Sorkar hnathawk te sports association ah kum 4 bak tel thei tawh dawn lo

Sorkar laipuiin a hnuaia thawk leh state sorkar hnuaia thawk te sports association-a an inhman theih hun a bituk thar leh chu state tin leh UT zawng zawng te bawhzui turin a hriattir nawn

cover

Ministry of Youth Affairs & Sports chuan tun hnai khan state tin leh UT zawng zawng Chief Secretary bakah Sport Secretary te chu sorkar hnathawk, sports association-a an inhman theih hun bituk khauh taka kengkawh turin a ti a. He lehkha hi Mizoram sorkar-a sport secretariat pawhin Directorate chu Mizoram State Sports Council (MSSC) te nen inrawn tlang a, Rules siama bawhzui turin May 17 khan a hriattir a, Rules siamte hi Law Department pawmpuina (vet) dil mek a ni.

Hetih rual hian MSSC executive committee chuan thla hnih-thum kaltaa an thut khawm tumin term leh atang chuan hetiang ruahmanna hi puanzar ni se tiin a rel a, he thut khawmna a tel ve pakhat sawi dan chuan, tualchhung sports association tinah sorkar hnathawk OB an awm ti a sawi theih a nih avang leh OB te zinga a zatve emaw vel chu sorkar hnathawk an nih vang bakah, association thenkhatah chuan kum 10 thleng te pawha OB nihna chelh tawh an awm avangin hetianga thutlukna siam a nih thu a sawi.

Ministry of Youth Affairs & Sports hnuaia Sports Department chuan state tin leh UT zawng zawng lehkha an thawn ah hian Central Civil Service (Conduct Rules), 1964 in sorkar laipui hnuaia hnathawkte chu office dang an luah kawp a remti lo a, he danah vek hian sorkar hnathawkte chu pawl dang engpawh office luah a remti lo bawk a, heng pawl tana sum penpun lam emaw, sum khawn emaw a khap a. Personnel & Traning Department in April 22, 1994-a thu chhuah a siamah chuan sorkar hnathawkte chu sports association ah term khat (kum li) bak an inhmang thei lo ang a ti a.

Ministry thupek hi January 31, 2011 khan National Sports Development Code of India, 2011 (NSDCI) ah telh niin, kum 2012 khan Indian Olympic Association chuan Delhi High Court ah khing mahse, Court chuan dan chu kengkawh turin sorkar tinin dan zam a, state tin leh UT zawng zawng te zawm turin a ti ta zawk a ni.

Sorkar laipui hian a thu chhuah hi kengkawh turin a ti a, hei bakah hian All India Service (Indian Administrative Service, Indian Police Service, Indian Forest Service) te pawh infiamna pawla an inhmang dawn a nih chuan AIS (Conduct) Rules hnuaiah phalna an lak ve a ngai dawn a tih bakah state tin leh UT zawng zawng te chu an hnuaia All India Service leh state service te infiamna pawla tel zawng zawngte an telna pawl leh an tel tawh chin chipchiar taka thawn turin a ti bawk.

 

Hriattirna hi tualchhungah hman thuai a ni ang em?

Sorkar laipui hriattirna hi Mizoramin a hman theih tura dan duan niin Law Department pawmpuina nghah mek niin sports department hotute chuan The Frontier Despatch (TFD) an hrilh a, Law Department hian dan dang nen a insu buai thei ang em tih ngun takin an zir chiang ang a, siam that ngai lai nia an hriatte an siam tha ang a, chumi hnu ah department ah rawn kirin Cabinet pawmpui a ngai leh dawn niin an sawi a.

Cabinet pawmpuina lak hma hian Sports Minister pawhin a en veleh phawt an rin thu an sawi bawk a, a hman tan theih hun tur an la sawi thei lo niin an sawi.

 

He dan hian Mizoram a nghawng dawn em?

TFD chuan sorkar laipui lehkha a hmuh veleh hian engtin nge Mizoram a nghawng dawn tih a zirchiang nghal a, Mizoram State Sports Council (MSSC) hnuaiah hian infiamna pawl (Association) 31 an awm a, heng pawl 31 puipa (Office Bearers) ah hian sorkar hnathawk an awm vek tih a hmu a, hei vang hian he dan hi a taka kenkawh a nih hunah chuan Mizorama infiamna pawl a nghawng nasa hle dawn a ni.

MSSC hnuaia pawl 31 hnuaiah hian District Association an awm nual bawk a, heng District Association puipa ah hian sorkar hnathawk awm lohna a awm mang lo a tih theih.

Hetih lai hian, sorkar hnathawk sports association-a an inhman hian pawl chak phah tam tak a awm ve bawk a, sorkar hnathawkte hi lehkha thiam, fel tak tak an nih avangin pawl thenkhat chuan an hruaitu atana an awh em em leh an sawm hial te pawh an awm ve bawk a, pawl thenkhat phei chuan officer chal lang tak, nihna sang tak nei te chu President ah te sawmin a hminga President nihna chelh tir a pawl zahawmna atana sawm te pawh an awm ve bawk.

Sorkar in he dan hman theiha a siam hunah hian a hman tan ni (effective date) a siam dan tur a la hriat loh a, sorkar hnathawk an telna pawl ah term khat (kum li aia rei lo) bak tel a rem tih loh avang hian tuna sports association hrang hrang (31) te inthlan hun a inang loh nuaih avangin a hman tan ni atanga chhiara kum li nge ni ang, term kal lai mek a OB-te a nghawng nghal dawn tih a hriat loh.

Thil chiang tak erawh chu sports association puipa te hun chelh (term khat) hi kum khat pawh ni se chu bak chu an chelh thei dawn lova, term khat kum nga pawh ni se kum li bak an chelh thei dawn loh avangin an telna pawla term khat an hmang tling thei dawn lo a ni.

 

Sports Association-a sorkar hnathawk inhmangin sports lama hma a tih sawn dan leh sorkar hna lama nghawng a neih dan

Tarlan tawh angin sorkar hnathawkte hi lehkha thiam leh hawi zau, mi fel tak tak an ni a, pawl tam takte chuan an pawl hruaitu ah an duh a, sawm hial te pawh an awm a.

Pawl hruaitute an that na na na chuan pawlin hma a sawn a, an kaihhruai infiamna in hma a sawn a, state pawna fehchhuah nikhua pawhin an kaihhruai/enkawl te tan a thlamuanthlak thin hle nia sawi a ni a. Sum tuak kawngah te, an telna pawlin tournament/competition a siam dawna sum zawn leh sponsorship zawn kawngah pawh an thawhhlawk thei hle a, sorkar atanga tanpuina dawn tur awm zawn kawngah pawh an tangkai thin hle a ni.

Chutih mek laiin sorkar hnathawk tam tak chuan an pisa-a an thawhpui, sports association-a inhmang te chu kep an ngai nasa thin hle niin an sawi a, an pawl inhmannate’n tournament/competition an siamin leave la lo in hotute remtihna in an kal fo mai thin a, chungah te chuan kep an ngai fo bakah an telna pawlte state aiawha state pawna fehchhuah a ngai in a hruaitute an nih changin hotute phalna in leave la lo in rei tak tak an zin ve bawk thin a, chungah te pawh chuan nasa taka kep an ngai niin an sawi bakah, zing leh tlai lama inkhel thin an nih avangin pisa thleng tlai leh haw hma an awm fo thin niin an sawi bawk.

 

USAM in eng nge an sawi

MSSC hnuaia infiamna pawl 31 te inzawmkhawm United Sports Association of Mizoram (USAM) hruaitute erawh chuan sorkar laipui thupek hi tualchhungah hman ni dawn mahsela, “Mizo style” a kalpui a nih theih tho thu an sawi a.

“Thil dangah pawh dan chu a awm a, mahse official taka kenkawh anih lem loh chuan dan chu a awm lo ang tho a nia. Wait and watch policy te pawh hman ve a ngai ang,” tiin hruaitu pakhat chuan a sawi a.

USAM ah bik hian OB paruk zinga pathum chu sorkar hnathawk an ni ngei a, hetiang tho hi sports association hrang hrangah pawh dinhmun anih hmel niin hruaitu pakhat chuan a sawi bawk.

“Engpawh ni se, council executive in a rel tawh a. Dan te pawh chu puanzar a la ni anga, hman tak tak anih chuan association te chu min nghawng viau ngei anga, mahse hman tak tak anih leh nih loh chu thlir kan hmabak ve tho,” a ti bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s