei ho thin rim pawh a chambang a. He puanzar hi kan rohlu a ni reng ang,” tiin Tatsuya Yasue chuan a sawi.

He putar kum 89 a upa hian an in, kum 400 zeta upa chhungah he puanzar an kuta a lo kir leh ta an ngaih pawimawhzia hi Associated Press (AP) a hrilh a. “Tunah chuan indo chu a tawp ta tak tak a, ka u pawh a lo haw ta a ni hawt e,” a ti a ni.

He puanzar an inhlan let leh ni hi Indopui pahnihna tawp ni champha a ni a, hemi ni hian Japan chuan indona a thite pualin tawngtaina an buatsaih thin. Hemi hapta hi Japan ramah chuan ‘Obon’ tia vuahin mitthi thlaraute’n an chhungte an rawn tlawh hun ni-in an ring a. Yasue chuan he puanzar pek kir leh an ni hian muanna leh inremna thuchah a keng tel a, chhuan thar zelte chu he thawnthu hi hrilh a, khatiang hun rapthlak kha a thlen nawn leh tawhlohna turin tan lak a ngai a ni a ti.

Tatsuya Yasue-a’n a u damlai a hmuh hnuhnun ber chu kum 1943 a South Pacific pana a kal hma ni chiah kha a ni a. Amah leh a unau dang pahnihte chuan an upa ber thlahna atan sipai hmunpui pawnah chuan sushi leh Japanese chithlum ei-in inthlahna picnic tenau an nei a. An inthen darh dawnah chuan Sadao chuan Tatsuya chu ko hrangin a nu leh pate tha taka lo enkawl tura chahin a hrilh ru a, an thawnna tur chu Pacific tuifinriat chhunga thliarkar tam tak, indona rumra tak mai, dam khawchhuah theihna awm mang mang lo niin a sawi bawk a ni. A kum lehah chuan Japan thuneitute chuan Sadao-a chhungte hnenah hian thingrem, a mawnga lung tlemte dah chu an hlan a, hei hi a ruang aiawhtu a ni.

Indopui rem hnu thla engemawzat a ral hnu-ah khan a thih dan chu chianglo deuh ruai chuan an hre ta a. A thihna hmun hi Mariana thliarkar khawilai berah emaw a ni a, a thih ni hi Japan awpna lak atanga Saipan chhuhsak a nih ni, July 18, 1944 kha a ni a, a thih hian kum 25 a upa a ni.

“Chu zawng chu ka u chungchang min hrilh chhun chu a ni a. Khawilai takah nge, eng hunah nge tih leh engtinnge a thih tih pawh kan hre chiang thei ta lo,” tiin a sawi a. An chhungkua chuan tuifinriat-ah a thi anga a ruang chu tuipui thuk takah a zal a nih ang ring a. Kum 20 kal ta khan Tatsuya Yasue hian a nau hruai in Saipan hi a tlawh a, chutah chuan a u thil tawn tur awm chu nasa takin a suangtuah a ni.

Hei hi thil awm dan a nih avangin Strombo hian Yasue chhungkua hi hnam puanzar a pe a ni satliah lova, zawhna tam tak chhanna a pe tel a ni. Strombo sawi dan chuan Saipan thliarkara Garapan khaw daifemah Sadao Yasue ruang hi a hmu a, a hmuh lai hian ngaw karah kawng a bova, Japan sipai hmatawng ho awmna a hnaih hle a ni awm e. Yasue unaute hnenah chuan an u chu mortar-in a luruh a deng fuh a nih a rinawm tih a hrilh a. Sadao chu a nak veilam delhin lei-ah a lo mu a, hliam na tuar hmel a pu lova, muang taka muhil siai siai hmel a pu niin a sawi bawk.

Hetianga Strambo-a’n a ruang a hmuh dan a sawi chian theih em avang hian Sadao Yasue ruhro tal chu an la hmuh chhuah mai beiseina an nei thar a, a ruang awmna hi tuipui ni lovin khawmual a ni bawk a. Japan sipai maktaduai 2 leh nuai 4, an ram pawna thite zinga a zahve deuhthaw hi hmuh chhuah lohvin an la awm a. An chhungte an upa chho zela, an hriat rengna a rintlak loh telh telh bawk si a, bawhzui ran ngai tak a ni.

Tangrual sipaite khan hmelma an thahte kut atanga puanzar lak sak kha an ching ang reng a, indo hriatrenga atana la an ni a, a bik takin Japanese puanzar hi lilamin pawisa tam tham taka chhang ngam an awm thin avangin a lar ang reng riau niin Strombo chuan a sawi.

Japan rama lusun chhungte tan erawh chuan awmze thuk tak a nei a, a bik takin an laina thite ruang emaw an thil neih emaw hmuh tur awm ta reng renglo Yasue chhungkuate ang tan phei chuan a hlu zual. Japan sorkar hian indo laia hnam puanzar hming ziah hnan lilam lo tur hian lilam thin company te chu a ngen ta hial a ni.

Strombo chuan a tirah chuan he puanzar hi indo hriat rengna atana a hawn a nih thu a sawi a, mahse a rilru a nuam thei ngang lova, hralh lovin engtik hunah emaw pe kir leh turin chhia a chham ta zawk a ni. Montana-a a chenna inah chuan silai dahna bawm chhungah he puanzar hi kum tam tak a dah a, a in tlawhtute titi pawh a siam tam ve hle thin.

Strombo hi US Marine a ni thin a, Saipan, Tarawa leh Tinian indona-ah te telin heng hmun te hi Japan kut atangin an chhuhsak zel a, US in hnehna a chan theihna kawng sialtu zing a mi a ni.

Kum 2012 khan Obon Society nen an inbe pawp a, hei hi Oregon a hmunpui nei, hlep awm lova US sipaite’n an Japanese puanzar kawlte Japan sipai thi tawh chhungte hnena pekir leh tura tanpuitu pawl a lo ni a. He pawl hian zir chianna neiin he puanzar hi mihring 2,300 chenna Japan ram laili a khaw pakhat an chhui chhuak ta a ni.

Hetia an inhlan fel takah hian Strombo tan pawh a lungawi thlak a. “Hetianga an ngaih pawimawh em em puanzar an chhungkaw hnena ka hlan let leh thei hian ka nun pawh a khawih a, an nun kawng pawh hlim zawka an zawh theih ka beisei,” a ti a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s